Mu uacadúcho uje yocurasade Pablo ore chicáji uhuaque, chacate uac ome Dupade Uruode mu cáma ore chiraja yocuruode go. Mu ore pota jeta ore cháta cuchádaja uhuaque. Enga jecute ore tibidi cucha pibosode. Ore chosõre uac ome. Enga ca ore cho ugucharãi uje cãra dabosode ome jnani jmatai Lázaro nanique, enga cãrapúsu ga que chisi dejóriguiji. Que Dupade osõraquei déji ugucharái uté ajei gu. Dupade ijnoraquei que déji ajei tome dojo ayoré gotic. Mu yocurasade Pablo ore ga ore chijnóra uac, jecute ore chucué dasoca ome uaque.
Yudúco ica uje chi chaguhei chejna uac enga yicatecãcoi Dupade ome uaque:
Yudúco ica iji yoquidai Tobité uje chi don Pablo chojninga: “Yosõripise ore uje que ore potígo cuse,” chojninga.
Mu yicatecãcoi Dupade. ¿Jé adúcho yicatecãraitigade to a? iji udé máquinane (radio) ujetiga Dupade chucué dasocáringome uhuaque ga chucué uacabotígo, ome angarané (radio). Mu a Dupade chudute yicatecãraitigade, jecute chucué pibosode iji ta Tobité, ga a ore chisi ome uac. Mu jé basa ga chicáji ne. Enga u uje Dupade chosõre danguretasórone ore gu ome chaguhei. Chosõre erámone yoquejnaréngone ga chisiome dajopié tome danguretasórone jeta ore catecã́ri Dupade iji ejnaretade gai, ga chiqueta ore. Mu ore chiqueta ore gu uje ore changuretapise Dupade.
Gosi iji uaque ujetiga acatecã́ri Dupade enga angureta Dupade enga ojninga: “Dupade á, yingome ua jeta ãro yisijnaringuéone enga be yicatecãraitigade enga aqueta yu tenga.”
Ujetiga acatecã́ri Dupade ome bojode ayoréo ga, Dupade jé u uje doi bacatecãraitigade ome ore. Mu que picatecãraite Dupade ome jnaropié jogonórone ore. Ore noñome dáringai ayoré gu.
Yocajnai a u Yocangarádejnai Jesus ome ao gateminóri jne:
E noña ga uje Satanás e chijna ore údode enga que qué Dupade quitique cuse ome ore go. Que púringai ayoré cuse enga que ucuegoi áyipie iji jnumi.
Mu que yimóngo jeta jé Dupade upúsu gu yocúringai ayoré jne. (1 Corintios 15:48,49)
Que ayoré chécãre datique uje yicopo uñane iji gatajnoquei rĩ. Que uñeque chécãre datique uje ũrépise.
Dupade pota jeta yajnerangome acajnaquéode ome yocurásarigo:
Ujetiga angureta Dupade enga a anóninga yacajnaquéode, mu ore uñane a ore chicadígui. Jecute jé uñeque pota chacate yocurasade to, mu a ca togome ore uje que ore chiraja yacajnaquéode gu. Ore chibéro yúode enga que unéningai cuse gotique ome ore. Mu yajéode u jetiga ore chinóninga yacajnaquéode enga socaseti yijíñome iji guidai te ga, enga ore chajnerame yacajnaquéode ome darásarigo.
Que yimo jeta yi Dupade Uruode údi iji erámi, uje uacamóño uje que yiraja jeta yácarapóji guidai to rĩ. Mu a yiji Dupade Uruode iji erámi to, enga a Dupade noñome yocuñéngo jeta chacate yurasade ore iji yidai. Jé basa ga yocuñéngo jno Dupade Uruode údi ome uhuaque jeta adúcho Dupade Uruode ome yoquibijnanone to, enga yoquirasique ñane jetiga Dupade chĩro yoquisijnaringuéone iji yocajéode iji erámi.
A yejnángo yógome Dupade Uruode enga yoquirasique ñane:
Yoquicatecãraitigade ome Dupade, ise ga chise erámi. Jecute yicatecãcoi ome uhuaque nanique jetiga acáyo aja cojñone. Jetiga quigade ga yacágo aja cojñone jnese, ayoréode uyoque. Mu quigade ga amiri tu jetiga anguretágo Dupade. A yejnángo yógome Dupade Uruode enga yoquirasique ñane. Yijínango ñane aja yoquiguíjnane enga a yisíngome ñane yoquibosode. Déji Dupade uruode iji San Pablo urusarane uje chojninga: (Romanos 12:13)
Gusu ore uje Dupade chĩro ore isijnaringuéone uje ore chise gatajnoquei:
Que ayoréraque chacája Dupade idai bisideque go. Gusu uje Dupade chĩro isijnaringuéone ome Jesucrísto iyoi, ga quene pésu isecãrátigai tiji ore ga jec ũré jno ore údi aja gatajnoquei. A araja Dupade Uruode; a acatecã́ri Dupade; mu baraja jetiga arajáyo iradedie, mu que cuchárique tṍraji go. Dupade Uruode qui u mu gosi uje changureta Dupade Ujnacari Jesus, ga chingo raja jeta chĩro isijnaringuéone, enga quene jogadi tu jeta Dupade jno gosi údi. Que jno bádi go jeta araja Dupade Uruode. Que jno bádi go jeta araja Dupade iradedie. Jetiga ajñecare aja bajesúode ga be Dupade iradedie, mu Dupade que jno bádi gu udore go. Gusu jeta angureta Dupade Ujnacari Jesute uje tẽra re ome ua, ga jec u uje jno bádi aja gatajnoquei to jne. Uté u gu ujé toji curesei gai nanique enga chójne ome dayoi ome yoque ujetiga bisidi u iyoi ome yoquisijnaringuéone. Jesute tẽra re ome yoque ujetiga cho yoquisijnaringuéone oré. Jecute be enga asíome ua ome uté.
Uje gosi aréguiji dejnaréngone, ga ijõre, ga tijode cho pujnúringo:
A unere yui jetiga ayorei chise dáringárique ayoré ijõre jeta ejnaretac. Unere yui ome yajéode. Jec ũré yu. Mu unérapo yui to rĩ jeta yicopo Dupade idai tenga, yimongo yocúringane ayoré ijõre iji uté. Enga jec u uje gosi aréguiji dejnaréngone, ga ijõre, ga tijode cho pujnúringo. Jé basa ga ejnaretaque enga úringai ayoré, tijode pénu, enga adi jec u jeta uhuaque gosi chicáji aníri, gatajnoquei, enga chise dacuecaringuei tiji ta Dupade guerani te, ga tijode cho jnángome uje ijõre gosi.
Mu gosi uje chicáji jnaropié te ga, gosi uje gajnui udé dequejnaréngone uniri jnupe ga chacho jóroque dejnaréngone. Chacho jnupuchade uje chigase. Chacho debiedie. Unojo ujetiga ca angureta Dupade to enga baqui obiréjnai u qui jogadi uté. Jé basa ga baqui obiréjnai, ujeta angureta Dupade, a u Dupade idai jne.
Ecarai cho quique jnumi ichárique isocade ome ore:
Dupade chi jno danguresórone údi enga chécãre ore aja gatajnoquei. Mu cha jnumi tudé gai, mu pesapo jnumi ueratigai rĩ, enga chatĩrepo danguresórone taja jnumi ichai tuné rĩ. Enga ore chopo dedai iji jnumi tuné rĩ uje íjnoque dequejnaréngone iji, íjnoque pajei dotáningane.
Que yimóngo mu Dupade Uruode qui u uje a chécãre danguretasórone aja gatajnoquei, mu qué chañuru jnumi gai bajaque. Pésu jnup ichai, pésu gaté icha rĩ. Gaidi u jeta chatĩrepo ayoréode ore aja ore unirone rĩ. Que yimo jeta chatĩre yógaja yocunirípisode jne. Mu Dupade Uruode qui u. A chatĩre uágaja uacaniri tuné. Jé basa ga chatire yógaja Tobité. Mu que yimóngopo dequejnarétique gotique rĩ. (Isaias 65:17)
Jé uacamóño jnani bajai, yocãrapi Adã, acoté Éba ore. Chi Dupade chisíome dejnaque ueradi ome ore jeta ore tagu adie, mu ore pésu cucha gajnaréngone, enga Dupade chijócãre ore iji dejnai te ga. Chicha ore aja, anírone, guesode iji daniri ejode. Enga adi jec u uje chicháji yógaja ta jetiga cho jnumi tuné enga chatirepo yógaja udé jne rĩ, enga íjnoque dequejnaréngone iji. Íjnoque pajei dotaningane iji. Unojo Dupade Uruode jetiga anóningacho jetiga apota angureta Dupade, enga jeta apota maringa, ayoré ijõre ua enga angureta Dupade to.
Dupade a jé ca tangárirási gosi jeta uté gosi pógurásu dáyipie gajnarénguenie iji dajei: (Salmo 66:18)
Udute uje chi acatecãchoi Dupade jnese, mu bacatecãraitigade que oréraque cuse go ujetiga bapógu basijnaringuéone iji bajéode. Mu gusu jeta ango Dupade jeta chĩro basijnaringuéone. Jec u uje Dupade chimesẽre ua. Enga jec u uje tangári ua.
Jesus chojninga: “Ṍraño yanguresórone ore aja yodi.”
Jesuse chojningame danguresórone ore uje cho ore quique iji jnumi nanique: “Acayoi erámi údode jnese,” chojninga, “angoñome cojñone, ayoréode, óriji erámi jeta uñéngo changureta yu,” chojninga, “ga ṍraño ore aja yodi. Gajnui jec u uje, jeta ajóchañome ore isijnaringuéone,” chojninga.
Enga apota angureta Dupade to ga chijócha basijnaringuéone. Que yijóchago, mu yṍrango ua aja yodi te ga, gajnui tu jeta basijnaringuéone ode tu yodi. Uje bãriapo rĩ ga jec u uje báringai Dupade anguretasõre ichai pijoque. (Romanos 6:3,4,5,11 ore)
Ecarai – Campamento Ayoré, Bolivia – 1971
Faith de Wyma churúsãre Ecarai acajnaquéode udojo nanique
