Betidaté Chatata dadode
Yicháji yuruode to. Anire, Marina gajnecho yurúrigo jne uje yicha yuruode aja máquina to iji de Dupade iguíjnai.
Iyamaque uje ore chaca yedodie iji yodi nanique uje jé gapu yu nanique uje anire, ore tṍra yu aja nanique iji yodi. Ga yiraja uje anire, ore tṍra yu aja yodi nanique mu que yicháji yuruode aja to go jeta yatata yitestimonio.
Mu yiraja uje yangureta Dupade ga yicháji yuruode aja to iji de iguíjnai. Iyamaque uje gapu yu nanique uje yangureta Jesus nanique, uje ore chaca yedodie iji to nanique uje gapu yu nanique. Mu e catadape yu.
Mu gusu uje jé que yanguretique cucha uñeque cuse go, mu gusu Dupade uje yangureta. Yiraja gu uje yangureta Dupade abi to ga e yicháji yuruode to iji de Dupade iguíjnai jeta Marina chudute to.
Betidaté etingaquéode:
Yirajápo rĩ uje anire, jecucha yabode toguebécho. Yabode jecucha toguebécho. A gadioque totígo yabode, mu que yiya go Dupade uruode. Que yiya Dupade uruode go uje yiraja gu uje yangureta Dupade nanique uje ore chaca yu iji yodi nanique. Ga yirajápo rĩ uje yiraja yu iji Dupade.
Jecucha ore naráraja maquina mu que yicháji yuruode aja to go iji de máquina iji iguíjnai iji Dupade iguíjnai. Mu yicháji to iji de. Yiraja yu gu ga jé yicháji to yuruode. Anire, jecucha yojninga: “¿Jé gotique gu a uje que yicháji yurúrigo to?”
Yaropie u uje iyamaque uje ore chicháji yedodie aja yodi nanique. Luis tṍraja yu aja yodi, ga anire, yojninga anire, iyamaque rĩ uje yicatecã́ri Dupade nanique iji de iguíjnai. Ore cana yibai, mu que yangári ore go. Que yangári uaque go. Jetiga yangaránenie jé u uaque uje uacaganáño yibai uje yatecã́ri Dupade. Uacaganáño yibai, mu gusu Dupade uje yangári, que yangári ore go.
Iyamaque rĩ uje jecucha yatoi ũroso rĩ ica ga yatoi ũroso ga, mu que yangári go. Satanas u gu uje pota jetiga yiya Dupade, mu que yiya go. Yojninga anire, yojninga Satanas su uje pota jeta yiya Dupade. Satanas su uje déji yu mu que chacája yajei go. Yojninga anire, a pota gu ujetiga yiya Dupade adode, mu que yipota go jetiga yiya.
Yipéro nanique rĩ mu iyamácho uje que yipota go ujetiga yiya Dupade. Enga yitécu jnumone. Mu que toque go ujetiga cuchárique jeta chátaja yu. Gusu Dupade uje chátaja yu. Mu a Satanas pota gu jetiga yiya Dupade adode, mu que yiya go. Gusu Dupade gu uje anire, uje yangári, uje Dupade u uje yirajápo gatuaque rĩ.
Uje anire, que yicadígui go uje ore tṍra yu aja yodi to nanique. Ga que yiya go. Gusu uje anire, que yugúsiji udojo iji ujade to Dupade iguíjnai, ga yajnai data ga, a gajnui tu. Ise ga Dupade gajnui tu aniri, disi dacabi udojo uje yajnángoji data, ga jé ugúsi de iguíjnai to, que yicadígui go. A gajnúone u disi dacabode Dupade gotic.
Betidaté irasitigade gajnengóri u udojo:
Yirasique yu uje ore chujé tãrara ga cho ujetiga cho disiode uje yoquirasique yocabode yui uje yajnángoji data. Yirasique yui uje ore chujé tãrara. Yisárase cuchade mu yojninga, ‘E yiya jne.’ Yiya ga yajnai to jne Dupade iguíjnai udé. Chãje yirasique yui gu. Gajnui u disiode uje yajnángoji datá ga yoquirasique udé Dupade iguíjnai.
Jé yiya yuruode. E yiya.
Pininaquei irágu yu uje ore chojningame yu: “Bo, ga yicagóji Pangarádejnai Dupade iguíjnai.” (Salmo 122:1)
Betidaté – Tobité, Bolivia – 08/23/75.
Marina de Morarie churúsãre uruode nanique enga cháta Dupade uruode aja to.
