Yipéco ‘Ayoré.org’ gu cuchade udojo

Ayoré.org  Pipesute sitio web udé gu ujetiga ayoréode atatagode cucha jogadi tu uje ore chicháji cíntadie nanique enga ore chirógaja yu. Ore atatagode udore uñane t‹raji Bolivia, Paraguay ore ome yu, jeoga patataque yu ome uje yugúsiji ore idáyode to. Uje cíntadie chise yu nanique ga yangári, enga yurúsãre quitígo iji siqueredie udire 1951 jec aja deréjnane unojo to iji 2018. Yigaidi tu ujetiga ayoréode uhuaque oyo cucha oreráguejnarique iji uacarásade ipesudode, atatagode ore, enga Dupade anguroméone u to:

  • Jeta ca bijna ayoréode uruode iji erámi tudé. Adi tu uje chi e jiei ayoré quedéjnane uñane uje ore uruode e bijna ome ore, ga disi ejode iji ore a ca ore chirapo dayode ore urúpisode jne rĩ. Ore chisa gu cojñone uruode, ga ore noñome daru bajade iji ti jmete.
  • Jeta ayorérique pota ga jĩraque chise dacuegode cucha iji udé ome darásade atígo, uruode ore, jéc aja jnani bajade ore isocade to nanique rĩ.
  • Jeta cojñone chajire to enga chátaja ore to jeta ore chiraja ayoréode adode, enga jogadi tu ujetiga cojñone, ayoréode ore irasitigade ome ñane quérã.
  • Jeta ore chise erásoningo cucha to jeta chátaja ore ome darajatigade ome uñane adode, uruode ore: yojningane u diccionario, gramática, pacajnaquéode uñane to.
  • Jeta ore chise to pacajnaquéode ome Dupade Uruode, jéc aja películadie rĩ uje chacate ore ome Dupade, jéc aja cuchade to uje yirãrája gáyode jeta pududique to ome ayoréode. Yigaidi tu gu jeta ore angúromeode u cuchade udore enga ore irajatigade ome Dupade, abi Jesucrísto quérã.

Maxine Morarie

WebSite udé gajnéone cucha jnese tṍraji ayoréode, jeoga déji yu gu uje yicatecã́ri ayoréode iji ore idáyode ica. Yijorane ipesudode déji to, mu udore juéga ome yu jéta yicháji udore to iji udé. Yipotigádi u ujetiga ayoréode cho dajnéngu cuchade udore jnese iji Ayoré.org. Mu ujetiga unejángone pota chisa yitrábajo ome dagaidode cucha, ga chingo yu bajaque jeta yujuéga ome ore: <email address>. Yingome uaque to uje que yẽra yipesudode gotique jeta gosi pota doi orérangome.