Enuedaté chatata dadode
Enueidaté bijna nanique enga chise yodi iji poridie:
A yicháji yimoringare cuchade aja: Yico nanique ga yijoranie ore jno. Ga Toqué ore, ga ore chojninga: “Ajína ore to jne.”
Ga yiji ga yijína ore. Enga que yajire yijõra Juse gaté enga yajni. Yajni ga anire, jnacarode bajade tṍrai yoque iji ta.
Enga yajni ga ore chijíñome yu uje yajníngo. Yajníngo. Ducosi tagu yóguiji ta ga yitoi. A yo sẽre mu a yiquecapo rĩ. Enga yicṍraja ta. Ga yijosa yedodie aja jnumi. Yĩriji enga yóji yiyojnai iji ti.
Yijócha iji poria tajei. Yicha iji poria tajei enga yóji ga, ga yiji. Yijína yodábi ga chicha poria tajei ga yiya.
Yicáji ti.
Ga yiji yimochádi ga yimóji. Mu dire ga yiji. Yicai de ga ayoré do yu. Yajna yurásade iji ti, móntedie. Yise ore iji ti uje godogape yu. Ga yĩri mu godogué yu. Yĩri iji yurásadie.
Yajire yiquetai mu a toi dúrasede. Ga yajire mu a íjnoque pioi iji dojo. Yajire mu a toi dúrasede. Cachi yiquetaque pioi. Ga yiji. Yedu erámone uje gusu yu. Que yurásaraque erámoro cus. Gusu yu iji erámone ga yedu erámone.
Mu ore eruguéjnane iji erámone. Jé gusu yu uje yitoi diríca gu, mu yiqueta yu. Yajna yurásadie iji erámone. Yĩri ji toniñeque uje godogape yu.
Yujé yocai mu sĩri (español: cojo) mu jé yagu. Yiraja uje sĩri mu jé yagu. Godogué yu gu. Yise ayoredie gajnerĩ ga yijíñome yajuránone iji (español: tapeque).
Ga yojninga: “A yĩri jne iji ayoredie. Ga yĩri. Yise ore irábode cutérone iji te ga yumuña, mu e ore déji yejoi. Ga ore déji yejoi ga yimo ore iji ta, ga ore chimo yu. Yĩríji uque ga yatata uje yimo iji ti oródi mu ore déji ejoi.”
Umaridaté chojninga: “¡Jocha casicaite de a tí!”
Mu oródi déji ejoi. Yibo uje Jusé poji yejode uje edoparé. Yuáre iji yejode. Ga yibo to. Yujnusina yapade enga yibo nanique. Jusé po yejode enga yuáre ga yibo to. Chosõre yu.
Yipísirásiji yiramai. Yĩri Asomedái mu ore chãraque jogadi. Ga Jusé chiroque yu aja dajogadi. Chojninga: “Ajni, ga be baterama jogadi a.”
Ga yuare. Ga yibo to.
Mu chojninga: “Aya. Godogué ua. Ca abo,” chojninga Jusé.
Enuedaté – Tobité, Bolivia – 1970.
Marina de Morarie churúsãre Enuedaté atatagode udojo nanique.
