Igarubidaté Igoriguéode
(Igarubidaté achachagúgode u. Jé basa ga Jnurumini u júdi.)
Igarubídaté chojninga:
E yirasiguipise yájnami *Ijniminayé uqué que’.
Igarubidaté cho caratai iji re enga chojninga:
“¿Jé gotíguipie, que yagu que ga que yugúsi yebiédatérigui?”
Igarubidaté chicota dájnamone:
Jé yirasiguipise yájnatigo ore ome carataque-chagúode-daté uaqué.
Igarubidaté catecã́ri caratai enga chojningame:
¡Carataquechaguá! Ãriji ga apésu yujñarinie yoquijmátaringuejnái! Chi babose yocai nanique, mu bapesute gajnarenguipísi uté u uje e que yujnusínangopo yocai uté rĩ. Uhua u uje bapésu yoquijmátaringuéone nanique.
Igarubidaté chojninga:
¿Jé gotíguipie uje yujo casidé gata ore cho jõro ome caratai? ¿Jé gotíguipie uje yujo casidé gata ore cháguena cucha urõsódatéi uñai gai?
Jé yirasiguipise yocurásai cojñoque imocarãque Luis uqué uje nóna Acácomi diríca, enga u uje chinguíra Acácomi yui cucha urõsodaté. Chinguíra Acácomi yui cucha urõsódatéi aja jnumi ome daboca.
Yirasiguipísi upo yape uñai Dejabi uqué rĩ uje chinguíra cucha urõsódatéi ¡túgaja! jnumi durasede. Uñeque chinguíra cucha urõsodatedie uña aja jnumi ome dajorane ore que.”
Jé upo rĩ ga “dutué a pita,” Ijniminaté uaqué, doi ga irasiguipise dabai, yájnape Ijniminé uqué.
Igarubidaté catecã́ri caratai:
Jé upo ga qué bajéo jeta yugúsiji yebiédatérigui rĩ ome ‘jnu upo’ dequedójnari.
Igarubidaté chojninga:
Yájnape Acácomi uqué átedaté uqué ome cucha urõsodedaté uaqué.
Igarubidaté catecã́ri ‘dirábia’ enga chojninga:
“¡Dirábiá! aguitóji gadoi iji duruñeque ga chugúpẽre-chagúode jĩraque tagu uté arione ga ore chijnime pujnúone ga ore chisi ñane iji uje chajningarásaja dejode.
Igarubidaté chojninga:
“E yininapúsu tupo ‘pojnátique’ yape rĩ, Dejabi ore. ¡Urénga, jé ore pésupúsu yininaquéode! Uje ore chinguíra cucha urõsodaté aja jnumi.”
“Jé yajire yu ome yájnatigo jnacare ore que, uje yirasiguipise yájnami Daturájnai, Luís ore gachidode tamoco ome cutejmane ore oráso uje ore chujé carataque-chagui uqué.”
Yiya jne.
Igarubidate – Campo Loro, Paraguay – 1988.
Marina de Morarie churúsãre Igarubidaté igoriguéode nanique.
