Uje cáma yirajágo Dupade enga yicoi yoquirósõri Satanas iroquei bisidégode: (Gálatas 1:6,7)
Yingome uaque Pablo acajnaquéode uje Pablo chacate yoc uje chingo yoque uje cáma yirajágo Dupade nanique. Chacate yogome yoquisocade. Uje cáma yirajágo Dupade nanique ga yocajnui tu piroque bisidei uje doi darósõri iroquei bisidégode. Mu uje yirajágo Dupade enga yocajnui e upo anire te rĩ. Cho ujéta Dupade abipise yoque.
Uje yanguretágo Jesus iji ejode enga Dupade chimo yoque enga chiraja yoque:
Jecute Pablo chojninga: “Mu uje e uacarajáyo Dupade iji ejode, ga adi jé u uje Dupade chiraja uaque uje chimo uaque. ¿Jé gotique gajnerĩ a? ujetiga ajníñoja uacate bajade. Ore ate bajade u udore uje ore chetaque Dupade iji taningane nanique. Enga ore chetaque Dupade adode. Ga ore gajnui tu uje que ore chiraja cuchárique.
Mu Pablo chingo yoque uje yanguretágo Jesus enga Dupade chimo yoque to enga chiraja yoque to. Yirajágo ñane, jecute Pablo chingo yoque udojo acajnaquéode.
Uje yirajágo Dupade enga yosṍco yocujode ayoréo to:
Pablo chiraja Dupade, jecuté chosõre dojode ayoréo. Adi u, yirajágo Dupade enga yosṍco yocujode ayoréo to; enga yingongo Dupade uruode aja ñane. Enga yicoi Dupade ate omone ome yoque to. Jetiga yacaco ñane ome Dupade adode, mu Dupade chiraja uje anire, que yirajágo cuchárique, que yirajágo uruode quigode jnese, mu chacate yogome da-Espíritu Santo enga irasique yoguiji jnumi.
Yoquijõrai u Jesus enga jé basa yocai u Dayé to:
Jecute yingongo uaque gajnerĩ uje Jesuse u yoquijõrai enga jé basa yocai u Dayé to, Dupade. Jecute yingongo ñane gajnerĩ uje Jesuse chi gajnui tu yocatoi, uje yocadi chichagáraja ñane iji. Enga uje a Jesuse di ome yoque, enga a yamátago yogaja Jesuse, yocuráguedie aja gaté uje jno yocúdi, yoque uje Jesus cho daoi iji yoque enga yoco yocatoi iji uté. Jecute Pablo chingo yoque unojo dacajnaquéode ujetiga yacaco ñane ome Jesuse adode to. Enga yicoi Dupade iroquéode to gajnerĩ.
Jé ca yajníngopo aja yocate bajade rĩ:
Jecute chojninga: “¿Jé gotinguiringuipíse iji gajnerĩ a? ujeta ajníñopo aja uacate bajade rĩ.” Pablo acajnaquéode u udojo ome yoque.
Jesus chiraja uje petingaraque yoque enga jé u uje yotigáco uru uréone.
Ecarai – Tobité, Bolivia – 1960
Marina de Morarie churúsãre Ecarai acajnaquéode udojo nanique
