Oidábiadé Chatata dadode
Dacasuté yu iji monte nanique:
Sijnaque yu ga ore pojna yu ga que yibásiji ore yúode. Ga jiei yugode. Dacasuté yu ga yajneque degúi.
Yaranguipise ome ore. Ga yisagode u yarengone ore.
Pocaningadatei u uje ore chujé ñane iji Rincón tiógarei.
Garaigosode ore dacasuté u Jmanenáquidé. Jnupedogosode ore dacasuté u Rincóngosi Ingoiné nanique, enga udore ore uaguedie ore chujé ore urodie nanique.
Yarengo yoquigode ore gai. Chi ore cṍraja daragapídi ga ore toi, jeoga ore ñona bisidec.
Dejai chojmára ga ore pésu daragapídi. Cojñone yungórone u uje ore tãre gai. Ga dajíroméone que ore doi to. Ayoré dacasutedie yuque cuchade nanique ga ayoré gajnaréngone que ore cási ati ore chujé to. Uje dacasutéraque gajneque degúi ga ayoré gajnaréngone iji cho buru, buru iji ore quigade. Uje yicai pocaningai ga bajáguipísi dacasutedie ga ayoré gajnaréngone ore chácariji yoquiquigade.
Yigode gagájni ore iji Guidaigosode asutedie.
Uje dago yoque ga yacágoja Boliviagosode.
Yibatigai jogadi Engábi u guidábi nanique. Iapade i tu Jomainé. Ité i tu Podé. Direquedéjnagose yacoté dai ga i tu Igoi. Daté i tu Jumuné.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
