Maxine Morarie
Marina de Morarie u uje chamata purusarane unojo jnese enga pésu udojo iji dáringa gapu jé aja dáringa gata to. Marina, abai Juan ore cháta ragaja Mision Nuevas Tribus iji 1950. Ore chicáji ayoréode idai Tobité nanique iji 1952 enga ore chacate ayoréode ome cuchade ujetiga ore chiraja dasocáringome cucha pisagode ujetiga ore chise dájoningarique iji cojñone ujade. Ore di bisidode údi ome ayoréode to nanique rĩ. Cuchiyi upusu uje ore chacate ore ome Dupade Uruode ujetiga Dupade Uruode bátigárique déji ore idai uté to nanique. Ore chajnerame Dupade uruode to iji ayoréode uruode, enga ore chimate Nuevo Testimento jé aja Antiguo Testimento petique to. Juan cháta raja Marina to jeta ore churusãre Ayoréode adode, atatgode ore jeta ca bijna ome disi ejode jne.
Que gusu ayoréode uje ore gajnecho Marina ipesudode, mu Marina chacate jnanione, chequedie uñanie to ujetiga ore chajnerame Dupade Uruode to ome ayoré quedéjnane iji pachaminone uñane. Yojningane u: Bolivia, Paraguay, Colombia, Venezuela, Méjico ore. Marina ipesudode ome Ayoréode u: diccionarios, gramáticas, jé aja pacajnaquéode jeta ore chiraja purusarane ome to. Marina jorane ayoreo iji Bolivia, Paraguay ore chiroque da-cartadie aja uaté gatuaque, enga udore uñane ore cho daté iji uaté enga ore chojninga: ‘Ité a.” Obiréjna uje uaté chijnorapise ayoréode, jé basa ga ayoréode chijnora uaté to.
A ca toguirásome Marina jeta chajnerame Dupade Uruode ome ayoréode ujetiga jé ca atajasórone ayoreo cuse. Yojningane u: Ecarai, Dijaide, Yotequedéjnai, Beui, Comai, Cadui, Mateo, Gábidé, Oidábiadé, Jómone, Oroné, ore. Chequedie uñanie chatapísaja to iji tanigai jeta chiraja Ayoreode uruode, enga ore íode u: Tamidaté, Aquesuidaté, Póroro, Dapuré, Gutó udaji to.
Marina pota chacãre udore ore gai uje ore chejna rángaja dasagode cucha ome sitio web uje ore pésu Ayoré.org. Bajé tu Patricia Morarie-Jolly uje gajnei tu jeta chajire purusarane unojo jnese aja quitígo, jec aja uje cho quique pisoca omone ome ore uñane uje ore pésu dasagode cucha ome Ayoré.org úringai pipesute. Uate u to uje cho Marina quique, enga chojninga: Uje bajnerame ore uruode aja inglés, español ore, enga ajusipise udore uruode guio enga pijoque uje ayoréode u uje ore narare. Ejo u Carol Ann Kelly uje cháta raja yoque iji taningapísi jéc aja dirode unojo to uje yipeco revisiones; Carol Ann jĩrique pésu dáyipierigui ome cuchade, enga chiraja dasocáringone cuchade ujetiga ore chise dáringane ueracho. Michael Cheser. Jiei hóradie ome Michael uje pésu pijogadode ome cuchade, que gusu ome ayoréode ore uruode, mu pésu jogadode to ome inglés, español ore. Joanie Finch u uje chicháji purusaratígo aja pijogadode, chojmára, chojmára, chojmára. Ryan Brackin u uje chijnime ayoréode atuatigade cucha oredie, enga ueradipíso uté ijniminguenie fótoi. Marína chojningame udore ore jnese: Yacaranguipis ome uaque jnese.
Marina irasique re uje abai, Juan, jecucha cháta cuchade aja uaté uje chajnerame Dupade Uruode ome ayoréode. Mu que gusu abai, mu abode u to uje ore chátaja uaté uje disi ore, jec aja deréjnane unojo to uje ore chatapise cuchade aja enga jiépise ore ijnoraquei ome daté Marina. Yojningane u: Howie, Nancy, Michael, Marcos, Carolina, Patricia ore. Marina jorapísode uje ore úringai cuchéraque u Powers, ore chataja Marina to ujetiga pipesute ‘Ayoré.org’ ome Ayoréode.