Yingo uaque gajnerĩ Jesuse anguresórone umajósõri:
Jesus anguresórone umajósõri i tu Saulo. Uté u uje cáma changureta Jesuse to nanique. Umajo Jesuse anguresórone ore. Chi tibágui uraque deduguéjnai. Chi chojninga: “Asíome barusãratígo ome yu. Yi ga yicáji Damasco. Yi Jesuse anguresórone ore ga yujé uñéngo. Jé basa ga yujuru uñéngo gáyode jne.”
Ga uté oreduguéjnai chisíome darusãrane ome. Saulo uté jno uje doi Jesus anguresórone iji oridaidatei Damasco.
Uje idógosi iji Damasco enga Jesus chiqueta raja Saulo:
Chi idógosi Saulo iji oridaidatei Damasco, mu Jesuse chiqueta raja. Enga chi Jesuse chejna ajirigode.
Adi jé u ayorérique jeta chimo Jesuse mu que changureta úringai Dupa, ga Dupade chejna uté áyipie ajirigode.
Enga Saulo jorane jnanio chi ca ore chimo Jesuse to go. Gusu uje ore chudute darárigo enga tṍraji gaté. Ga chi Jesuse chajuque udore ore agutedie. Chi gusu Saulo uje chudute darade ga chojninga, chi Saulo chojninga: “¿Jé ua u gosi a?”
Mu Jesuse chi chojninga: “Jesuse u yu. Bamajoi tu yu,” chojninga. Uné cho jeta umajo Jesuse iji jnumi, mu umajopísode u anguresórone iji jnumi. Jecute Jesus cho damajósõri iji Saulo to.
Chi Saulo todo uté ga chi chojninga: “Yeduguéjná, ¿jé yipesutígome ua jne a?”
Jesus chiroque Saulo aja ore idaidatei uté ajei:
Mu chi Jesus chojninga: “Bo ga acáji oridaidatei Damasco ga a yingome bapesutígome ua gajnerĩ iji idaidatei ajei.”
Saulo jorane ore jno ga ore chijñaque; Saulo chisa ore jmanecade uje que chimópo dajiritique rĩ. Jesuse chejna uté ajirigode gu, Saulo uté.
Mu chi Jesus chiquetápo raja danguresónique rĩ uje chi i tu Ananias. Chojningame: “Bo, ga acáji ore ajã́ro iji ore idai ga abágui uté, jnani uje i u Saulo.”
Dupade chécãre Saulo i nanique:
Chi Pablo i u Saulo nanique iji taningane, mu changureta Jesuse ga Dupade chécãre i ga chĩ́care San Pablo aja, i ejoi.
Adi jé u ome yoque, disi ejode uyoque. Uje Jesuse ore chécãre yoqui to, enga yoqui tu Cristiano. Dupade anguresórone ore i u Cristiano. Ujetiga apota angureta Jesuse ga angureta Jesuse. Jesuse yui guesája ome ua. Que parique Jesuse yui. Jesus chojninga: “Abágui yu ujetiga apota yu. Yiguíjnai piagoi guesája, mu baguíjnai u uje piagoi parígome yu,” chojninga.
Jesus ojningai yoquiguíjnai piagoi, que yoquiguíjnapísi u go, yocáyipie piagoi u Jesus ojningai. Ujeta apota Jesuse ga achẽre báyipie piagoi gai ome, ga Jesuse chacája gai, ga Jesuse, ajínaño ñane iji baguíjnai ajei. Jeta ayorépise Jesuse iji jnumi udé ga nóna ua iji baguíjnai, mu Jesuse nóna ua aja quedéjnane ome dáyipie, Dayé Ujopie ore. Jecute Jesuse chojninga: “Ujetiga apota ga yijína ua aja baguíjnai ajei.” (Apocalipsis 3:20)
Jĩraque Pablo chacate ore ome Dupade adode nanique:
Bajnui a u San Pablo gajnerĩ. Uje changureta Jesuse nanique ga chi jĩraque chacate ore ome Dupade adode. Chi jé qué todoba cojñone. Chagutu rome Dupade adode, mu Dupade jé chirógaja. Jé jno irajatigade údi. Adi jé u ua jetiga angureta Dupade ga bagutu ua ome Jesuse adode ujetiga acate bojode ayoréo. Mu quigade que agutúpo ua ome rĩ. Jesuse tu bátajasṍri gu. Jesuse u uje chacate ore mu oidi tu babijnani ome dacajnaquéode. Apota jeta Jesuse chijna babijnani ga ango ua aja Jesuse. Ujeta ojninga: “Jesuse, ajna yibijnani ga yacate yujode ayoréo.” Ango ua aja Jesus ujetiga acatecã́ri bayé Dupade.
San Pablo catecã́ri Jesus ome ipesutique:
Chi uné San Pablo chojninga: “¿Jé yipesutique ome ua gajnerĩ a?” chojninga.
Mu Jesuse chojninga: “Bo ga acáji oridaidatei, yingo bapesutígaja ua gajnerĩ.
Adi jé u uyoque gajnerĩ. Ujetiga yipótago Jesuse adode ga yojnijo: “Yeduguéjná, ¿yipesutígome ua ya?” Acatecãchoi Dupade to ujetiga apotáyo acatecãchoi Dupade. Ojnicho: “Yoqueduguéjná, Dupade á, ¿yipesutígome ua ya?”
Yicatecãcoi Dupade gu ujetiga yicoi áyipierigui. Yicatecãcopoi gu yoquejnaréngone, yoquipotigádode cucha, ujetiga yocai Dupade chisíome yoquipotigádode cucha ome yoque. Dupade ape yoque ga chosõre yoque. Uje Dupade ape yoque ga chisíome yoquipotigádode ome yoc.
Ujetiga angureta Jesuse ga acué cucha gateminórone bajaque, ejo cucha jnutiminórone ujetiga acué. Uje Jesus chojninga: “Ajire cucha gateminórone bajaque. Ca ajire cucha jnutiminórone bajaque.”
Jesuse chingo cuchade unojo aja yoque uje quene yanguretágo Jesuse iji taningai. Uje quene Jesuse, yimáco yógaja ñane, uje quene yanguretágo Jesuse. Uje quene yocai u Jesuse. Dupade ipesute yoque, mu amiri tu ujetiga yanguretágo Dupade ga yicoi iroquérigo.
Jesus chiroque danguresõripisi aja Saulo ujetiga chiqueta:
Jesuse chiroque danguresõripisi aja Saulo uje i u Ananías ujetiga chiqueta enga chimopo dajiritígo rĩ. Jesuse chósi tome Ananías: “Bo ga abágui uje yajegáite Sáulo uté ujetiga jno yujnomei údi aja purása quedéjnane.” (Hechos 9:15 aja 18)
Ecarai – Tobité, Bolivia – 1960
Marina de Morarie churúsãre Ecarai acajnaquéode unojo
