A jé adúcho to yatatagode uje Jnaníne a e chatata:
Yirasique uje uacatijáyome Dupade Uruode iji dé. A yise idai uñane uje que ore doi Dupade Uruode to iji ta guidai, enga a yingo uacajnomei ome ore dirome.
Balaam, gachidi burro ore: (Numeros 22:21-34)
Mu yingo uaque garósi uje chi anire, Balaam gachidé burro tocade ome dachisṍri nanique. Gachisṍri ájningarángome dachidi nanique. Mu gachidi chimo Dupade irótique gate unirísõre iji daquei enga chicai quedéjnai ome. Mu gachisṍri que chimo cuchárique uje áyipie déji dagaidode cucha. A jé uacadúcho to udojo Dupade Uruode garósiode uje ore chacate uagome gu.
Yacajnaquéode u udojo to ome yurásarigo iji Tobité:
Yingome ore garósiode to ica, Dupade Uruode iji ta, mu que ore changureta yu to gotique. Ore chotigase. Ga jnanione uñane chojninga: “Chamo jóroque gotique uje ore chácari Tobité iji yiquei uté. Que cuchárique tṍraji yiquéode,” ore chojninga.
Mu yojningame ore: “Anguretáyo Dupade ga yanguretágo jnese. Uacamóño uje chi Dupade diapo jne rĩ,” yojninga.
Yingome ore aníri, uje chi “Dupade pésu jnumi iji taningai nanique enga jé arajáyo to iji uacacadisórone ore pijnanone,” yojninga.
Mu chi yotigayasórone garipise. Yotigayasórone jõra Ayoi. Ga Ichorai.
Yojninga: “Yipesupu ga ca uacuñeque chejnárengapo iji ejo rĩ,” yojninga. Yapúsaja yuruode ome ore. Mu quigade ga Betidé dosirase Ayoi. A jé arajáyo to.
Mu yicatecãrápoi Dupade iji ore gari rĩ. Yojninga: “Átaja uté gajnerĩ ujeta bajéo ga ecapo gajnerĩ, uje chotigasipise baruode.”
Mu eca. Mu quigade diríca ga yingo garósi Dupade Uruode aja ore mu chojninga: “A jec ũré Dupade cuse jõ. Uje cuchárique chujerase yu,” chojninga, “Ga yitecurásu.” Tecu iji jnumone.
Jnani ditécai, Juan, Pedro ore: (Hechos 3:1 aja 8)
Ga isocai u Juan, Pedro ore uje chi ditécai doi ore uruode nanique enga dique. A jé arajáyo to.
Juan, Pedro chi ore jno. Ore doi Dupade Uruode iji iglésia. A jé arajáyo to. Mu chi ore chise jnani ditécai. Jé uacamóño to jnani ditécai. Chi jé tecurasu. Chi ore chise enga chojninga: “¿Acayóji rique a?” Enga chi chutai ore. Chi chojninga: “Asíome uacaparátarigui ome yu jne.”
Mu Pedro chojninga: “Cho jeta yiparátaraque gotique jõ.”
“Mu que uacaparátaraque cuse ga asíome yu uacabotígo ome yu,” chojninga.
Udore uje yingo uaque garósi, garósi. Jé umári yacajnaquéode ica mu a garósi jé yacajnaquéode iji de ome uaque. Yicatecã́ri Dupade ga, ome uqué uje tecurasu, Betidé, uje uacarajáyo to, Ayoi.
Mu Josédé e areque to iji ujade. E doi Dupade Uruode to. E irasique re iji ujade to rĩ.
Chi ore chojninga ucode, Juan, Pedro ore: “Yisi ome cucha ueradéjnai ome ua jne.” Jé uacamóño to uje jnani ditécai isocai u *Matéo iji guidai. Mu jé tupo rĩ. Chi ore chojninga: “Yisígome yocugúcha ueradéjnai ome ua gajnerĩ. Ga cucha ueradéjnai uté u Jesucrísto i.”
Enga ore ojningai u Jesus ujopié uje tẽrája ore ujetiga ore chiqueta dojode ayoréo. Ga ore chisa jmanecai ga chague uqué. A jé adúcho to jeta ore chacate uagome.
Garósi yacajnaquérigo mu yacaranguipísome Dupade uje a chátaja yoque gajnerĩ. Udore uje ingome uaque garósiode.
Yingo yacajnaquéode udore ome ore ica rĩ iji uta Pailón:
Yingo ore ica rĩ iji uta Pailón mu Dugúidé chojninga: “A jecucha dadi jorónga ome ayoréode yocuñeque – chirajapise uruode to jóroque ja,” chojninga.
Mu uacajnuéño queyibáyode iji de Rincón. Que yicoi Dupade Uruode to go iji Tobité. Yicoi to, yacaco ore, mu gadiógosi ore iji ajei. Jé uaque ga jiei uaque. Gagájnisi ore, cinco su ore iji ujade. Jecucha ga yingome ore mu que ore doi to go. Ore chotigase.
Mu yimeseranie gare iji chequedie ore iji guidai. Yimesera uaté anire, jé uacarajáyo to uje ore chojningame nanique Timingue. Yimeserapise to ga yimesera Eruidaté to rĩ. Yimesera uaté to – Dapuré uje dopísi to Dupade Uruode to. Catecã́ri ome uáguiji de gatuánguiji deréjnane to iji durasedie, dejade ore.
E gusu yacajnaquéode ome uaque:
Garósi. Jiei yacajnaquéode to iji ujade mu e gusu yacajnaquéode. Cachi iyajmaque yu iji gu.
Mu jecucha ajnusínaño Jesucrísto i, uje ueradéjnapise gu. Pujopié déji i to, ga jé cho Pablo urusarane. (Filipenses 2:9-11)
*Mateo u Ecarai, Tomása ore abi uje pero iji dabatigai nanique enga que dique to gotique.
Ipeyai – Rincón de Tigre, Bolivia – 1970
Marina de Morarie churúsãre Ipeyai acajnaquéode
