Ana chutai Dupade jetiga chisíome datígome:
Yingo uaque gajnerĩ uje jec ũré enga Dupade doi yoquicatecarãitigade, yocutaidode cucha iji; jecute utagóji cuchade iji Dupade.
Adi chi u ome Ana nanique. Chi Ana pota jóroga datique. Jé chi aberé gu. Mu Ana chi jecucha chutai Dupade jetiga chisíome datígome. Enga chi Dupade chudute gajnerĩ Ana utaquéode, uje chutai datíguiji. Ga chi Dupade chi chisíome atígome. Enga ore chĩ́care Samuél aja dabi uté nanique.
Chi Ana nóna dabai ga ore chicáji Dupade iguíjnai ujetiga ore catecã́ri Dupade iji. Enga chi ore chijna deranone ome Dupade anguresṍri, Dupade uruode atatasṍri, uje chacate ore ome Dupade uruode, enga chi chajire Dupade iguíjnai. Mu chi Ana qué catecã́ri Dupade iji. Enga qué chutai disíriguiji Dupade. Chutai datíguiji Dupade. Mu chi Dupade anguresṍri, Dupade Uruode acadisṍri chojninga: “Ana, ¿qué acatecãri Dupade a? Enga Dupade a chudute bacatecarãitigade gajnerĩ, enga a chisíome uacatígome uaque gajnerĩ.”
Jé udúco to uje chi Dupade chisi ome Ana abi ome. Enga jé urásu yoque. Yutagóji cuchade iji Dupade to enga Dupade chisíome yocutaidode cucha ome yoque.
Ore catecã́ri Dupade ujetiga chijnime Pedro iji guijnatajei uje ore suru gai iji:
Jé adi upo rĩ ome disi ejode. Disi ejoi uje chi ore suru gai nanique uje chi i u Pedro, enga Dupade anguresórone ore chamáta ñane enga ore catecãri ñane ome Dupade. Ore catecã́ri Dupade ujetiga Dupade doi dasocáringome Pedro iji guijnatajei uje ore suru gai iji.
Uje chi ore chuningame eti Pedro déji ore iguíjnai piagoi. Dupade chudute ore icatecarãitigade enga chisíome ore ipotigádode cucha ome ore. Adi jé urásu jeta yanguretágopíse Dupade ga yutagóji cuchade iji Dupade to. Chi ore chuningame eti Pedro déji ore iguíjna piagoi. Uje chi Dupade chejñu ojnaquerodie iji jmanecabode, orotadábode ore ome datocaidi gaté unirísõri to enga chuchẽre piagoi gai ome.
Dupade que chisíome yocutaquéode ome yoque iji ujade: (Santiago 4:3)
Jé uacamóño uje ayorérique abi ga chutai cuchárique nanique. Ga dai chimesẽre uruode ga chisi ipotigádi cucha ome. Jé basa disírique a chutai jórogui cucháriguiji nanique. Chetaque utaquéode enga que chisiome go. Chi jé adi u ome Dupade. Yutagoi cuchade iji mu yoquicatecãraitigade chicai quedéjnane ome Dupade ipotigádode, enga que Dupade chisíome yoque go yoquipotigádode cucha. Pangarádejnai Dupade uruode jé u ome ayoréode uyoque.
Abraham catecã́ri Dupade ome darásade nanique:
Chi jé adi upo ome jnani bajai uñai uje i tu Abraham. Chi uné catecã́ri Dupade ome darasade ore, daguiosode iji Sodoma, Gomorra ore. Uje chi chojningame Dupade: “Bajéo ga aqueta yurasade, yiguiosode ore iji ore idaidatéode uje i tu Gomorra enga ca ajé ore to.” Ga chi Dupade doi gójni uné uruode ga chi ca chujé Abraham iguiosode to. Abraham iguiosode u udore, Lot ore. Mu chujé Sodomagosode, Gomorragosode uñane ore jnese nanique gu orate gajnarenguipísode.
Ester catecã́ri Dupade ome darasapísode ore nanique.
Chi adi upo rĩ ome chequéraque uje chi i tu Ester. Chi catecã́ri Dupade ome darasade ujetiga Dupade chiqueta urasade ome ore umajósõrone. Chi Dupade doi gójni unaque utoquéode, icatecarãitigade enga que chejna uraque darasade to, unaque urasade, judíode ore. Ore guetesórone que chejna ore go. Adi jé urásu disi ejode uyoque gajnerĩ ujetiga yanguretágo Dupade.
Yisigopísome yógome ga Dupade doi yoquicatecãraitigade.
Dupade chisíome yocutaidode ome yóguiji de. Chisíome yocutaidode cucha ome yoque. Chamáñaje ape yoque ga chosõre yoque, Dupade. Chamáñaje ipesute uyoque enga chosõre yógome cuchade. Ujé chimesẽre yocadode enga chisíome yocutaidode ome yoque.
Ujetiga angureta Dupade ga jé ca báyipie déji cucha uñeque uje atai cuchade iji Dupade enga Dupade chisíome bapotigátique cucha ome ua jne.
Jesusedaté chutai dajnacari iji ore jotíque cucha otate:
Jétapũré nanique uje chi Jesus supúsu nanique uje chi Jesusedaté chutai dajnacarabi iji ore jotíque cucha otate. Ga chi chojninga: “¿Ja amo to a? uje ore jodi cucha otate íjnoque.” Ga chi Jesuse doi gójni daté uruode enga pésu cucha a otate gajnui. Pésu ga uneréjna. Chi yote bisideque que, mu pésu ga cucha a otate uneréjnai enga sué ore jote cucha a otate bajade gai. Jétapũré Jesuse supúsu nanique iji jnumi uje chududipise daté uruode.
Mu adi jé u ujetiga yutagoi cucháriguiji Jesuse, Dayé ore. Enga ore chisíome yoquipotigádode cucha ome yoque.
Ujeta atai cucháriguiji Dupade ga jé ca báyipie cho quiyígui-yígui ujeta atai bapotigátiguiji Dupade, bayé Dupade. (Santiago 1:7)
Ecarai – Tobité, Bolivia – 1960
Marina de Morarie churúsãre Ecarai acajnaquéode udojo nanique
