Yirajago uje cucha amirone jecucha déji jeta pacadique yogome: (Tito 1:5)
Yirajago uje cucha amirone jecucha déji jeta pacadique Dupade anguresórone uyoque ome. Adi u Títo. Uté gajnei tu ujetiga chacate Crétagosóde ome cucha amirone to. Enga cucha amirone uñai ome yoque u pisoca omone uje yacágoja Dupade iguíjnai.
A yingorása uaque, aníri, Dupade irógabi uje i tu Tito adode ome dajnéone Dupade iroquéo uje doi Dupade iroquéode nanique enga cho darásade quique. Pablo ajéode ome uté jé cuguésõri Dupade ajéode ome danguresórone uyoque iji deréjnane unojo to, enga u ujetiga yangácoi Dupade Uruode ojningane cucha.
Que ayorérique chó Asojna ojningane cucha gáyode nanique:
¿Ama ayorérique déji siñeque a? ujeta doi Asojna adode nanique ga quigade enga noñome Asojna te ga ca doi Asojna ojningane cucha to. Úngare, ore doi ojningane cucha jnese nanique. Uje Asojnámia chojningame jnani bajade ore nanique: ‘Ca ójiyo yodi tiji jne,’ enga ore doi enga que ore chóji yodi gotique. A chojninga: ‘Ca apese cutérone iji jne,’ enga que ore chipese cutérone go. Chojninga: ‘A ore diji degúi te jne enga ore chaquesu ore bajaque jne,” enga ore chaquesu ore bajaque. Quigade enga ore taque.
Guiguíjnarique uje yamátago ñane aja ujetiga yangácoi Dupade Uruode iji, enga Dupade iguíjnai tu uté. Mu Dupade iguíjnapísi u danguresórone uyoque jnese enga chojningame yoque Dupa uecai Iguíjnai u ore.
Asojna chãraque chagúi ome jnacarode uje quene ore diapóji guidai nanique. Adi u Dupade to, chopo yoquiquique ome pisoca ueradode uje gosi di ga chacája iguíjnai. A yo yoquiquique jne ome pisoca ueradode udore uje Dupade anguresórone uyoque yicoi Dupade Uruode enga déji Pablo urusãraque bajai ome Corinto gosode. (1 Corintios 14:31-33)
Enga yipota ujeta yingome uaque uje Asojnámia gãreque ujetiga ayorérique taguíji, aníri, dabatigai. Enga adi jé u Dupade. Ujeta Dupade gãreque ujeta ayorérique cho dachorai iji iguíjnai ajei, enga uñeque chuchẽre dagóninguinone gai tome Dupade Uruode atatasṍri acajnaquéode uje chingo yoque. Enga a Dupade gãreque ujeta yoco yoquichoráji iguíjnai ajei jõ. Enga u udé. Dupade charãque jetiga yoco yocuágue iji ne enga yoco yocojñame ñane iji uné Dupade iguíjnai ajei ujetiga yoquigaidode u Dupade Uruode. (Hebreos 10:25)
Mu que yimo ujeta oyo yipojnaquéo iji unojo, mu Dupade Uruode quigode u ome danguresórone jeta yoco uñane quique. Enga u unojo ujetiga yingome uaque uje uacamóño uje yocangaráni e u Dupade uje e yoco chugúperamia iji Dupade. Jé yiyágo chugúperámia úringai pangarané uje yicoi iroquéode, ga e yicoi Dupa uecai iroquéode iji ejode udojo enga a yicoi Dupade ojningane cucha. Yitodógo chugúperamia nanique, mu quigade enga udúco uje Dupade u uje chijnórapise yoque. Jecute yingome uaque uje jec ũré uje jnani bajade ore tangári chugúperamia enga que ore doi enga que ore chó anínique gánique gotique, u ojningárique cucha.
Puyaque jogadi uté nanique uje poria uaté déji uje pioi tṍraji: (1 Corintios 14:40)
Uje Dupade chi chojningame Moises uje chi chiqueta raja, chi chojninga: “Jeque acáji poria uaté jne uje pioi tṍraji, mu ejñúape barídade bajaque, ga jé u ujeta abágui yu,” chojninga.
Enga Moises tangáripísi Dupade enga jĩrique chejñu darídade. Dupade chojningame nanique: “Ca ajose yi. Ejñu bachiédode iji ua uje puyaque yiyaridi unojo gu.” Uje Moises chejñu darídade enga jé u uje Dupade chajnéra daruode údi ome Moises, ga chojningame: “Uacayode Abraham, Isaac, Jacob ore angureni casica Dupa jé uyu uje badute yuruode iji de.”
Enga adi jec u uje que yacágoja Dupade iguíjnai tudé bisideque to enga ca yoco yoquichorája Dupade iguíjnai. Dupade déji danguresórone gari, ga que ore doi ga ore chujnieta, aníri, dajñiequégaja ajei. Que ore doi ga ore cana iji ajei. Que ore doi ga ore chimíñimi aja Dupade iguíjnai ajei.
Adi jec u Asojnámia adode nanique. Uje ayorérique chaquesu, aníri, ayoré uyatai ga que doi ga chujñieta uje chaquesu, aníri, chaquí. Que chujñieta go. Chamáñaje ore todo gu.
Jnumi chi chungare dabai nanique iji Coré, ore údi: (1 Corintios 10:11) Chi jnani bajai Coré, jorane ore chetaque Moises, Aarón ore úringane pangarate. Jecute chise diri nanique uje ore pojna ore údode, enga Dupade chudute enga doi enga chirota daroguipísode Moises, Aaron ore nanique. Enga chi pésu jnumi ujetiga chungare dabai to iji Coré, ore údi. Enga jnumi chaco Coré ore gai ga Dupade chirógapo pioque dequejnangóri taja ore jorane jnani to rĩ uje 250 u ore nanique. Ga chejna ore ¡jaripe!
Enga adi jé urásu ujetiga yitodógo Dupade úringai ujopierãque to, ga yicoi uruode ga yoco paráguiji iguíjnai ajei jeta yudúco uruode. Mu Dupade iroquéode orocoi ome yoque mu cáma yicopísi Dupade ojningane gotique. Jecute Dupade, que yimóngo isocai ome yoque. Mu Dupade Uruode u ome yoque uje yingome uaque ga, aníri, uje jnumi tagu Moises urasade. A Dupade chetaque yocatígo iji jnumi enga a chisi ome cucha gajnarétique ome yoque. Uje que yimóngopo yoquicaniratiguei rĩ, mu ueradi tu ujetiga yucuegoi Dupade ome yoque ujetiga chĩro yocate gajnaréngone. A ueradome Dupade uje anguretasṍrone orocoi iji yoquidai Tobité ujetiga yicoi ga yátago yógaja ñane ome adode, ga jé ca pujñiequérique déji ome Dupade Uruode enga a Dupade chátaja yoque iji guidai. Que yimóngo gotique – anínique gotique – pucutaquérique. Que yimóngo pucutaquérique ome yoque jetiga yicoi Dupade Uruode.
Jec ũré uje chi Dupade chojningame Moises nanique: “Boyo iji ore ujade ga yejna ore,” chojninga, “uje ore chujñieta yuruode gu.” Uje ore chujñieta ga ore cho Dupade iji deduguéjnai uñai ipesudi aquirájna gajnúrique. Dupade anguresṍri jé chaquĩ́ra jóroque Dupade, mu Dupade chajo raja, uje chamáñaje, aníre gu, chetaque ore adode ga que doi ga tangarápoi danguresṍri rĩ uje chaquĩ́ra. Que tangarápoi danguresṍri uruode gotique rĩ.
Enga jé adi urásu iji Tobite ujetiga Dupade chetaque yocatígo. Adi u, yocuñeque catecã́ri jóroque ome ãrérigui, mu Dupade chetaque yocadode ga que qué dopoi guéode rĩ. Que chuchẽrapo dangoniguitique gánique gotique rĩ.
Yoquejnaréngone jogadode gare iji yocúdode:
Jé uacamóño uje yingome uac ica uje yoquejnaréngone jogadode gare iji yocúdode. Yoquejnarei ayoré jogadi tu yocaoi ome Dupade. Jé basa ga yoquejnaréngone uñai jogadi tu yocáyipie tome yoquisijnaringuéone. Yoquisijnaringuéone jé gajnui tu yoquejnaréngone iji yocáyipie. (Salmos 66:18)
Mu ujetiga uté gosi chingo dasijnaringuéone ome Dupade, enga Dupade canirángome enga a pésu cucha arégode ome uté gosi jne. A chicadígui isijnaringuéone, enga úringai icha jogadi u iji quigade.
Udojo jé yingome uac uje uacadúcho uje a Dupade chimesẽre yóguiji guidai te ga a doi yoquicatecãraitigade, enga que yimóngo chaguhénique iji guidai. A chijócãre dequejnaréngone jetiga jec ũré enga yanguretágo Dupade. A chimesẽre yocatígo enga chójne guéode iji yoquibai. Que yimóngopo sequeré noñángueraque rĩ. A yocurasade iji yoquejode, sequeré noñaque ome ore mu yocangureni u Dupade iji de. Chisi ome sequeré omenie ome yoque. Que yimóngo chaguhénique ome yoc.
Yocangarádejnai diringai e idógosi:
Udojo u uje jec ũrépise Pablo ome dacajnaquéode uje chojningame suté jnani bajai Tito. Chojninga: “Tito á! Yijíñome ua, aníri, iji ore idai uje i tu Creta, yotequedéjnai ajã́ro,” chojninga. “Ujetiga acate ore iji,” chojninga. “Uje cáma yingo Dupade Uruode uñane aja ore to ica. Angome ore enga ore doi to,” chojninga. “Ore changureta to Dupade ujetiga jec ũré enga ango ore,” chojninga.
Enga jé ũrépise Pablo uruode ome Tito uté. Enga jé yisocai u to Tito isocai uje a yingo yoque to ome cucha amirone uje a cáma pacadique uagome to. U ujetiga yoco paráguiji Dupade iguíjnai ajei udé.
Jé uacamóño uje jecucha yingome yoque uje chi Yocangarádejnai diji jnumi tudé jne enga noñome detesórone ore iji jnumi uje jno danguresórone yocúdi. Mu iji udojo quigade enga a chajire erámi unirisórone ore adode aja quigode jne. (Santiago 5:8 aja 9)
Ujetiga ójiyo cucha otadi enga ajnusínaño Jesus itoringai:
Jecute yingome uaque ujetiga yijnángo chugúperámia adódaja Dupade iguíjnai te ga yicoi Dupade ojningane cucha ga jé ca anire yimóngo pujñiequégaja Dupade iguíjnai. Jé uacamóño uje yingome uac uje jnani uac, disi uaque. Mu uacarajáyo jnani bajade isocade to uje a ore doi chugúperámia atique ga que ore chó iroquérique gai gotique. Jnani bajade chojningame jnacarode: “A ca acho uacabotique iji erámi. Jé ca óji yodi tiji erámi,” chojninga. Enga adi tu Dupade iroquéode.
Jesus chojningame darógode nanique: “Ójiyo cucha otadi udé enga asáchoja yiríringai,” chojninga. “Acho arurei tudé ga asáchoja yiríringárique enga yiraja jne uje que acadíchoi yu gotique,” chojninga. Mu que yicoi Dupade ojningane udojo gotique to.
Mu jé ũrépise yu uje cáma yicoi Dupade ojningane udojo cucha to iji de guidai. Uje Jesus chojninga: “Ójiyo cucha otadi tudé enga gajnui tu yiyoi uje yojne ome yiyoi ome uaque,” chojningame jnani bajade. Chojninga: “Yojne yiyoi ome uacasijnaringuéone ga yiyoi tu uje chujé uacasijnaringuéone iji uacajéode,” chojninga. “Mu yiyoi gajnui tu, aníri, cucha otadi tudé,” chojninga. “Ujetiga ójiyo enga ajnusínaño yitoringai, jé asáchoja yiríringárique jne,” chojninga.
Enga udojo u uje cáma yicoi to Dupade ojningane. Uje chugúperámia chojninga: “Acho ujetiga aríño, ujetiga e ore chaquesu uaque.” Enga jec ũré Jesus chojninga to: “Mu acho arurégode enga asáchoja yiríringárique jne ujetiga amesẽcho yatígo,” chojninga.
Jé basa ga chugúperámia chojninga: “Ójiyo yodi ujetiga e ore chaquesu uaque.” Enga jec u uje Jesus chojninga: “Ójiyo yiyoi gajnui enga asáchoja yiríringárique jne enga yiraja uje que acadíchoi yu,” chojninga. Enga unojo u uje cáma yicoi to: Jesus aroi gajnui tudé arurei. Jé basa ga iyoi gajnui tu udé cucha adie otadi.
Uje caniráque uagome uacojode ayoréo enga jé cho ujetiga caniraque uagome Jesus:
Enga cucha amirone uñai tenga u uje Jesus chojninga: “Amesecho uacatígo ome yu,” to,” chojninga, “enga uje caniráque uagome uacojode ayoréo enga jé cho ujetiga caniraque uagome yu.” Enga unojo u uje cáma yẽcója Dupade gotique to iji uné guidai.
E gadioque yisecaranone uje cáma yicoi Dupade ojningane unojo to iji yoquiguíjnai Dupade uburúpie udaque. Enga Dupade ojningai tuqué ga e yingome uac: Oyo paráchoji Dupade iguíjnai udé ujetiga Dupade irótique chingo Dupade Uruode aja yoque.
Dupade pota tangari daradedie iji yocubusugágode: (1 Corintios 14:26)
Enga e gagájni yisecaranone, Dupade ojningane ome yoque uje chingo yoque. Mu chojninga: “Aracho yiradedie enga ajñecachója yu. Yangári uacabusugútigo,” chojninga Dupade, ga e chejna yijmanai uje chingo yoque, mu cáma yicoi to go.
Jé basa ga chugúperámia ojninga ucode, ga ore jno ga ore doi guesi tiji degúi te ga, jé basa ga que ore tagu iji erámi te ga, que ore chóji yodi te ga, u uné. Jé basa ga quene ore chóji yodi gajnerĩ enga u uje e ore chaquesu ore.
Enga jé cho Dupade ojningane. Mu jé ũrépise uje que unojo chona yoque Dupade ojningane. Déji yoque mu cáma yicoi Dupade ojningane jnese gotique. Jecute Dupade a chojninga – (que yimo jeta chojningame yu to) – “Davidé á! Yijíñome ua iji Tobité ujeta ango yuruode aja barasade ayoréode ore uje cáma ore chudute to,” chojninga.
Mu que yimo ujeta ojnigai u yu to. Que yimo ujeta ojningane u Pablo, Tito, Timotéo ore uje chojninga: “Ijíñome uaque iji Tobité. Yiroque uágaja Tobité ujetiga acacho ayoréode ore iji,” a chojninga. Mu que gusu unojo ore. Que gusu Davidé uyu, que gusu Pablo ore nanique ujetiga noñome yóguiji ne mu jé noñome yocujade iji to. A noñome Josuédé, Jómoné ore uje ore chiraja Dupade Uruode to. Jé basa ga ojningane u unojo ujetiga jnani bajade uje jé yocajnúone u Pablo uje chojningame Tito: “Tito á! yijíñome ua iji yote quedéjnai ajã́ro,” chojninga. “Ore idáyabi uje déji yote quedéjnai ajã́ro enga bo Dupade Uruode údi iji ore ujade,” chojninga. “Enga ango Dupade Uruode amirone aja ore uje cáma yingogome ore to diríca,” chojninga.
Cama yingome uagome cucha goso uje ibirácho:
Mu ise ga e yejna Dupade Uruode ujade uje yingome uaque. Mu qué cucha goso uje ibirácho ga que yiraja quitique uje cáma yingo uaque to. Mu a chise dínique ujetiga Dupade chisi ome darajatigai ome yu ga ujetiga cáma di, ga ujetiga cáma yitoi, ujetiga cáma Dupade jno yúdi jetiga chujé yaroi te ga, a ca yingome uaque jne. Jé basa ga a chise dínique jetiga Dupade cáma jno yúdi, jetiga cáma chujé yu, ga a yingome uaque jne. Orocoi Dupade Uruode uje ijocórase.
Cojñone iji erámi cãra dangaránone, enga ore cho parágaja ore iguíjnane:
Chi cojñone iji erámi uje que ore changureta Dupade ga ore pésu dangaránone iguíjnai, ayoré gajnui iguíjnane, ga ore chaca ajei ga ore cho parágaja ajei. Uje ore cho paráguiji jnumi uje e ore tangári, aníri, dacadisṍri acajnaquéode. Ore gaidi tu jeta ore tangári dacadisṍri acajnaquéode ga ore chiraja ujáningo.
Adi jé u iji dínique gajnerĩ uje pacadique disiode. Enga ore cho parac iji údi. Ore gaidi tu uje acajnaquéode chacája disiode angoninguinone enga ore chiraja acajnaquéode jne iji quigode.
Enga yacajnaquéode adi jé u to ome uaque uje Dupade chetaque ichorade iji daguíjnai ajei. Dupade imeserãi tu ujetiga yoco paráguiji uruode. Chamáñaje obiréjna ome Dupade gu uje yijnórango uté, enga que yoco cucha bisidéguiji uruode, uje yoco paraque gu iji iguíjnai.
Ecarai uru erueminórone u udojo:
Ueradi tupúsu ome Dupade anguresṍrone ujetiga Dupade Uruode jogadi tu domíngo. Enga ore urásu jetiga ore cháji degúi enga ore tangári Dupade Uruode iji. Jé basa ga jé tiógara, anírone, uje cáma ore changureta Dupade to ga deroco Dupade Uruode ome ore. Ga ore jno ga ore bac. Jeoga ore doi daguejnai. Jeoga ore chisõre.
Mu udojo yuruode unojo cho pipojnaquéode mu ise ga omío ome Dupade anguresṍripísode uaque. Adi tu uje jnanírique cho dajnacanique quic enga abi tangári dayé uruode. Tangári dayé uje cho quique. Ujetiga socasetí oyo uacaji yu ome Dupade Uruode enga angáchoi yacajnaquéode ga arócho Dupade Uruode yui iji domíngo. Socaseti yejnángo guesi ga Dupade chimesẽre yocatígo ga quigade ujetiga beyoi uacasatígo iji erámi, uacagaitígo iji datí. Enga jé basa ga ujetiga acanirácho ga domíngo maringa, jé beyoi uacasatígo iji Dupade Uruode quigade. E gusu.
Ecarai – Tobité, Bolivia – 1971
Faith Wyma churúsãre Ecari atatatgode udojo nanique
