Jesuse ojninga casodicaite, gãrapie uñanie e tocade:
Jesus chi chojninga: “A Dupade ujnomei chise erámi jnese jne ome cojñone ore, uyóguiji erámi jnese, ga ujetiga ore chudute Yiapade ujnomei uje pota cho darásarigo iji erámi unirisórone jnese, ga jé u jeta yiríringai ta yúode a jé u jne.” (Mateo 24:14)
Jé uacadúcho uje chi qué ocoi menenéngone, cojñone ore iji erámi uje que ore chudute Dupade Uruode, mu e yugúcoi ore gatócoro. Jecute Jesuse ojninga casodicaite, gãrapie uñanie e tocade.
Jesuse chi gãrapié to uje guédodie básiji gatajnoquei. Jesuse gãrapiedie u uje jnumi tãrara. Jesuse gãrapie cuchade udojo jnese. Chamáñaje jé urúo nanique. Uje chingo dacadigode ore uje qué déji jnumi nanique, ga acadigode ore catecã́ri Jesus iji quedéjnarique enga ore chojninga: “Yocacadisṍri á ¿jé cho rique a ujetiga cuchade udore tocade a? ¿Jé pãrapiéringui jne iji bãríringai, erámone eruei ore yui?”
Mu Jesuse chojningame ore: “Uje a jiépisi cojñotígo jne ujetiga ore chósi tome uaque: ‘¡Cachi uacangarádejnai Crísto u yu á!” Udore a ore chãra cojñoque uásejnane jne. Mu ujetiga uñeque potarása jeta chãra uaque enga chojningame uaque: ‘¡Cristo déji ne!’ Jeonga uñéngo chojninga: ‘¡Crísto déji ta!’ Mu jé ca angáchoi udore gosode to go. Uje Dupade utocaidi uyu yiríringárique gajnui a u ajnorátique jne. Uje tṍraji gaté enga chicáji quedéjnane. Parecujate dosóguedie udire quigade enga guedé a toi jne. Guedoside a ca chajniapo jnumi te jne rĩ. Guédodie a basapo jne rĩ iji gaté. Enga gaté a chijocase re jnese jne. Mu que pirajaque yiríringarique dire, guedé gatócororaque ore.
Chi Jesus diringai yui a chopise dirode yui jne uje guei dequejnangóri di ome Noé ore:
Dirode iji Dupade utocaidi uyu yiríringai yui a chopise dirode yui jne uje guei dequejnangóri chejna Noé urásade nanique. Ore áyipiedie gaidode upúsu daquetangóningo cucha ome raque nanique. Uñane ore áyipiedie gaidode u dabosode. Jé uñane áyipiedie gaidode u dajódode yote piócho. Jé basa uñane ore áyipiedie gaidode u dajmatodie gapui, dajmasórone jnacare ore ujetiga jé ore chisa ñane. Mu chise diri uje Noé e ore chacája dabi cuco cuchape ajei. Mu ore chuninga mu guei dequejnangóri yore ore uñane gai enga chejna ore jnese. Adi a jé u jne ujetiga Dupade utocaidi uyu yĩriápo rĩ iji uaque. Beyoi enga ajuso uaquero enga dimane uágome yiríringai yui.”
Ecarai – Tobité, Bolivia – 1960
Marina de Morarie churúsãre Ecarai uruode nanique
