Enueidate chatata dadode
Que yiraja yurúrigo mu jé yiji:
Atata uje ĩri iji Tobitéraque nanique. Yetingarape uje Yójidé chijnárase yabode iji yari. Yicagóji de nanique iji Tobité yúode. Taningane ga yicagóji dojo nanique Tobité yúode iji ta. Ga yico cojñone ore iji ta.
Mu ayoré déji jnoringai ga chatata. Chojninga: “A yicode chijna uacabidie jne, disi játigo iji uacari,” chojninga Chané. “A codé chijna uacabode jne, disi játigo,” chojninga.
Ga yitodógo ore yúode mu ca yitodógo ore go uje ore chijna disiode, disi jádode.
Ore chaco itarapérique Dequerai gai, mu cachi ore acógai. Yicoi uje dóji ti guedé. Guedé doi te uje idája uje yico. Mu chayóna ore, Chané, ga chijna poca.
Dacode chi chojninga: “Acho jne á jeta quejna om ua.”
Yibidi. Yojninga: “¡De ti é! Chicho uaque, Dequerainaté é!” yojninga.
Ga yico. Yicagóji dojo. Ga anire, yicoji ta, degúrase ta. Mu cho ta degúrase ji de.
“¡Chané e diapo rĩ é!” ore chojninga. “Ajíñome yoquiga casodicaite gáyode ome eduguéjnai.” Ga yico.
Yisago yocugúchade. Yico garai ga yimóngo iji ta uje guedé jno. E dejac uje yimóngo iji yoquirengúi. Chaguhei chejnapise yoque. Jnanione chachẽre dati múñi que yajo cuchárique. Yico garai údi mu ore chojninga: “Burai ducoré chacose á.”
Yidogorodíe põ rĩ. Mu ore chacose que uje ore pógu iji te yiquigade.
“Angoño yu ga yijína ore que á,” yojninga. Ga ore chacáji ta. Mu cojñone iji ta ga ore chojninga, “¡Boyo!”
“Ore chinguirarása Ijmai yoque que a. Ore chinguirarása poca iji Querúidé,” ore chojninga.
Ga yacágoji ti. Yajéngome cojñone. Mu uñai chise yoque iji toniñeque iji tie. Chajna tie tiji jnumi iji ti yoquiquei.
Ga chojninga: “Asi óriji echode jne, barásade,” chojningame eduguéjnai ome Jnaniné. “Mu asi ome queséode ome. Mu asi ome barásade echoi jne.” E gusu.
Enueidaté – Tobité, Bolivia – 1970.
Marina de Morarie churúsãre Enueidaté atatagode udojo.
