Ecarai catecã́ri Dupade:
Yoque Dupade, gusu ua uje baraja cuchade. Jecute yacaranguipis ome ua gajnerĩ ujetiga jé socaseti baruode jũrua iji yocajéode, yoque Dupade. Enga yejnángo yógaja baruode, yoque Dupade. Mu átaja yóguiji guidai, chequedíe, jnanione, uyoc, ujetiga yanguretágo, yoque Dupade. Enga orei yocanguretaretigai tiji yocajéode enga ca yucutágome ujetiga yicatecãcoi ua, yoque Dupade. Yoque Dupade, yicatecã́ri ua ome cuchade jnese uje yajo uje gusu ua uje posõraque ayoréode, cojñone yóguiji erámi ome betotiguei. Dupade, cuchiyi tu ua ujetiga basi ome betotiguei tome yoc. Dupade, átaja yoque gajnerĩ enga yuchẽco yocáyipiedie angoninguinone gáyode ome baruode iji gajnerĩ, yoque Dupade. Yirajágo uje baruode chojninga: “Gosi ujetiga cutame yuruode, jeta cutame yu iji ujade a yipogáji gosi te jne,” baruode chojninga. (Apocalípsis 3:16)
Jecute yicatecã́ri ua ujetiga apésu yoque iji ne gajnerĩ jne enga yoquicatecarãitigade unéraja bajei ujetiga ca cucha gajnarétique déji. Jé basa baruode chojninga: “Ujetiga gosi chimesa cuchade aja ñane enga a yipogai jne jetiga chimesa cuchade.” Jecute yicatecã́ri ua ome cuchade jnese ome bajnacari Jesus i. Amẽ.
Ecarai chacate yogome Pablo icatecãraitigade ome Dupade:
Que yajire Dupade uruode gotique ujetiga yingo uaque, mu yajiri u Dupade ojningane cucha. Ojningane u uje Dupade anguresṍri jnani bajai San Pablo u uje chojninga uje chi catecã́ri Dupade ome re ujetiga Dupade chiqueta ejnaréngone. Mu chi catecã́ri iji dirode ga gadióguiji deréjnai údode.
Mu diga Dupade chudute icatecarãitigade. Chajnai uruode, enga chojninga: “¿Gotique gu a uje jecucha bacatecã́ri yu?” chojninga. Cachi que Dupade chisi ome etotiguei ome gotique.
Ujetiga uaque gosi chejnáreque re jne, jeta yocuñeque u uje chejnáreque re, mu Dupade ajegaite gosi, yocuñeque, ejnaréngone gu ujetiga gaidi tu ujetiga ca chajirápo erámi jogonórone cucha iji erámi uné.
Jecute San Pablo chojninga: “Yoque Dupade, ¿gotique que bei yicatecarãitigade ome ua uje yicatecã́ri ua gatuac jetiga aqueta yu?”
Mu chojninga: “¿Gotique gu a uje cachi ca yijnoraquei cucha gose ome ua?” chojninga.
Uacamóño uje cojñone chujérase Pablo, mu Dupade chorei quedéjnane ome ore, Pablo. Mu chiraja unojo enga chojninga: “Jec ũré. Ise ga Dupade chiqueta yu jeta chãraque yu ome cojñone. ¿A yiyárase Dupade enga yicarási quedéjnai ome ore?” chojninga.
Mu jé ũrepise Dupade uje a ayorérique ijõre aja Dupade uruode iji danguretaretigai. Mu iji dáringai ayoré ijõre enga jé cha dáringai ijõre ome Dupade uruode. Que chise Dupade uneratiguérique go.
Jecute aniri, San Pablo, que changureta Dupade to gotique iji taningane. Enga a chirase re; a chijnóra dáringai ayoré ijõre nanique. Ujétiga changureta Dupade iji dáringai ayoré ijõre enga jé Dupade chigarúrasu iji.
Jé uacamóño uje Dupade chetaque Pablo isijnaringuéone uje doi Dupade anguresórone, ga chejna Pablo edodie. Gaidi tu jeta changureta Dupade. Mu quigade enga jé etoque mu Dupade guetesórone ore chaquesu údode enga chejnáreque ore aquesupídode urõsoringuéone uje chiraja uje que Dupade gotique. Mu chojninga: “Ise ga, jec ũré,” chojninga, “uje a ijõre yu, enga a yirasirase yijóningane ome Dupade. A yirasigode urásu erámi jogonórone cucha, ga e yiya Dupade enga yicai quedéjnane ome,” chojninga.
Mu Dupade uruode que uruode qui u gotique ome yoc ujetiga ijõre yoque. Ujetiga ayoré ijõre ua enga angureta Dupade iji báringai ayoré ijõre, enga jé ca etaque ua ome Dupade. Mu jé ũrepise Dupade uruode unojo ome yoc uje a yocuñeque a yirase yúringárique ijõre enga a jé yiya Dupade. Yicai quedéjnane ome.
Mu Dupade uruode que qui u go. Dupade uruode qui u uje chojninga: “Ujetiga bajogate báringai ayoré ijõre enga a jé ca ajé Dupade uruode iji báringai ayoré ijõre,” chojninga. Enga a ejnaretaque ua iji Dupade uruode gánique enga jé ca etaque.
Ecarai chacãra dacajnaquéode aja Ezequías icatecãraitigade ome Dupade: (2 Reyes 20:1-11)
Ocoi Dupade anguresórone unojo ore uje ejnaretaque ore. Eduguéjnane uñai u uje chojninga: “Dupade á, que yicatecã́ri ua gotique jeta aqueta yu, yicatecã́ri ua gu ujetiga yitoi gajnerĩ,” chojninga. “Ujetiga yise bedai te ga, que u gotique ujetiga yitoi gajnerĩ iji jnumi udé. Ajnusina gu uje,” chojninga, “uje que yãraque yejórique ome yurasade ore nanique. Ajnusina yu uje jecucha yisi yurasade ore iji yibose gajnaréngone,” chojninga. “Que yicatecã́ri ua ujetiga aqueta yu,” chojninga.
Mu cho dáyugu re. Doi daguíjnai ajidé ga moji. Chujé raja daguíjnai ajidé. E chapu re gu. Mu Dupade a gaidi tu, ome yajéode, ujeta ca chirase rome Dupade rĩ. Chi doi ga chuningame eti Dupade uruode chise enga chojninga: “Bacatecarãitigade chise yu iji gatajnoquei,” chojninga, “mu a ca yirógape pitoringai taja ua gotique,” chojninga, “a qué yorepe sequeredie tiji bei te enga jetiga sequeredie chejna yirídai tiji bei te jne,” chi chojninga.
Dupade tangári yoquicatecãraitigade ome re mu pésu dájegaidode ome yoque:
Enga jé ũrepise uje a yocuñeque potapísa cucháriguiji Dupade. Dupade ca ajéode u, ga ca Dupade chisi ome yoque go. Que chojninga gotique: “Dupade, aqueta yu. Yi baroquéode jne. Dupade á, ãro yejnaréngone iji yúdode. Enga yi baroquéode.” Que uruode u gotique. Chojninga: “Yoque Dupade, yitoi gajnerĩ,” chojningame, “ujetiga jec ũré uje yangureta ua,” chojninga, “ajnusina yu gajnerĩ jeta ibágui jnaropie,” chojninga.
Mu Dupade chosõre icatecarãitigade ome, enga doi ga qué chécãrapo sequeredie iji yui te. Sequeredie chi a gagájni iji ayoréode yúode. Mu qué chorepe sequeredie iji yui tenga que úringai jnacare chirajápo gatajnoquei te rĩ enga que gaidi tu ujeta Dupade qué chĩro ejnaréngone.
Ecarai chacãra dacajnaquéode aja Maria, Moises urẽja: (Número 12:1-4)
Moises nero chojninga: “Achopise uje yocurasade ore tangárosi yajábi uhua,” chi chojningame Moises. “Iyajmaque ga yingo yurasade enga que yangácopoi ua jne rĩ,” chojninga.
Mu jec ũré ujetiga Dupade anguresóri déji ujetiga ore chacho. Ujetiga ore nína jnumi jeta ore chetaque yocuñeque, Dupade anguresónique, Dupade uruode jnungónique, ga a ore chacho acajnaquéode. Ore chacho uje ore urasade ore tangári. Mu jé socaseti Dupade chimo goto etétigade, jeoga gosi etétigade.
Jecute Moises nero chojninga: “Yachopis uje yurasade ore doi Moises iroquéode,” chojninga. Mu Dupade chimo, chudute uruode ome uraque dajai enga doi enga chumute pugorodie iji gai.
Dajai doi ga chichai guesi tiji uraque darengúone. Gusu iji ijnangununie.
Ga jnusina uje chi chojninga: “Yuninángorone a e ipesute yejnaréngone,” chojninga. Yuninángorone doi ga tṍra yu aja guesi tiji ore iguíjnane. Chi chajuque ijnangununie aja anírone, dachojmaringane.
Mu ujetiga jec ũré jeta yanguretágo Dupade ga ca acho Dupade ujetiga acatecã́ri. Jé ca barúrique chamáña aja Dupade. Dupade uruode chojninga: “Jé ca urase jeta o Dupade iji ua,” chojninga.
Jecute una cho darúja dajai te, mu Dupade cho darúja uaté. Doi datéringane uje gusu ijnangununie ome mochádode.
Enga yoque gosi ta adi tu dirome ujetiga gosi cho jmiti-jmiti ome Dupade, enga ga gosi chajuque Satanas uniri jogonórone cucha anírone, dequejnarécho.
Ujetiga angureta Dupade enga, yirajágo uje yanguretágo Dupade. Mu Dupade uruode qui u uje angureta enga jé ca bei ga adojnóngápo Dupade quigánique rĩ.
Jecute Dupade uruode u uje chojninga: “Gosi ujetiga dojnóngaja yi te ga dojnóngaja yu ome cuchade yui te ga, uté gosi tu uje chejnáreque re jne,” chojninga.
Jecute yingo uac unojo uje jé uacamóño uje e gare uje yingome uaque, jnanione uje ore chejnáreque re, ome Dupade Uruode.
¿Gotique gu a uje Dupade que chisiome yocutaidode cucha ome yoque?
San Pablo u uñai. Uqué eduguéjnai upo uñai rĩ, uje chejnáreque re ga catecã́ri Dupade mu que Dupade chetaque atique enga Dupade qué chorepo sequeredie gaté iji yui rĩ.
Jé basa uyoque ga a yocuñeque catecã́ri Dupade gajnerĩ ome dejnarétigo. Catecã́ri ome dapotigátique cucha mu Dupade que ajéo ga que chisi ome gosi go. Mu gosi e dojnóngaja Dupade uruode ga Dupade chojninga: “Yirajade u uje qué yirodirase,” chojninga.
Dupade chi uqué icatecarãitigade gajnui tu quesei tome Dupade. Uje uacamóño uje qué yocuñeque catecã́ri ome cucha ueradéjnai jeta Dupade chisi ome yoque mu Dupade chojninga: “Úngare, ise ga yisi ome ua enga aníri, a arasirase ua aja guesi gaté rĩ,” chojninga.
Ga Dupade gajnúi tu jnanione uje disiode chijna queséode. Ore datedie charángome ore uje que ore chiraja dasocáringome. Ise ga ca déji siñeque chequéraque jeta ca chaquĩ́ra datígome quesei docoritique.
Ayoré chijna quesei ga goto chojninga: “A qué chaquesu ua gajnerĩ.”
Mu abi que tangári enga chaquesu dajmanéro. Chaquesu datique ga daté chajotase jnumone. Chojninga: “Bamo uje yingo ua diríca. Que adute yuruode.”
Enga Dupade a uruode jé u to. Dupade a chisi ome gosi ipotigátique cucha ome gosi jeta gosi ipotigátique cucha ueradátique enga cha Dupade enga, Dupade chojninga: “Yiraja casode.” (Salmo 106:15)
Jé uacamóño San Pablo. San Pablo a Dupade chisírasome etotiguei tome enga a charásu Dupade enga chojningarása: “Yiraja casodica uje cha yu,” chojninga. (2 Corintios 12:7-9)
Jecute yingo yoc ujetiga yujnusinángo uje Dupade que jĩrique chisi ome yoquipotéode cucha ome yoque gotique. Que jĩrique chisi ome yoquipotéode cucha ome yoque uje qué chinóninga yoc ujetiga jec ũré enga yanguretágo. A gosi, yocuñeque, catecã́ri Dupade ujetiga chojninga: “Asi ome yiguidérigui ome yu ga ueradéjnai. Jé asi ome parátadie ome yu ga ocoi.”
Mu Dupade timíninga icatecarãitigade aja ajidedie. Ujetiga jé ũré gosi ome jeta doi Dupade ojningane cucha, ga Dupade chisi ome gosi ipotigádode cucha ome. Jé basa gosi te enga a gosi todo aníningo, daguidé áimeringui ome Dupade uruode ga que chutai Dupade iji cuchárique. Que chutai iparáta. Que yutai jeta chisi yibotígo jeta chisi ome yiguidedie ome yu, mu Dupade chimo uje udé chijna iyoite ga, jé a chojninga: “A yisi ome jne,” chojninga.
Jé basa gosi a doi Dupade iroquéode mu que gaidi u ujetiga doi Dupade iroquéode, mu gaidi u ujetiga Dupade chisi dagúcharigo ome. Enga Dupade chojninga: “Ise ga yisi ome ipotiguéode cucha enga a jnorase dádi,” chojninga. “Ise ga yisi ome gaidode cucha enga chãra re ome yu,” chojninga.
Jé uacamóño uje ocoi Dupade anguresórone iji erámi iji gajnerĩ, diri unojo, uné ore cho jmiti-jmiti ome Dupade uruode. Ore chacho uje Dupade, ore catecã́ri Dupade ome ore ipotéode cucha mu Dupade que chisi ome ore. Mu Dupade chiraja uje cachi ore icatecãraitíga, cachi ore utaquéo. Enga que chisi ome ore go. (Santiago 4:3)
Jé uacamóño uje ore chojninga: “A déji toniñeque ome Dupade.” Mu Dupade que chicadígui go. Ocoi Dupade anguresórone uje ore cha Dupade, mu Dupade que cha ore go. Ocoi to uje ore cho dabotígaja Dupade uruode enga ore tagu, enga ore chajo raja uje ore chajire Dupade uruode. Jé ũrepise ore anguretaretigai te gu.
Jé uacamóño uje anire Dupade iminingate danguresórone aja erámone. Timíninga danguresórone aja jnumi gu ujetiga chajire ejode. Jecute yingome yoc ujetiga anóningacho to ujetiga apota cucháriguiji Dupade enga acatecã́ri bayé Dupade. Enga aya bojningane uje bojninga: “Dupade taque. Taque uté ga que chisi ome yipotigádode ome yu.”
Mu jé ca aya bangome ua ome Dupade. Jé chajire jeta jec ũré ua aja bapotéode cucha ome Dupade iroquéjnai. Yadi u nanique uje yipota jeta yi Dupade iroquéode, mu chise gójni diri uje yiji Dupade uruode.
Enga Dupade uruode qui u uje chojninga: “Gosi ujeta cutame yuruode, uté anguretaretigai areredaté iji ajei tenga e chósi ti ome yuruode,” chojninga.
Ecarai cho dojñame jnanírique uje choru cucarani enga chijna Dupade uruode iji dajmáinie:
Mu jé uacamóño uje ugúcoi jnumi, Satanas uniri te ga, ueradi tu ujetiga Dupade anguresórone ore nóna ñane aja quedéjnane. Déji erámi uje Dupade anguresórone ore cṍra. Mu ore chaguepo rĩ uje ore jnusina danguretaretigai iji Dupade.
Jecucha yingome uac uje cojñoi jnome gatajnoquei uje Dupade anguresórone ore cho quic uje ore chojninga: “Ese cucaranone udore enga ese guesi enga ca amóji gajnerĩ,” chi ore chingo. Mu chise gójni ta enga íjnongosi ga etarudabode íjnongosi ga doi ga moji ta. Doi ga noñome Dupade uru casodica iji jnumi.
Mu Dupade uruode qui que u gotique jeta yocuñeque mo ga noñome Dupade uruode iji daquigade. Gosode que chajnésare daquigánique.
Chi Dupade anguresṍri tuqué jno enga chise ore gaminone. Jé jnusina uje ore gaminone u unojo. Moi ga noñome Dupade uruode iji jnumi. Chise toniñeque enga chojninga: “A yi ome Dupade uruode iji durasé.”
Que chajniapo gai te rĩ. Mu Dupade uruode que qui u gotique jeta yijíñangome Dupade uruode enga diyajmaque jeta yajni to gai iji toniñeque rĩ.
Ecarai chacate yogome Satanas etingaquéode quigode:
Chise gójni ore gaminone ga chojninga: “Ore gaminone u unojo uje yujé caratai tiji diríca.” Todo caratedie ga chajniapo aja ore quigade rĩ. Mu Dupade uruode que qui u go ujetiga yitodógo caratedie.
Caratedie u Satanas anirone etingaquéode ujetiga Satanas chetingare gosi te ga chicha caraté taja gosi iquei. “Caratedie chãraque Dupade idai yui. Que yicai to jne,” chojninga. Mu gosi que timíninga caratedie ome ore patarane ga gosi chajo raja uéchade enga chise gójni uechamitodie. Enga unojo u uje irajágo uje Satanas etingaquéode porójna iji jnumi.
Enga yocuñeque a timíninga unojo Satanas etingaquéode unojo. Uaque gosi e chicadígui Dupade uru casodicai iji cucarani ójodie.
Jeta angureta Dupade enga etingare Dupade uruode to. Jé socaseti yiquérango iji jnenga yingongo Dupade uruode aja ñane iji de jnumi iji yoquidai.
Mu yacaranguipis ome Dupade uje Dupade uruode iji darujna aode ojningane cucha déji jnese. Yimeserane cucha déji jnese rĩ. Ujeta uaque gosi chetaque datígome Dupade enga angári Dupade uruode iji darujna arone ga jiei enga a ese jne Dupade guetétigade iji. A ese Dupade imeserane cucha jne. Enga a ango bayé Dupade enga Dupade chĩro basijnaringuéone. Dupade uruode chojninga: “Gosi ujetiga pocaningane, cojñone, ayoréode ore yuguébeque, mu que yi ga yojninga: ‘Acai uaiti. Yetaque ua.’ (Juan 6:37)
Dupade chi jé chĩro ayoré jocaratade ore isijnaringuéone. E chĩro pitoringai tiji dei te rĩ. Jecute yirajágo uje Dupade uruode udojo ga que cuchárique sue gai go. Jé uacamóño uje chi Satanas chingo raja Jesuse gai uje toi iji aniri, uje ore chijóchame. Mu que jnusina gotique uje Jesus chojninga: “Yitoi to marínga, a díningo gadióguiji yúode ujetiga yiquecapo jne rĩ,” chojninga.
Ga unojo u uje yirajágo uje Dupade jé sue cuchade unojo gáyode. Jé sue basijnaringuéode gáyode. Jé sue erámi jogonórone cucha, Satanas uniri jogonórone cucha gáyode. Jé ca ojninga ujetiga apésu cucha gajnáreque datérique, mu jé ca ojninga, “Ajengopísome Dupade. ¡A jé ca Dupade chĩrorase yisijnaringuéone jõ!”
Uje jec uje Dupade chimo Satanas iji ujnacari itoringai iji ujnacari ode enga ecapo rĩ. Chi Jesuse uté jnome guesi enga jé chicai jnaropie ujetiga qué chingo Dupade uruode aja ore iji uté rĩ. Chise jnaropié te uje chicai yoque. Ga chi guejnanie dire guejnanie ayoré gare iji jne uje Dupade chimo ore uyoque iji erámi uné. Ga unojo u uje yirajágo uje Dupade sue cuchade jnese gáyode jnese. Ca ojningame bapesutique cucha daté: “Dupade, ise ga ca ãro jóroque uqué enga que yingo ua.”
Quene yĩri iji ayoréode, uje ayoréode marínga, ore ájnigai, ore ajningaméone e déji ore ajei te ga, que ore doso yu ome anire gotique, cojñoque idaidatei, pocaningárique cucha. Ore ajéode u jeta ajningamei e sue dagaitique cucha gai.
Ga cuchiyi tupúsu Dupade uje etingaquéode, uje chetingare re ome ica enga ocoi. Jé uacamóño uje Dupade anguresórone urasade chi ore déji yote quedéjnane. Chajni to uñéngo. Jé ore chajuque gu diri eruei iji. Ore doi pocaningane enga que ore umajósorone sue ore gánique gotique. Ore chajuque arenie mu que ore cajnóriji gotique. Ore chajuque anírone erãpe tarégode, mu que ore cajnóriji gotique uje Dupade jé sue cuchade unojo jnese.
A yiguíjna cutérone yúode ome ore yui, enga Dupade jé chamorase cutérone ore gáyode. Yiguíjna dosipéode ome ore yúode enga Dupade jé chore dosipéode iji ore. Enga yirajágo uje Dupade jé sue cuchade gáyode ome ore jnese. Sue pocaningane gáningo. Sue pisijnaringuéone, poriquéode ore.
Jé uacamóño uje chi Dupade jé chi chetágapo uje chi ipesute cucha datéode rĩ, mu Dupade doi ga chiqueta ga jé chichapo iji diri rĩ.
Ecarai chacãra dacajnaquéode aja cheque uje i tu Dorcas:
Chi chequéraque déji uje i tu, mu que yiraja i. Cojñone uruode qui u ayoréode yocuruode qui uje ore chojninga Erámoro (Dorcas). Chi doi ga urasade ore jnusi uje toi. Ore jnusi ate goningane. Ore jnusi picaniratiguéode. Mu Dupade doi dajopié ga chutõri darógode uñai tome enga ecapo rĩ, enga yirajágo uje Dupade sue cuchade enga sue pitoringai gai. (Hechos 9:36)
Ecarai chatata jnacari adode ome yoque uje i tu Eútico:
Chi jnacanique basíji guiguíjnai porójo iji toniñeque, mu Dupade chiquetápo ome dajopié te ga, jé u uje ecapo rĩ. (Hechos 20:6-12)
Enga unojo u uje yirajágo uje Dupade jé sue cuchade gáyode jnese. Gosi ujetiga ca pota Dupade chĩro gosi isijnaringuéone, jé ore uru patáringane enga gosi chojninga: “Dupade cachi urúo. Jecute que chĩro yisijnaringuéone go.”
Mu gosi tu uje que cha dasijnaringuéone ga uté gosi jé chajo raja dasijnaringuéone, dangoneparitigade ome Dupade, enga Dupade que pésu cucháringome gotique.
Dupade uruode u uje Jesus chojninga: “Gosi ga tibágui yu enga ca yojninga: ‘Acai uaiti jne. Que yipota uaque gotique. Sijnaque uaque gu.’” Dupade que chojninga go.
Dupade uruode chojninga: “Piotiguei tu uje gosi chingo dasijnaringuéone aja yu,” chojninga. Uje yingome uaque uje Dupade uruode qui u ujetiga yátago Dupade Uruode aja ñane. Ua ujeta etoque ua iji Dupade uruode enga ango ua aja Dupade anguresórone jeta ore chátaja ua. Ore chijnapo ua aja Dupade rĩ.
Gusu unojo uje yo quique Dupade ojningane ome yoque iji durasei, mu yirajágo uje Dupade uruode que íjnoque gotique jeta gosi pota Dupade uruode. Enga gosi pota chĩro dadode jeta ate gajnarétigo ome yoc, déji jetiga Dupade chátaja yoc.
Qué déji San Pablo pijnani uje chojningame Coríntiogosode: “Uacarasade gotígo ore cha dasijnaringuéone jnenga. Que yugúsi uacari to mu e yĩro ore isijnaringuéone ome Dupade ujopié.” E gusu.
Ecarai – Tobité, Bolivia – 1960
Marina de Morarie churúsãre Ecarai uruode
