Ecarai catecã́ri Dupade:
Yoqui-Dupade Dios, yacaranguipis ome ua, ome baruode iji deréjnai tuné. Átaja baruode aja yoque gajnerĩ ga quérã iji yocúdode gajnerĩ, Yoqui-Dupade. Ujeta jec ũré yanguretágo ua enga baruode déji yocajei, Yoqui-Dupade.
Yacaranguipis ome ua ome baruode uje chingo cuchade ome yoque jnese, que cucha amínique cus jeta ca chingo yoque.
Jecute yicatecã́ri ua iji gajnerĩ. Yingo yu aja ua ujetiga átaja yoc iji gajnerĩ, enga yicatecãraitigade unojo chise ua gajnerĩ, ujetiga que cucha gajnáretique déji, Yoqui-Dupade. Jé basa ga cucha gajnáretique déji enga yicatecã́ri ua ujetiga ãro. Enga ichapise yicatecãraitigade ome ua, Yoqui-Dupade. Uje baruode chojninga: Dupade Ujopié chátaja yoque. Uje que yirajágo yocuru quitique ujetiga yicatecãcoi Dupade, mu Dupade Ujopié Espíritu Sánto doi enga catecã́ri Dupade ome yoque. (Romanos 8 :26-27)
Átaja baruode aja yu gajnerĩ iji deréjnai tuné, Yoqui–Dupade, guedé jnoringai tuné, Yoqui-Dupade. Ujeta yiraja quitígo.
Yoqui-Dupade, icatecã́ri ua gu uje que ayoréode, jnanione, jé u cojñone uyoque jnese que yirajágo cuchárique. Mu, Yoqui-Dupade, uhua u uje bẽrate pirajatigai tome ayoréode, banguresórone uyóguiji eramone. Jecute yicatecã́ri ua ujetiga asiome báyuquetotiquéi tome yu ujeta yiraja baruode quigode.
Yoqui-Dupade, yacaranguipis ome ua iji gajnerĩ uje jé ijõre yoguiji Tobité uje yoquibosode ocoi iji Tobité. Chamáñaje utagóji ua gu, Yoqui-Dupade. Chamáñaje ingongo yóguiji ua gatuaque jetiga arodipise yóguiji guidai. Que gusu iji ne gajnerĩ uje yingo yoc aja ua, Yoqui-Dupade, jé u iji dirode uje qué chicáji yoquíode, sequeredie uje qué chicáji yoquiquéode. Que yirajágo baríringárique gu. Jecute qué yingongo yógaja ua iji dirode jnese.
Dupade, icatecã́ri ua gajnerĩ ome dínique dirome ujetiga soca seti ocoi yóguiji baruode jeta yingongo yógaja ua, Yoqui-Dupade. Mu que gusu jetiga yicatecãcoi ua jé iji dirode jnese, Yoqui-Dupade, jeta asi ome petotiguei tome yoque. Asi ome picaniratiguei tome yoque. Aroque yógaja baroquéode ome baruode. Yicatecã́ri ua ome cuchade jnese ome bajnacari Jesuse i. Amẽ.
Ecarai e chacate ore:
Yajirigode u Dupade Uruode que, uje Dupade Uruode chingo yoc uje chi ayoréode uyóguiji erámi jnese uje yipéco yocajéode ome cuchárique yúrique enga unere yui ome yoque, enga chi yocadi tu ome Dupade Idai ujetiga Dupade ga di iji jnumi.
Jé u uje Dupade Uruode chingo yóguiji ne uje Isaías chingo yoque nanique, jnani bajai, uje chi a chimo Dupade, churúsãre Dupade ojningane cucha. Jecute chingome yoque. Chojninga: “A cojñone iji erámi jnese, ayoréode iji erámi jnese, a ore pésu dajéode ome Dupade Idai yui te jnenga. A ore chojninga: ‘¡Yico, ga yicagoi Dupade Idaidatei!”Que ore chĩ́care Dupade Idai gotique. Ore chĩ́care ‘Dupade gajnepídi erãpe’ aja. (Isaias 2:3)
Uacarajáyo erámone uje erámi tu anírone ayoréode uyoque yocuniri casodicaite. Mu que ore chiraja dacajnai ome Dupade uniri uje ore chacáji erámi uje ayoré casodicaite ipéco yocajéode ome pibosode jogadode. Uje ore pésu dajéode uje ore chojninga: ‘¡Yico a. Yicoi. Yiraja cucha pibosode pijóningai. Yoquejnaréngone que déji to é!’
Ga unojo u uje chi ayoréode, cojñone uyóguiji erámi chi yécãco yógaja uné erámi tuné uje yucuegoi yoquiquetangónique. Mu que erámi tu unojo gotique uje jnani bajade chucué, udore uje ore chijnóra Dupade. Ore ucuei tu Dupade Idai. Dupade uniri u uje ore pota chécãre rágaja nanique. Enga Dupade uniri u uje yécãco yógaja to iji dire uñeque. (Hebreos 11:9-10)
Unere yui jeta yico gaté enga ugúcoji Dupade iguíjna gateminóri ajei:
Jecute yingome uaque iji durasei uje Dupade Uruode uje yécãco yocatígo ome Dupade adode. Que Dupade isocade u yoquisocade, que jnani bajade ore adode u Dupade adode, mu yajico Dupade Uruode enga Dupade Uruode u uje yécãco yocatígo. Ga uné guedé jnoringai te ga, yajire Dupade Uruode uje chingo yoque que. Chojninga: ‘Yinínapúsu yu diríca uje ore chojninga: ‘¡Yico a. Yicagoi Idai!’
Que Dupade Idai u gotique mu Dupade iguíjnai. Déji aníri Salmos. Mu ise ga ayoréode uyoque yocuruode urásu ujetiga jec ũré yoquirasique yogome eduguéjnane ore ipesudode cucha.
Uje ore chimáta rágaja iji cojñone gari nanique ga a yoquirasiguirase ujetiga yojníjo: “Yirasique yu uje ore chimate re aja cojñone úringane aníri purása.” Mu unojo que uruode qui tu go.
Salmos urusarane uruode qui tu uje chojninga: ‘Yirasique yu uje ore chiroque yu aja Dupade Idai yui.’
Enga yocuruode urásu to. Ayoréode uyoque ujetiga yoquirasique yoc ujetiga jec ũré yanguretágo Dupade ga yoquirasique yógome aníri, ore ojñane ome Dupade Idai yui. Ise ga jé ojningai tu ayoré tu yu, que uyu gotique mu uhua uje baraja Dupade, uje bangureta Dupade. Chojninga: Yo me alegré. Yirasique yu. (Salmo 122:1)
Mu jec u uje ayorérique a chirase daquitique erãpe enga irasique re ome yui. Irasique rome daquerãpe yui. Jecute unojo uruode u uje chojninga: ‘Yirasique yui uje ore chiroque yu aja Dupade Iguíjnai yui,’ chojninga.
Ga unojo jec u uje gajnui jec u uté ica Isaías uje chingome yoque uje chojninga: “Punirone iji erámi údode a ore chamáta ñane enga ore chojninga jne: ‘¡Yico e, ga yicagoi erámi uje ueradi!’”
Erãpe ueradi tu, mu que ore chingome jeta erãpe ga adi tu uné uje yiraja cutérone, yiraja yocade, yiraja cucha pibosode, mu Isaías chingo yoque uje chi gajnui tu cucaranone. Ga chi gajnui jec u uje aníri ujetiga a Dupade uniri turásu cucarani utá.
¡Jõ, a yicorási iji ta ga yinínango yui! Ga ore chacãra uje a yugúcorási ta ga ore chojninga: “¡Yico, yicagoi cucarani iji te ga!” (Isaías 2:3) Ga ore nína yui uje ore chiraja uje íjnoque dequejnaréngone iji gu.
Eduguéjna cuchape Dupade, enga uniri cuse, enga a cho darása iji yoguiji daniri uté:
Ga chi gajnui jec u uje ayoréode uyóguiji erámi yibicoi ñane nanique. Uje Dupade Uruode chiroque yogaja Dupade Idai yui ga ore chojninga: “¡Yico á, Yicagoi Dupade Iguíjnai to á!”
Enga unojo u uje Dupade Uruode chingome yoque uje chi gajnui tu uje ore chojninga ‘Dupade reino.’ A Dupade uniri u jõ.
Que yiraja reino gotique mu uacarajáyo uje cojñone uruode. Yirajágo enga uacarajáyo quigode. Reino unojo ore uruode u uje Eduguéjnai Uniri u. Gajnepite Erãpe tiji dejode enga jé uté u.
Jecute chojninga, gajnui u Dupade Uniri iji ta, cucarani uje que dequejnarétique déji ójo. Uje yoquirasique yui uje yoquiqui tuté enga que yico unerotiguérique. Ga u uné uje yingo yoc uje ise ga yocuruode urásu to jeta jec ũré yanguretágo Dupade.
Cucha bisideque Dupade unire ueradi ome otigayasórone:
Jeque ca yanguretágo Dupade enga deroco Dupade Idai yui ome yoque. Yojníjo: “Iyieja yui jetiga Dupade di iji de jnumi. Iyieja yui jeta yicoi Dupade Uruode iji domíngo.” Chamáñaje yetájo Dupade Uruode gu. Chamáñaje que yanguretágo Dupade ga cucha bisideque ga gajnui u uje que yirajágo jnani ga yoco cucha bisidécho iji.
San Pablo chojninga: ‘Yocacajnaquéode unojo cucha bisidécho, pũrusoringuéone ome anírone, Dupade guetesórone ore iji yoque.’ (1 Corintios 1:18-25)
Enga ise ga jec ũré, a que yipótago Dupade ga iyieja conferencia yui jeta yicoi Dupade Uruode gajnerĩ. Iyieja yui ga iramurase Dupade Uruode iguíjnai tiji yajei. Enga gajnui jec u uje jecucha cucha bisidégode u ga que yirajágo quitique ga suru yocangoninguinone bisidec.
Unere Dupade Uruode yui tome udore ore uje angoninguinone guesája:
Mu gosode uje changureta Dupade ga unere Dupade Uruode yui tome ore ga udore ore uje angoninguinone guesája, ore áyipie angoninguinone guesája to. Ga unojo u uje a yocajnúone u unojo uje Isaías ojningane u uje chojninga: ‘Punirone iji erámi jnese, ore doi ga ore chojninga, ‘¡Yico á! Yicoi Dupade Idai te gá…’
‘¡Ajína yógaja to á!’ a ore chojninga, mu que uruode upúsu mu yocuruode, ayoréode yocuruode qui tu. Uje yijínango taja yui ga yirójo ñane aja. Yirajágo uje jecucha pibosode irágu iji uaque ga que ayorérique betáji. Ga unojo u uje ise ga jec ũré yu, uje Dupade anguresórone iji uaque, yiguíjna yui jeta eso Dupade Idai.
Jé basa ga Dupade guetesórone ore ga, iyieja yui jeta Dupade di ga ca ore chisapo dacaniratiguérique iji de jnumi, jec aja jeta Dupade chajire ore adode aja quitígo. (Hebreos 9:27)
Tito cho dojode Dupade anguresóño ore quique:
Yingo uaque gu uje yocacajnaquéode ucode iji durasei u ujetiga aníri, Títo, Pablo ujnacarabi, que ujnacaripísi mu iroi, gajnui jé u ore ujnacare. Uje chingo anírone cojñone ujetiga ore cha date bajade. (Tito 2:11-13) Ore cha dasijnaringuéone ome dabijnanone ga ore changureta Dupade ga ore gajnui jec u to ujetiga ore chécãre re aja to ome Dupade ojningai ome guidai uje ore chojninga: ‘¡Yico á! ¡Yicagoi Dupade Idai te á!” Ga ore chiraja Dupade anguresõre ga ore chiróque ñane aja Dupade Idai yui.
Que yuchẽco yocangoninguinone gáyode, ga deroco Dupade Idai yui tome Yoque.
Jé basa enga a ca yuchẽco yocangoninguinone gáyode ome Tito, San Pablo, ore gajnúone jnanío udore ore acajnaquéode jne, enga ore chiroque jõroque yógaja Dupade Idai yui. Que yudúco oracajnaquéode ga ore acajnaquéode unojo que chacája yocáyipiedie. Que yuchẽco yocangoninguinone gáyode ga deroco yui tome yoque. Enga ore acajnaquéode unojo cucha bisidécho ome yoc. Ore acajnaquéode unojo cháji yoquibai tuné. Chamáñaje que yanguretágo Dupade ome úringai piquetangore gu.
Mu yuruode qui jé upo rĩ uje, ujetiga jec ũré bangureta Dupade. Yocuruode u unojo, uje chi ore chojninga, cojñone ore iji erámi: “¡Yico á! ¡Yicagoi Dupade Idai yá!” Ore ichorájnai uje ore irasique Dupade Idai yui.
Jé basa ga ore nína yui uje ore changureta Dupade. Enga ore chiroque ñane aja enga jĩrique ore chóji gaté ome Dupade Idai yui. (Hebreos 10:24-25)
Jé basa ga udore ore uje ore chiroque ñane aja Dupade Idai yui, a ore chojninga: “¡Yico á! ¡Yicoi!” Ore uruode unojo chojmára iji jnumi, enga ore nóna Jesus aja gatajnoquei te.
Que uñeque jnusi ñane ujetiga yiquihíjnojo aja Dupade gari iji ne guidai:
Yingo uaque que uje uacarajáyo uje pujnusiétigai jogadi tu ujetiga yoco jmíti-jmíti ome ñane. Jé basa ga a yiquihíjnojo aja Dupade Idai te jnenga, iji Tobité tudaque, ga que yimóngo pujnusiétigárique gotique iji ne guidai. Ijínango ñane aja. Imóngo ñane aja gatajnoquei jnese ga que ayorérique chojninga: “¿Ité, ore casodicaite déji rique a? ¿Iapai casodicaite ore déji rique a?” Que uñeque jnusi ñane ujetiga yiquihíjnojo aja Dupade gari iji ne guidai.
Jé basa ga a que yanguretágo Dupade jnese iji ne jnenga, yocúringane pujuyaque jogadi u ome Dupade. (Juan 3:36)
A yojníjo jne: ‘Yijínango to Jacób ore Angarádejnai Dupade jne.”
Mu yirasique ujetiga yocadi tu jne aníri, jeta yocuruode u uné, Isaías ojningane, jnani bajaque, ore uruode unojo. Que ore urúo unojo mu chi cojñone uyoque yocuruode ome ñane uje chi yojníjo: “¡Yico á, ga yijínango Dupade aja Jacob casé, jnani bajai, ore Angarádejnai! Uje chi di jne ome Isaías edominone uje chimo Dupade uje Dupade chiqueta raja!”
Enga chi ore chojninga: “¡Yico á! Yijiínango to Jacób ore Angarádejnai Dupade uje e di! Yijínango to Yocangarádejna Dupade. Yocangaráni tu uje e di tiji yoque.” Chi ayoréode yocuruode a u unojo to ujetiga Dupade di jne iji ne jnumi.
Que bisitique déji jeta chinoningase Dupade ujuyaquéode:
Jé basa ga a uruode unojo ujetiga ore chojninga: “Dupade e di que’.”
Uje que ore changureta to enga ore chichaga erámi taja ñane. Ore chichaga erámi taja tijode ga pénu ome ore. Uje urasade e ore jnome, e ore cho jmíti-jmíti ome ñane gajnerĩ.
Jecute ore chojninga: ¡Yico á! ¡Yicoi! Yijínango Dupade to, Jacob, jnani bajade ore Eduguéjnai, ore Angarádejnai, ore Iquetangóri. ¡U arĩe, e di!” ore chojninga.
Enga ore nína yui uje e di gu. Enga a yinínango yui to uje Dupade u Yoqueduguéjnai to. Dupade u Yocangarádejnai to. Dupade u Yoquiquetangóri to.
Mu a ca yanguretágo to Dupade enga, a iyieja jõ Dupade diringai yui tome yoque. Iyieja jõ Dupade ujuyaquei yui tome yoc. Que toc jetiga qué ayorérique doi enga tãre aja ga cho pejna aja Dupade diringai. Uje ayoré casodicai chi ore tãre aja, cho pejnac uje todo ore ojñane. Qué cho pejnac, qué ore chiqueta uáguiji, mu que ayorérique doi Dupade diringai, Dupade ujuyaquei ga tãre aja, que cho pejnaque gotique rĩ. Que ayorérique doi ga chubúchu Dupade ujuyaquei ga chiquetápo uñeque iji ome dañáningo. (Su soplo.) Chamáñaje Dupade ujuyaquei tu uqué. Que doi ga cucha uñeque chĩro. Que qué doi ga cucha uñeque chinoningase Dupade ujuyaquei.
Uje jecucha yingome uac uje dequejnaréngone uje ayorérique daijna dequeserane, ga chubúchu ga que uñeque chiqueta daguiotique iji Dupade ujuyaquei. Uñeque ujetiga doi ga tãre aja yúrique ga Dupade Ujopié suqué chicai quedéjnarique ome yoque. Dupade Ujopié tu.
Dupade Ujnacari diringai gajnui u chequé icamasugué:
Chi gajnui tu chequé icamasugué. Uje chequé ica basíji ga que ayorérique doi ga chubúchu ga tãre aja yotígome ga que chaquirãpo ica tiji ajei gotique rĩ. Chamáñaje diringai tu. Que ayoré chinoningase, jeta uaté chojningame jeta chiraja disiode: “Ore idoningayasónique jetiga qué yica chapo ga chejnape guedosíriguiji yajei to rĩ.”
Ga Dupade diringai chi gajnui u unojo uje chi di ga diringai tu, ga que ayorérique doi ga chinoningase.
Jecute yingome uaque uje yoquirasique yui to. Ome yajéode ujetiga Dupade Ujnacari di ga yinínango yui to jne. Jecute yingome uaque que ujetiga anóningacho uje a baruode u to ujetiga a chajnai ore to ujetiga Dupade anguresórone ore jnome gaté. A ore chojninga: “¡Yico á! ¡Yico á! ¡Ga yijínango Dupade uje e di á!”
A yejnángo yógome Dupade Uruode iji Tobité. A yojníjo: “¡Yico é!” Yoquibijnane chojmára iji jnumi ga yico ga yijínango Dupade.
Jé basa enga yoquiguiosode cháji ne jnumi to ga ore pijnanone guesa jõronga aja. Ore áyipie déji dáringai ayoré iji ne ga que ore áyipiedie jnome gatajnoquei gotique. Jé ore cháji de jnumi.
Ecarai cho dacajnaquéode quique ome ore:
Mu yacajnaquéode qui tu ujetiga yicoi ga yejnágo yógome Dupade Uruode. A ca yimóngopo posõraquérique ujeta Dupade Ujnacari di iji de jnumi. Enga yiquihíjnojo aja Dupade gari te, ga ca ayorérique chimo pujnusiétigai ome re. (Mateo 24:14)
Jetiga chojninga: “Yi jne, mu, qué yácare ome yabode ore gari iji de jnumi.”
Dupade Ujopié chijna danguresórone aja ñane ga cho jetiga ore chojmára iji jnumi enga uje ore jnome gatajnoquei ga ore jno jnese. (Romanos 12:4-5)
Ore chejnáreque jõroque re iji jnaropié, mu que qué ayorérique topoi gotique iji uté rĩ:
Jé basa ga a ca angureta Dupade jne enga, bacutaquéode jé jogate ua iji de jnumi. Que agúsi iji de jnumi tudé, mu jnaropié tu uje que qué ayorérique topoi gotique iji rĩ.
Ga gajnui jec u Dupade Idai, que ayorérique toji Dupade Idai gotique. Jé basa ga jnaropié tu uje que ayorérique toji gotique to. Uacarajáyo uje unojo Dupade Uruode u uje yingome uac.
Satanase, urasade que ore toi to go. Mu que ore chise dacaniratiguérique gotique. Ore chejnáreque jóroque date urõsode. Ore chejnárenguipise jnupuchade agupídode iji daode. Ore chejnárenguiji jõroque dayádode. Ore chejnárenguiji jõroque anírone dequejnaréngone isapídode iji daode. Que ore toi go. Ore chimo raque uje godogape ore, ga ore áyipie de jórongui Dupade. Que toc ujetiga qué Dupade doi ga chiroque darótigo aja ga jno ore údi iji dedai.
Jecute yingome uaque ujetiga anóningacho uje Dupade anguretasórone que ore toi gotique to. Enga que ore chimo chaguhéringome re. Que ore chimo ãréraque ome re. Que ore chimo pucutaquéringome re. Que ore chimo motígome re gotique. Unojo u uje Dupade Uruode chingome yoque unojo. (Apocalipsis 7:16-17)
Chingo yoque uje chi ca Satanas, urasade que ore toi gotique. Mu yuruode qui tu ujetiga anóningacho uje ore patíja dáringai ayoré. Ore patíja ome dayaguhéode. Ore patíja ome debiedie. Que ore chise dacaniratiguérique gotique.
Jecucha uacadúcho. Jecucha yingome uaque. Uje gajnui jé u jnacare gárode. Chi uñai toi ga jnome gatajnoquei nanique, Dupade anguresõre. Uñai u to uje toi ga jnome jnaropié, ga chimo yocangarádejnai, jnani bajai iji gatajnoquei. Chojninga: “Yachopise yebiedie é,” chojningame yocangarádejnai, jnani bajai uje i tu Abraham, uje jecucha yingome uaque. “Uñeque chaca dajmanai tiji yodi te ga chutape yarei tiji,” chojningame Abraham. Mu que toc jetiga Dupade anguretasónique qué doi. Satanase, urasade uñeque ga que churã. Uje chamáñaje Dupade Ujopié e jno yocúdi enga que toc jetiga ca ayorérique qué chimánaja yotique iji jnaropié. Uje que chijna dajopie aja ore gu.
Boyo, yico ga yiguihíjnojo aja Dupade Idaidatei:
Jecute yingome uac ujetiga apotáyo ga yiquihíjnojo aja Dupade Idaidatei iji gatajnoquei jne, enga jeta bagaidi u ujeta ore acadisṍre ua, mu yuruode qui tu ujetiga ajína yoque to enga angureta Dupade. Yuruode qui u uje yingome ua, ujeta angureta Dupade enga gusu ujetiga angureta Dupade. Gusu ujeta acota Dupade. Gusu ujeta acatecã́ri Dupade, enga jé gusu unojo. Gusu ujeta ango Dupade jeta Dupade chĩro basijnaringuéone uje Ujnacari Jesuse toi ome basijnaringuéone gu. Enga unojo u uje yingo yoc ujetiga yiquihíjnojo aja Dupade Idai. (Mateo 24:14)
Yico á, yicoi Dupade Idai te á:
“¡Yico á! ¡Yicoi Dupade Idai te á!” Ga yocuruode chojmára ome ñane iji jnumi to, ga jec ũré yicoi gatajnoquei.
Dupade Uruode qui tu uje chojninga: “Gosi uje tibágui yu ujetiga chingo dáringai sijnai iji yu, ga yĩro isijnaringuéone enga yo disi caratáguiji iji quigade,” chojninga. Dupade Uruode unojo. Uje que chetaque yoque gotique.
Jecute yingome yoque to ujetiga yinoningáco uje a ayoré, cojñoque marínga, Dupade que chojninga: “Basijnaringuéone sué babai.” Mu Dupade u uje sué yoquisijnaringuéone gáyode iji yoc. Jecute yingome yoc ujetiga jé ca o báyugu ujetiga ayoré oriechoqui cuchape ua marínga. Jé ca ese Dupade unerotiguérique. Jetiga apota angureta Dupade enga angureta uje qué pirotiguéode déji. A basijnaringuéone jiei diríca, mu Jesus toji bajogadi nanique enga cho udore oré ome Dupade jnese.
Que yirajágo Jesus diringárique dire, mu ueradi u jeta yiguíjna yui ome yoque:
Jesus chojninga: “Que yimo yiríringárique,” chojninga, “que yiraja yiríringarique,” chojninga. “Mu su Yiapade uje chiraja,” chojninga. “A Dupade chague yoquibánique,” chojninga.
Gosi a chojninga: “Cáma yanguretarase to. A yanguretarase to dirome.”
Mu e chague yoquibai enga gosi ajei casodica qué déji ajei. Gosi ipesudi casé jé qué chojmára uje Dupade Ujnacari di. Uje chague yoquibáyode iji dire uñeque. (Apocalipsis 22:7)
Uacadúcho uje Jesus chojninga: “Que yimo yiríringárique mu a yĩriapo jne rĩ ujetiga yimate uacaguíjnarique jne iji Iapade Idai. A yimate uacaguíjnane jnenga jec u uje yajni uacabai iji ne jnumi. Enga yiji uacádi ome yiguíjnai iji gatajnoquei,” chojninga. (San Juan 14:2-3)
Chi gusu Ecarai acajnaquéode ome yoc:
Gusu yacajnaquéode ome yoc. Mu gosi ca chaguhéta pimánique jne. Ujetiga gosi chojninga: ‘Don Juan, don Pablo, misionérone que ore chingo Dupade Uruode aja yoque to gu. Jecute que yanguretágo to diríca.’
Uacadúcho unojo uje jecucha yingome uaque Dupade Uruode uje jnani bajade chojningame Noé: “¡Achẽre bacucoi ga yacágoja to é!”
Mu chojninga: “Ingome uaque nanique uje chi Dupade cho dajuñame yoque jne. Mu que ayáyo uacasijnaringuéone go. Jecute chacho yoquisijnaringuéone ga cho dajuñame yoque.”
Jecute gajnui jec u ne uje yingome uaque jeta yiquihíjnojo Dupade Idai yui te jne. Enga que yimóngo pujnusiétigai ome yoc iji Dupade Ujnacari diringai.
Je basa ga que yanguretágo Dupade to ga yimíningacója jõronga yoquiguiosode aníri iji gatajnoquei. Ujeta ore jnome Dupade Idai. Ore timíninga jõronga yoc. E ore jnome daqui dajnei erãpe yui pujuyaquei. Enga pujnusiétigai jogadi tu.
Gajnui tu ayorei iguioserãi uje toji uje pitoringai jno orúdi. Ore jnusi ore. Que toc ujeta qué uñeque na pucuecaringuei aja enga ecapo rĩ. Mu Jesuse u uje na pucuecaringuei taja danguresórone ujetiga di jne iji ne jnumi.
(I Tesalonicenses 4:13-18)
Ujetiga gosi chingo re aja uyoque, enga chingo re aja Dupade Ujnacari ga Dupade chĩro orisijnaringuéone. Enga úringai Dupade ap jogadi tu uje chingo dasijnaringuéone aja Dupade jeta chĩro.
Dupade Uruode qui upo rĩ uje jnani qué caniraque. Chequéraque qué caniré, mu ca chacája Dupade Idai ome dacaniratiguei. Ayoré ate noñaque mu changureta Dupade Ujnacari, ga chacája Dupade Idai ome danguretaretigai iji daquetasṍri Jesuse. Gusu yacajnaquéode.
Clave:
Espiritu Santo – Dupade Ujopié
Reino – Dupade gajnepídi jogadi uje urasade ore cho deduguéjna cuchábi iji
Ecarai – Tobité, Bolivia – 1970
Marina de Morarie churúsãre Ecarai acajnaquéode
