Aliciadé Iradedie Quigode
Guibéjnané chojninga: Alíciadé chijñecáriji – chijñecáraja daquesugode bajutase: chedo dajesudie diyequé quedéjna:
Aliciadé chojninga: “Yiabi yaquesugode unojo enga yijñecáraja. Yedobu yajesudie diyequé quedéjna.”
Guibéjnané chojninga: Alíciadé pota ore jnese gu, gapudie. Chajuque dajei ome ore:
Alíciadé chojninga: Yo jóroque cucha pajugúguiji yu, yajesudie diyequé ore jõ. Yipetique nóna ore jnese jõ. Yipetique nónarása yijnamía (mi hermanita – yĩcarai u ome yacoté). Yuhécha uñeque nónarása yimochade. Yipeque uñeque canárase iji gaté yui.
Guibéjnané chojninga: Alíciadé chopo chugúpẽre chóguiji re rĩ ome Ipesudídatábia:
Alíciadé chojninga: Yopié chugúpẽre chóguiji yu ga yajna. Enga yimochadé ore iji quigode erãpe jõra.
A yimochadé chajiriráse dajei gajnerĩ mu chimo yu iji. Chojningame daté: “Ité á, Ocoroi u. Déji dajei iji ti.” (Nota: *Aliciadé i u Ocoroi uje jnacare nanique, enga cáma abode cuse.)
Mu yimochadé a narariráse enga chojninga: ‘Ocoroi á, ¿gotique bãri? Uje que acasipísi rique uñéngome bacoté casodica ore a?”
Yichajnai ga yojninga: “Mu bamo uje acho yiyaridedie edoi enga yajna ua.”
Guibéjnané chojninga: Alíciadé chopo cucha chóguiji re aja garáijnane.
Alíciadé chojninga: Yopié chugúpẽre chóguiji yu. Yiyója garai casodicai jõ. A yiyo ga yibasirásaja yijnamía.
Guebéjnané – Tobité, Bolivia – 1960.
Joyce Davis Buchegger churúsare Guebéjnane atatagode udojo nanique.
