Yocáqui Jnupabéjnaringui
Yocaranone u yocáqui jnupabéjnaringui:
“Iapá, ¿ṍrañoji rique nanique a?”
“Yocaranone u yocáqui jnupabéjnaringui.”
Ayoréode ore pijnane aja guedé nanique:
Mu guedé i tu Yoquimamito, ga ore cho Dupade iji guedé nanique. Ore pijnane aja guedé: ‘¡Yoquimamito é, asi ome yoque to é!’ Ore tibite durasé, jeoga gatócoro, jeoga guedé jnoringai. Guedé guẽrate cuchade ome ore.”
Cabayudie chajna dajeque uñai ga Guedoside chajna dajeque uñai nanique:
Cabayudie chajna dajeque uñai ujetiga ore dirase bajaque ga ayoré togode nijiapo rĩ. Guedoside chajna dajeque uñai. Bajai tu guedoside ga chequésãre Ayoréode ga ore topísi.
Cojñócho ayoréode nanique:
Cojñócho ayoréode. Chi ayoré Aramato, cho otadábode. Ore chujé Yamochai ga chijaro ajnoquéode ga chisite ajnoquéode. Ga pésu ayoréode adode tiji jnese, Aramato. Pésu ayoré; chijaro ajnoquéode, Yamochai ajnoquéode. Chimate ga chibote ujñari aja ajei. Chimate ga ayoré. Chi chicháji ti. Chiese cojñone yocarãpi tu Yamochai ajnoquéode.
Disírique chicho yocade ga yocade que chayo:
Cuchisode garané tu chequé cuchábia. Sué cuchade. Yocade sué cuchisode ore iji erámi. Chi chijire dejode ga chejna cuchade.
Chi disírique chirote gajño. ‘Codé á, yi ga yujé jeta yirote.’ Chijna doji tome.
Ga dacode chojninga: ‘Ajuse bero ome.’
Chejna dojode cucha. Chicho gajño, chimochẽre ógoro. Ga ajnangói u. Jecute yocade que chayo; chinoningase gu.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo.
