Jesus acadigode di enga ore ojñane u Dupade adode ome uráguiji dajesúode:
Mu yirajágo iji yoquidai ga ayoré diode ojñane u cucha anírone, gojña erámi tudé jogonórone cucha, erámi tudé isijnaringuéone. Mu Pedro, jorane ore ojñane u Dupade adode ome uráguiji dajesúode. (Marcos 6:30)
Ga jec u uje unere uje ayoré purasade ore di. Unere uje purása quedéjnane chacája gáguedie to. Ga jé adi u uje unere to uje Dupade anguresórone ore diji yoque, ga qué ore pésu uje ore chatata dadode iji Dupade adode, ga que gusu yoque uje unerome yoque, mu a unéraja Dupade ajei to ome ore ojñane iji dajesúode erámio.
Mu yicatecãcoi Dupade jétiga Dupade chátaja daruode aja yoque jeta yirajágo quigode uje Dupade Uruode jé qui jé u. (Santiago 1:5)
Yimóngo iji gaté ga *Soríané catecã́ri Dupade ome yoque jeta yirajágo Dupade Uruode.
*Soríané icatecãraitigade u udojo ome Dupade:
“Dupade Dios, uje yicatecã́ri ua iji de, ipota jetiga yududipise baruode to iji Ecarai, Davidé pijnani jeta chacate yu. Gusu ua uje daijna cuchábi ua ga bajnué cuchade gáyode jnese. Bajnué Satanás, irógode, ore gai. Bajnué pitoringai gai. Yipota jéta acha bajmanai taja yoquibai iji dejai tudé ga yacágoja direcaringuei to gajnerĩ. Acha bajmanai taja yoquibai iji dejai tudé.
Yirajágo uje cucha omone garani u ua uje yicoi baruode iji deréjnane jnese. Ga arodipise uyoque gajnerĩ iji dejai udé, iji uyoque jnese ome Satanás. Aranguipise yoquejode gajnerĩ. Gusu ua uje yicoi baruode iji deréjnane jnese. Que yimóngo ua mu bamo yoque ga bagúsi yoquejode.
Gusu ua uje daijna cuchábi ua ga yicoi baruode, babi Jesucristo ore uruode.
Gusu ua uje bajnué cuchade jnese. Bajnué pitoringai gai. Bajnué Satanás, irógode gai. Uje Davidé chacate yoque gajnerĩ ga ãro yocate gajnaréngone gajnerĩ, pisijnaringuéone iji pajéode.
Asi ome cucha pibose omone ome yoque gajnerĩ, yajo gajnerĩ ga ca pésu dequejnarétiguiji yocajéode gajnerĩ. Gusu ua uje bamo pajéode. Ga ca yamóngo dequejnarétique ome yoque gajnerĩ. Arote ore gajnerĩ, disidie ore ga ore doi baruode to gajnerĩ. Adi u chequedie to rĩ, asi ome báyipie ome ore gajnerĩ ga ca ore chajéngome baruode to gajnerĩ iji deréjnane jnese jeta yicoi baruode iji Davidé pijnani.
Yicatecã́ri ua iji babi Jesucristo i. Amẽ.
Ecarai acajnaquéone u udojo ome pujnoméone quigode: (Efesios 6:21 aja 22)
Jec urẽ San Pablo acajnaquéode uje chojninga: “Yiroque Tíquico aja uaque ujetiga angáchoi ojñáringo ome yoque.”
Jé ũrepise uje yugúcoi Tobité te ga udúco Dupade anguresórone ujnoméone uje ore changureta Dupade iji Rincón, jéoga Zapoco, enga unere ome yoque. Uje udúco Poza Verde gosode ujnomei uje ore cho jnome Dupade Uruode ga yoco yocáyugu. Ga jé u San Pablo ojningane ome yoque uje chojninga: “Uhuaque uje yiroque Tíquico aja uaque jeta angáchoi yocujnoméone, angáchoi iji pijnani gajnerĩ.”
Dupade iroque, Dupade anguresṍre Tíquico, ga que doi ga cutame Dupade atique. Ga jé ũrepise uje yicagoi udojo to ica, Rincóngosode ore, enga icai ome Dupade Uruode. Mu adi jec u uje cho jeta yoquidáyo, ga iyajmaque yóguiji mu yacaranguipis ome Dupade uje Dupade Uruode que chijnime re iji Rincóngosode. Que chijnime re iji Zapocogosode go. Que chijnime re iji Tobitégosode.
Mu gosode jeta cho jnome Dupade Uruode ga ore ujnomei cuse ome Dupade, mu que ore ujnomei uerate go, ore ujnomei gajnárecho ome Dupade uje ore cho jmiti, jmiti ome Dupade ga ore chicáji quedéjnane ome Dupade Uruode. Jé basa ga Tobité, jeoga Zapoco, jeoga Rincóngosode ore ujnomei chise Dupade idai te ga, pujnomédaté ome anírone Dupade uje chudute yocujnomei.
San Pablo chiroque Tíquico aja Efésogosode jeta ore jnusi rangome ojñane (Efesio 6:21-22)
Ga Dupade anguretasõre Tíquico uté, ga que doi ga anire, cutame Dupade atique. Enga adi jec uyu iji deréjnai tuné uje Dupade anguresórone iji udé Tobité yocajnei tu jetiga yõco yoque iji Dupade Uruode ga ca yucutágome Dupade Uruode ujetiga yangácoi iji Uruode batigade. Jé ca domingo maringa, Dupade Uruode batiga jeta yicoi Dupade Uruode iji, ga ca yarángo yóguiji quedéjnarique jeta ojninga, ‘Ca yi to, chamáñaje yiquihíjnonguiji dajei.’ Jeoga, ‘Ca yiji to chãje yúdode urõso.’ Mu jé ũré dequejnaréngone déji ga, jé ũré Dupade Uruode déji rĩ uje Dupade Uruode chi gosi ejnaréngone ga ejnaréngone urõso. Mu ujetiga gosi tagu dejnaréngone aja, ga Dupade jé chajnerame gosi ijóningai.
Ezequías ujnomei uerate ome Dupade:
Jé uacamóño uje jnani bajai, aníri Ezequías a u, uje chojninga: “Dupade á, a yejnaréngone chinguíra yu aja jnumi dirome, ga a yitoi dirome,” chojninga. “E idógosi jeta yitoi mu, Dupade á, que yipota jetiga acadígui yicaniratiguéode ome yurasade ore,” chojninga. “Jé bamo uje yosõrai yocurása gatadíe ore ome yoquibosode,” chi chojninga. “Yosõraque yocurása matágode ore ome yoquibosode.”
Mu Dupade chimo icaniratiguei, chimo úringai paraque, chimo úringai anire osongáca. Ga Dupade chojninga: “Udute bacatecãraitigade. Mu a cáma atoi jne. A qué yõrape sequeredie tiji bei te jne. Ga sequeredie a qué chejnape yirídai jne iji bei iji batoringai yui.” Ga unojo jéta Dupade chimesẽre yoque gosi, ga Dupade aníri qué chisi ome yoquijóningai garósi ome yoque jeta jé yicabi Uruode gaté.
Mu yocurásarigo ayoré ujeta Dupade chiraja ujeta e chajnísi de jeta e ore changureta Dupade, ga qué chisi ome yocucuecaringuei tome yoque jétiga yingongomá Uruode aja ore. (Romanos 9:25 aja 26)
Ayoréode uyoque uje gajnareque yocujnomei ome Dupade nanique, mu yanguretágo Jesuse enga jé u uje noña ga uerate. Uerate yocujnoméone gu uje yimesẽco Dupade Ujnacari gu.
Sodómagosode ore ujnoméone gajnárecho ome Dupade:
Jé uacamóño uje Dupade chiroque darógode uñéngaja ore idaidatei, que yiraja jeta Sodóma u. Gaidi u gu ujetiga chejna ore iji ore idai uté gu ore ujnome gajnaréngone. Mu jnani bajei Abraham chijócha Dupade ajei údi ujetiga ca chejna ore idai. Enga Dupade chojningame: “A jé ũré ua, enga parágode iji ore chise 10 enga a ca yejna guidai unirisórone gu jnani parágode udore jne iji ore ujade.” Mu que chise 10 uje changureta Dupade. Mu diga chejna ore idaidatei gu uje que ore áyipieraque dépoi Dupade gotique rĩ. Enga u to uje gajnáreque ore jnomei.
San Pablo chatata dadode ome ore uje cho daba datatagode Dupade urúo:
Ga San Pablo ojningane u uje chojninga: “A adúcho yocujnomei to,” chojninga. San Pablo ujnomei tu uje chi cojñone chaquesu údode, ore chaquesu údode ga que chise dajóningárique. Ore doi ga ore suru gáyode. Que chimo eníngome re. Jé que chimo direcaringuei rĩ ome re. Ore chigaru ga ore chaquesu údode ome poridie. Que chise anínique daragajnúraque jeta arangajnúnie etoque. Údode tutut. Ga unojo u uje cojñone chaquesu údode gu uje ore chetágome Dupade Uruode, ga ore charatáiyime Dupade Uruode ome. Ore chetaque Dupade Uruode ome, ga ore chaquesu údode mu chojninga: “Yujnomei tu. Que yi ga yãra yu iji quedéjnarique jeta yi ga yojninga: ‘Que Dupade chátaja yu go, ga cojñone jecucha ore chaquesu yúdode. Dupade que chátaja yu. A yiya yacate ore ome Dupade Uruode jne.’ Úngare, a ca yiya jne, enga a ca yuruode u udore jne. Yigaidi u gu ujetiga yo yiba Jesucrísto úringai patataque iji erámi jnese gu.” A San Pablo uruode u udojo.
Mu jec ũré San Pablo uje udúco ujnoméone iji deréjnai tudé uje chi ore chaquesu údode. (Hechos 14:19 aja 20)
Pablo ujnomei cuse uje chejnareque re ome datatagode Dupade Urúo. Ore chujérase mu que cha Dupade iroquéode gotique. Ueradipise Pablo ujnomei uté uje chejnáreque re, mu qué jno Dupade Uruode údi aja erámi jnese.
Pablo ujnomei u uje gajnarengué edodie: (Gálatas 4:13 aja 15 ore)
Enga San Pablo, que yimóngo mu, edodie chi edo cho chique nanique, edodie cho ja ja ja aja dajesúode. Ga anire uje ejnaréngone que íjnonguiji, mu que chãra re iji go. Que chãra re iji jeta chojninga: “Que yũrúaji darújna arone, que yũrúaji yajirigode erámio ga que yi ga anire, que yi Dupade Uruode údi go.” Mu a chojninga, “Yujnomei tu, mu jetiga Dupade chimate yu aja yúringárique anire, pijnaque aja Dupade yui enga yigaidi tu,” chojninga. Flipenses 1:21
Pablo ujnomei u uje yote quedéjnai chibéro Pablo pi cucho:
Hechos 27 chatata úyujna cuchábi uje tṍraji casaque garani enga chubúchu Pablo ore pi cuco enga chachẽre ore enga chaquesu cucoi údode. Jecute ore tṍra cucoi ugúchade aja yote quedéjnai. Dirode jiei uje guedé que tocadépo rĩ enga ore doi dateringane uje aníri, chi ore pi cuco pero, ga anire, que ore tagu dabotíque. Uje e iyajmaque uje que ore tagu dabotique enga Pablo chague enga chojningame ore: “Yijorane uaque á, ca oyo uacáyugu uaque. Uje a cucoi pero jne maringa, a ca uacuñeque toi jne. Uje Dupade iroi gaté unirisṍri uñai chiqueta raja yu que iji dejai udé. Enga Dupade iroi uté chojningame yu que: ‘¡Pablo á! Ca atodo. Bajnei tu ujetiga ango ua aja Róma gosode eduguéjna cuchábi dirome jne. Jecute Dupade pota chiqueta ua iji yote quedéjnai udé, enga a chiquetápo bajõráringo ore jnese to jne, enga a ca uñeque toi jne.’”
Uje e ore chise jnumi jnese nanique enga ore jnome ore idaidatei Róma yui. Mu chise gójni ica uje Dupade anguretasṍrone chachai ore iji dajei, enga chi Pablo anguretigai dopoi gaté rĩ. Ga chi chojninga: “Yanguretigai ga dopoi gaté rĩ uje yicoi aníri, yutuangóa yocujode Dupade anguretasóño uje Roma a qué idája mu, a ore chachai yoque ome Dupade Uruode.”
Ga jec u uje, ujetiga gosi changureta Dupade ga chudute Dupade Uruode iji Dupade anguresónique pijnatique ga jé ore anguretigai dopoi gaté jne rĩ enga ijṍrapo rĩ. Ijṍrapo ome Dupade Uruode rĩ. Ga San Pablo ojningane ome yoque u uje chojninga: “A adúcho yujnomei to jne.”
Pablo ujnomei jé upo rĩ uje ore suru gai nanique:
Ga San Pablo ujnoméone u uje chojningame ore: “A adúcho yujnomei to ome Tíquico uje yirógaja uac uje Dupade anguretasṍre,” chojninga.
Ga jec ũré chi tangári daquei te mu uje chi ore suru gai te mu, uje tocade ga jõrai u Sílas nanique uje chojñone ore suru ore gáyore. Mu uje dejnínga gatócoro enga Páblo, Sílas ore chijñecare enga ore chirate Dupade iradedie, enga ore catecãrápoi Dupade rĩ. Ore chudute Dupade iradedie, ore jurúgáyode uñane, enga qué ore tangári Pablo, Sílas ore. Gaidi tu ujeta ore chiraja ga ore tangári anírone dadudedie piradei mu Dupade iradedie u ga anire, ore anguretigai dopoi gaté rĩ, ga ore irasigápo re rĩ uje ore chudute Dupade iradedie iji Pablo ore pijnanone.
Pujnomé gajnarétigo pésu ga yibetágome:
¿Jec ũré yu a? uje udúco Dupade anguresórone ujnoméone iji erámone, yudúco uje ore cha Dupade Uruode enga yibetágo. Garósi yóguiji Dupade Uruode iguíjnai ajei te ga, yibetágo uje aníri, garósi yogome Dupade Uruode. Gosi jmané urõso, gosi edo urõso, jeoga gosi guide urõso ga betá gosi. Ga adi jec u ome Dupade anguresórone. Chi cuta uje garósi ore ome Dupade Uruode. Ore chudute Dupade anguresṍri ujnomei enga ore cha Dupade Uruode, ga ore beta.
San Pablo chacãra Dupade anguresórone aja ayorérique adode. Ga ayorérique a chaquesu daríderaque, jeoga iguitai, jeoga ducotique déji údode uñeque, ga cuta, chãje údode ga ejnaretaque ga cuta uje urõso.
Ga adi tu San Pablo acajnaquéode ome yoque uje chojninga: “Uacadúcho yujnoméone,” chojninga. “Enga anóningacho,” chojninga. “Ca ayorérique déji siñeque jetiga doso útique ga tagu dejnarei taja jeta ijõre ore jnese.”
Mu San Pablo acajnaquéode udojo ome yoque uje chojninga: “Ujetiga Dupade iglesia ijõre ga ijõre ore jnese, ga que ore chimo dacutaquérique ga ore nína ráguiji jnumi. Jé basa ga jé garósi yogome Dupade Uruode, ga Dupade Uruode ipotigasṍrone ore cha uje ore tangári Dupade Uruode, ga ibetágo.
¿Jé gotique gu a uje ibetágo? Ibetágo gu uje garósi yoque ome Dupade Uruode. Yibetágo gu uje urõso yiríde, ibetágo uje urõso yedo, yibetágo uje urõso yijmané ga que yise yicaniratiguei. Adi jé u ome Dupade Uruode anguresórone uje Dupade ujopié beta iji yocujade uje Dupade guídedíe uña urõso, jeoga Dupade iglesia uña cho jnome.
Dupade Uruode u uje pésu ga ijõre yoque: (Isaías 55:11)
Jec ũrepise uje Dupade Uruode a diji Dupade jne enga jetiga chajniapója jne rĩ enga que gusu go, a nóna yoc uñengo aja, a nóna ayorérigo uñéngo aja. Dupade Uruode aja Dupade iguíjnai te ga, jé ũrepise Dupade Uruode uje que gusu go iji dajesúode erámio. Que gusu ayoré jogasurãi iji ajesu erámio go.
Jé cho to sárode irajangṍri uje que gusu iji dajesu erámio nanique to. Ore nóna ñane aja quedéjnane gu uje ore chiraja uje aníri, irajasṍre chi ore chubúchu ore iji ore ejnaréngone, ga pésu ore ejnaréngone, ga cho sere, ninguira. Ga ore nóna aja quedéjnane, dajogasui uraque dajõra sárode irajangore.
Cuchiyi tupusu uyoque uje ueracho yocujnoméone, uyoque uje Dupade ujopié Espiritu Santo irágu yocajéode, ga yijínango ñane aja quedéjnane to uje yicoi enga yátagoja ñane ome Dupade uruode, iroquéode ore. A yijínango ñane enga a yicatecãcoi Dupade to ome ñane uje ejnaretaque yoque.
Satanás ucuei u ujetiga chĩro yocujnomé ueradode:
Adi jec u to uje yijínango Dupade Uruode aja quedéjnane gu jetiga soca seti yacaco uágome Satanás isocade iji pijogadode jnese. Yoquigaidi u ujetiga jé uacamóño uje chi Satanás chi ca chacája cucha gajnaréngone to go. Satanás píode u cucha ueradéjnane ga que ayorérique chiraja gotique.
Satanas e gajneque pisijnaringuéone ipesusórone ore, enga uté píode u ayoré sijnac enga unere yui ome jeta pojna dojórique ayoré. Satanás pi ga que chise anínique, ga que chise unerotiguérique go enga ca derocome ipesudode cucha gajnaréngone. A jnacare Dupade anguretasṍri, ga Satanás chacája gapu ueradéjna tome, ga e que chiraja go.
¿Gotique gu a uje aniri, jnani bajai etoi Samson pota tungãre purása pimojma, purása anire, guichaya uje que chudute Dupade urúrique? Chóji gari, doi dateringane ome, uje uaté urasade chejna abai Samson edodie jne. Satanás chacája udojo cucha ueradode ga que ayorérique, cojñotique ore doi ga ore chiraja go. (2 Corintios 11:14)
Satanás chi chacája ugárique nanique ga cho jetiga disi udé u gu ome Eba, yocaté, chequé bajé. A pésu ga jnacare ueradéjna, ga Eba que todo go. Que doi ga chirajaque go. Jé uacamóño ugade iji deréjnai tudé, diri tudé uje uñane uruchachade déji ga ueracho. Jé déji dicamichórone uje uruchachade ueradéjna, achinguirane ueradéjna uruchachade, ga chi adi u nanique ome jnani bajade. Satanás chacája ga chinoningase ga ayoré. Chiqueta raja yocaté chequé bajé te ga que chiraja gotique uje uga.
Jecute Dupade anguresórone uyoque jeta yirajágo udojo, ga jé qué yipojnáningo jorógome Satanás pírigo cucha ga a Satanás a chicai quedéjnane ome yoque jne. (1 Pedro 5:8 aja 9)
Jé uacamóño uje Jesus chojninga, “Satanás boji yejode, yachopise ua. ¡Cho jétiga yigaidode u baruode!” Chojninga, “Yigaidode u Yapade uruode.”
Mu Satanás chojninga, “Angári yu to jnenga jeta achaga bagataidie iji jnumi tiji yiquei tenga bajneque erámi tudé jne, úringai tu ueradéjnai,” chojninga.
Ecarai chacãra dacajnaquéode aja ayoréode uje ore churu ñane ga ore chijna úringai cucherãque:
Adi u uje ayoréode churu ñane nanique gu ujetiga ore chinoningase ñane ga ore chijna úringai cucherãque. Jeta ore chinoningasipise ore enga que ore cãra dabotígome darui, que ore anire, que ore chise darui unerotiguérique uje inoningayaque gu.
Adi u Dupade uje Dupade churu yoc, ga chinoningase yoque, ga ijnángo úringai cucherãque. Jesus úringai cucherãque u Cristiano uje Dupade ujnuchu Cristo ome dajnacari. Jécute yingome yoque jeta apota baringárique pinoningayaque ga ango Dupade ga chinoningase ua to. Ajína Dupade to jne jeta diga Dupade di. Chi Dupade di jne mu cáma yirajágo diringárique.
Jesus chatata darapiéringui ome ore:
Jé uacadúcho yocuruode uje jnani bajade ore u nanique marínga, uje ore changureta chaboto ugodie nanique. Ore chojninga: “¡Chabotodie e po que jõ, cucha garapiedie!’ Mu cuchiyi tu Dupade uje Dupade ujnacari Jesus chi chojninga nanique: “A yĩriapo jne rĩ ga yarapiérigui te jne. Yãrapiedie a u jne jetiga jnumi udé tãrara. Yãrapiedie u jeta guédodie basiji gatajnoquei tuté. Yãrapiedie jeta guedé toi jne ga topié jnumi. Yãrapiedie jeta guedoside diquiyo edo.” Mu yudúco unojo pujnomei udojo, jé ujnoméone udojo ga e iyaque yoquibai Jesus diringai.
Mu a ca angureta Dupade to enga a yujnuco jórogui ua to, bajnusi yoque rĩ. Mu que toc jeta yojnicome Dupade: “Dupade á, acarape ga ore nonama yoque to jne. Ãrope ore isijnaringuéone enga ore nonama yoque to jne.”
Mu Dupade que uruode u go. Dupade Uruode qui tu uje chojninga: “Yujnacari Jesucristo tẽra re ome ore nanique, enga uté anguretasórone uje qué ore déji jnumi enga ore chingo yuruode taja darasade ga jeta gosi pota ga changureta Jesus uté to.”
Jécute yingome uac, apota enga angureta Dupade ga angureta Dupade. Mu Dupade anguresórone ore gajnei tu jeta ore cha date bajade.
Ayoréode uyoque uje ugúcoi cojñone gari, ayoréode ore cha date bajade. Ore cha uje ore chigaru dagaredie nanique, ore cha uje choquibi ore. Ore cha uje ore chujé cojñone. Ore cha uje ore chujé dojode ayoré. Ga ore cha dadode ga ore chaquesu dacarane ga ita ore. Ga ore chaca boraidie. Ore chijna pocadie. Ore tagu cucha puyade: erámoronie, ore tagu tiguiriquidie, ore tagu cabayújnane. Mu ore chécãre dadode gu udojo.
Mu omi tu jetiga yécãco yocadode uje yicoi Dupade Uruode ga cojñone, Dupade urásarigo, ca ore chiraja daru quitíguiji yoque. U to ujetiga uerate yocujnoméone. Yécãco yocadode ga iyagopúsu yocate bajade. Iraja uje yiyágo yocate bajade. Yiyágo uje jnani bajade chigaru datoidie. Yiyágo uje choquibi yoc. Iyágo uje yujégo cojñone. Iyágo uje ore chujé dojode ayoré, mu amiri u jeta iyágo udojo jorane cucha ga yicoi ga yanguretágo Dupade ga yiquihíjnojo aja Dupade gánique jne jeta di ga di.
Jecute jecucha yingome uaque jeta gosi pota nóna darasade, jeoga gotoa pota nóna dabai, jeoga gosi pota nóna dacoté ore to, ga ango Dupade. Ga Dupade chĩro basijnaringuéone, uje Ujnacari Jesus cho basijnaringuéone oré uje toji curesei gai. Ga Dupade chinoningase ua enga báringai ayoré pijõre jogadi tu ome Dupade uje Dupade chimesẽre ua. Dupade a churúsãre bei iji gatajnoquei.
¿Gotique gu a uje cojñone churúsãre darusarane ome dachidedie piesórone cojñoc? Ore churúsarame ore íode tiji darujna aone jeta ore chiraja ga jé ũré ga ore doi oré tome. Ga Dupade churúsãre yoquíode iji darujna aone to. Chidójninga jeta jec ũré jeta yanguretágo ga yoqui déji darujna aoi pucuecaringuei gajnéone iji gatájnoquei. Ga Dupade chidójninga udojo.
Gusu yuruode ome yoque, mu soca seti jé yiguíjna yui ome gosi ga gosi chingoba daninaquéringome Dupade, dasocaringome Dupade, jeta Dupade chijína gosi to, jeta Dupade chátaja gosi, jeta gosi irasique Dupade Uruode.
Ujnomeraque gosi uje ũré ome danguretigai:
Gosi ga jec ũré ga changureta Dupade ga cha udojo yocájningane cucha. Ga yécãco yoquisocárique. Rosadé cha dorijnai. Cha jetiga chubúchu ayoréode. Enga gusu jetiga changureta Dupade. Que yijna borijnane to mu yetingare to nanique mu yiya. Chamáñaje Dupade chetaque udojo ome yoque. Soríané cha uje chijna dorijnane. Cha ga changureta Dupade ga Dupade inoningayaque ga i jé u Cristiano to. Ga unojo u jeta gosi pota changureta Dupade, chajna. Que chajna, enga chirate dojode jnani, jeoga dojode jnacare. Mu yiraco ñane aja Dupade adode ga jec u uje yoquiqui uté ome Dupade Uruode ga yiquérango iji Dupade Uruode iji guidai tudé. Ga yoquirasique yoque, enga Dupade chimo yocujnome ueradode enga irasique yoque to.
Ueradi u jetiga disi ejode chagutíyame Dupade uruode to iji ayoréode uruode:
Que yimo jeta yi Dupade Uruode to dirome iji Señora Marina, jeta yáta Dupade Uruode uñéngo aja ore jeta churúsãre, enga anire, yipéco iji ayoréode uruode.
Ueradi u ujetiga disi ejode, jnacarode disi ejo ore, ga ore chiraja yocuruode uñane, yocuru bajade. Jé soca seti ore chajire Dupade Uruode dirome iji yocuruode ga ore chijna yocuruode aja yoc jeta ore chacate yoc, jeta yimáco Dupade Uruode iji udojo darujna aone aja ayoréode uruode.
Jeta yicáji Señora Marina ga yacadape ome Dupade Uruode iji yocuruode enga quigade ga yicai yocurasade erámi jogonórone ayoréode udore jeta Dupade chátaja yoque enga jeta chátaja yu enga soca seti qué yise yurasade. Jeoga Dupade ajéo Dupade chaquĩ́ra yu iji durujñeque.
Jé uacamóño uje ayorérique ejnaretaque ga aníri que changureta jeta eca. Mu angureni u Dupade guerané pucuecaringuei ejoi. Jé yujnomei u uté uje qué yiqueca enga yangureta Dupade guerané pucuecaringuei ejoi yui uje chatire yijóningai ome yu iji gaté.
Nacore catecã́ri Dupade:
Amóñomi iji gate ga yicatecãrámi Dupade.
Dupade Dios, jé yicatecãrámi ua iji gajnerĩ. Yocacaranguipisape ua uje ugúcoji de, baruode jogadi, guiguíjna tajei, baruode jogadi iglésia. Yocacaranguipise gajnerĩ uje yingo babi Cristo i taja yoque uje daijna cuchábi tu ua, Dupade.
Yocacaranguipisape ua uje bajnerame yocuniri uje Ecarai chacate yoque. Jec aregape Irónguené, Soriané, uje catecã́ri ua ome yoc. Átaja yoque gajnerĩ ujetiga yocajneque bedaidaté ueradi, direcaringuei. Arote yoquejode ome Satanás piesórone cucha ore yúode. Yirajago gu uje Satanás chucue dasocáringome Dupade anguresórone uyoque ujetiga chinoningase yocujnomé ueradode, jecute arote chequedie, jnanione yoquejode ome uté iji dirode, dejade ore jnese. Yicatecã́ri ua iji bajnacari Jesucristo i. Amẽ.
*Soríané: Misionero bajaguipísode uje cinco ore nanique ore chise ayoréode mu chuque ore ome ayoréode. Enga ore yungórone uñai u Soríané nanique, mu yocacaranguipis uje e Soríané changureta Jesuse to.
Ecarai – Tobité, Bolivia – 1970
Marina de Morarie churúsãre Ecarai uruode udojo nanique
