Dupade anguresṍre uyu ga yingo yate bajade ome uaque:
Yingo uaque to yate bajade. Yisijnaringuéone. Mu yadode gajnárecho diríca, mu yujode Dupade anguresõre, atecachoi Dupade ome Urusãráquedé uyu ome udore to jne.
Jecucha yiya Dupade adode mu yorase paraque diríca. Ore chojninga: “Urusãráquedé ga Dupade anguresõre ga cho yoque to.”
De ta, Dupade ejode, uerate:
Yirajágo uje cucha omi déji gaté. Dupade ipesudi cucha uerate déji gaté. Jeta yo parágome Dupade adode, a yoco parágome Dupade, ga íjnoque Dupade ueratigai tiji yoc. Jé yocadi pitoringai jeta yoco parágome. Adi jé cho uje que yiraja cucháric. Que yirajapise cuchárigo. Jecute yingo uaque to yate bajade.
Yacaranguipísome Dupade uje jnusina yoguiji deréjnane, jé udé to rĩ. Cachi jé adi udé. Jé ca oco ate gajnaréngone iji yoque, Dupade anguresórone, Dupade anguretodie uhuac. De ta, Dupade ejode, uerate. Anguretáyo uac, uje erãpe ueradode déji ome yoque. Jeta Dupade angureto uaque enga uacajneque to erãpe ueradi iji gaté.
Jé ca ajéjome Dupade adode:
Yocacaranguipísome Dupade uje aníri, Ipeyai ore déji yoque, enga ore chingo yoque ome Dupade. Dupade anguresõre uaque, jé ca yajéjome queyate gajnaréngone ome cucha anínique gotique. Gajnárec jeta yãrángome darai tiji yipajei. Ga adi u Dupade jeta chajéngome ore to jeta di.
Jé ca ajéchome Dupade adode to jeta acacho yoque to. Jnacarode uhuac, jé gapudíe uhuáque to. A jé ca ajéjome Dupade adode. Yacaco ore iji dirode jnese to. (1 Timoteo 4:12)
Eri jnusina yogome Dupade Uruode:
Adi u Eri uje chise yóguiji de diríca ga jnusina yogome Dupade Uruode, enga e que toc jeta yipéco yocuru gajnarécho ome queyujórique ayoré. Jeta jé adi tu ome cuchade. Jé ca yajénique dotãre ome yujórique ayoré. Jé ca yaguhéta yujórique ayoré gai ome cucha gajnarétique. Gajnáreque udé, chamáñaje Dupade urúo gu. Dupade ajéode u ujeta yacaco yógome iji deréjnane jnese. Jé ca queyurúrigo gajnaréngome yujórique ayoré. Jeta yuruode gajnaréngome yujórique ayoré ga e yique. Jeta Dupade di jne mu yipógu ica yuruode, mu yingome uje yuruode gajnarécho ome yujórique ayoré ica ga yate gajnareque. Ga jé yique.
Angáchoi yocacadingórone:
Yigaidi casé yujórique ayoré. Gajnáreque udé ga que Dupade acho gotique. U gapudíe uhuac, jnacarode ore. Angáchoi yocacadingórone – Guejnáminé ore.
Ajusipise uaqueo to:
Gajnáreque jne uje uacapótayo jnacarode ore. Ajusipise uaqueo to. Jnacarode uhuaque jeta uacacotedie di, beyoi uacacotepise.
Eri a adi u. Uje Eri a chojninga: “A yipésu gu diri gajnarétigo, yiñoñáringuei.”
Queyadi ujeta yipéjo queyidai iñoñaringuei tome Dupade anguresónique ore. Jé uacamóño to uje yatecãri Davidé ica. Dupade anguresõre ore adi u. E yuruode to uje Davidé chachai ujuyaquei ome uyoque que. Ujeta Dupade anguresóningo ore isocai yocadi u. Uje yimesacoa ñane ome cuchade.
Urusãráquedé – Rincon de Tigre, Bolivia – 1970
Marina de Morarie churúsãre Urusãráquedé uruode
