Dupade cãra re ome yoque:
Ujetiga uacuñéngo changureta Dupade ga ca uacuñéngo chajéngome Dupade to. Uje Dupade jé que cho ayoréode uyoque go, jé que cho cojñone ugucharã́tique go, jé cãra re ome yoque. Uacuñéngo chejna raja Dupade to.
Dupade gajnui
u camión pachidé dirome ujetiga camión gachisṍri chãraque:
Que yamo, mu a Dupade gajnui u camión pachidé dirome
ujetiga camión gachisṍri chãraque ga jé que toc jeta pibi aja Dupade.
Uje Dupade uruode chacapísaja ore áyipiedie enga jé u uje ore chejna rángaja Dupade. Ujetiga Dupade di dirome, cojñoque ugucharã́tique ta chojninga: ‘Yiplátadie déji daji, yijína ua to jne.’
Dupade uru quigode u udojo ujetiga uacuñéngo changureta to. Uje a di camiṍraque jeoga cuchabasúrique, mu gachisṍri chãraque ga je toque gotique, adi ta u jeta Dupade di. Adi upúsu cucha unejai uje yipótago jóroga mu gajnengṍri chãraque ga jé que toque ome ñoque.
Ta uacuñéngo chejna raja Dupade to, Dupade anguretasṍrone uaque. Acatecãchoi Dupade, ca ajéchome. Ca ajéngome Dupade jeta acatecã́ri.
Dupade chapuse yoque aja ajegaisóningo:
Cho jeta cucha Dupade ga chojninga: ‘Ueradéjna jnacari, ueradé gapua, enga ore u yajegaisóningo.’ Jé basa ga choquíjnarique, a choquíjna marínga, jé chijína Dupade jeta gosi changureta. Dupade chapuse yoque aja ajegaisóningo jeta changureta.
Uerate uje pacadique yoque ome Dupade Uruode:
Yacaranguipise ome guidáyode iji erámone uje Dupade Uruode déji guidáyode jnese iji erámone. Yacaranguipise ome guidáyode iji erámone. Dupade uruode déji Tobité, déji Pailón rĩ, déji don Len idai, déji Zapocó rĩ, déji Santa Cruz uéchade rĩ, déji ducuniri uñane, déji Paraguay iji queyéchade, déji Pajeidé idai. Yacaranguipise ome udojo guidáyode uje Dupade Uruode e déji guidáyode ga cojñone, ayoréode chingo yoque Dupade Uruode aja yoque.
E gusu.
Chagaide – Rincón de Tigre – 1970
Janet Briggs churúsãre Chagaide uruode nanique
