Dijaide ajirigode Dupade urúo jé u Uroi (Danielné) ajirigode to:
Garósi to uje yajire Dupade Uruode to iji guedé jnoringai, mu yajirigode jé u Danielné (Uroi) ajirigode to iji durase. Ta jé chojmára yocajiritígo, mu cãra re, mu jé chojmára uje Dupade Uruode u.
Garósi yoque maringa, Dupade jé déji yocare:
Mu yoquirajatigade garósi ga jé tiógarapísaja yocacajnaquéode ome uaque uje Dupade Uruode qui u ujetiga garósi yoque marínga, Dupade jé déji yocari. Garósi yoquirajatigárigo marínga, yisígo yocujade ayoré iji, enga cho jétiga jiei to. Dupade que pota jetiga ca uruode déji iji deréjnane. Chisi ome yoquirajatiguei tome yoque gu uje yicoi Uruode to. Chisi ome yoquibijnani, yocatoi, yoquirajatigai, yocangoninguinone, yoquijmainie, yocuajatiguei, pininaquei; chisi ome cucha omone ome yoque gu jetiga yijnángo ome Uruode. Que chisi ome yoque bisideque go. Mu Satanas déji to uje chĩro udore iji yocujade.
Yijnángo Dupade ẽracáidode cucha ome yoque:
Mu yocacaranguipise ome Dupade uje jé yijnángo Dupade ẽracáidode cucha ome yoque uje Dupade que chachía cuchade gotique iji dapesudi uyoque ayoré. Socaseti cho darúja yoque iji anire, uje Espíritu Sánto di. Espíritu Sánto chi di jne enga chojninga: “Espíritu Sánto u ujeta chátaja uaque ga chisi ome uaque pirajatiguei, pirajatiguedatérique.”
Jecute déji yoque gajneri, Espíritu Sánto, uje chisi ome yoque ome yoquirajatiguei. Yirajágo cuchade jnese ome yocatoi, yoquirajatiguei, uje Espíritu Sánto ẽracáidode cucha. Mu uñane déji cojñone uje que ore chijna go. Dupade chisi ome ore bisideque ore irajatiguei. Enga que cuchárique tṍrapísiji go. Ore chijna ome Satanas atuatigade uje Dupade que pota go. Satanas que chijna Dupade ẽracáidode cucha, mu jé basa ga yocuñane ga yijnángo Dupade ẽracáidode cucha.
Dupade irasique uje que chachia dẽracáidode cucha uje tẽrame yoque:
Dupade irasique udojo cuchade udojo uje que chachia. Ta irasiguipise yoc uje que chachia yoquirajatigai gotique. Dupade chojningame cojñone uje cho darúja ore: “A yisi ome pirajatiguedaté ome uaque jne.” Mu i tu ‘consiencia,’ uje Dupade chisi ome yoc. Mu jé unejaque rĩ. Mu Dupade ẽracáidi ‘sabiduría’ ome yoc ujetiga yirajágo ga ‘sábio’ uyoque. Irajataque yoc. Ujetiga yipéco yocáyipierigui ome Dupade enga ‘sábio’ uyoque. Ajéode u ujetiga ‘conciencia’ déji yoque jnese. Mu Dupade ẽracáidapo rĩ. Uacamóño cojñone to uje ore irajatigai sué yoquibai te mu, que ore sué yoquibai go. Déji yoque to jetiga yipéco.
Jeta yipótago ga Dupade chisi ome yoc ‘conciencia.’ Jé unejaque ‘conciencia,’ jec unejaque ‘ciencia’ rĩ. ‘Ciencia” u cojñone ipesutedatéode uje Dupade chisi ome ore. Dupade urugaite yoc ome cuchade ujnojo uje chi ipotágo gu. Ujeta yipotágo ga yijnángo. Yocacaranguipise ome Dupade gajneri uje yuruode garósi mu iji guedé jnoringa tudé mu jé irasique re Dupade.
Irajágo uje irasique re uje garósi yógome múñi, jé urúo uje chojninga: “A uñeque gasu iji damochátique, enga dasoranéraque uñeque marínga, jé yátaja gosi. Jé yátaja jeta gosi tangári yu.”
Yocacaranguipis ome ujnojo uje yirajatigai garósi mu que Dupade chachia yoquirajatigai gotique. Jé yisíngome yocujode ayoré yoquirajatígabi enga Dupade irasique re enga chojninga: “Barajatigai garósi marínga, jé angome bojode ayoréo uje uacanguretáyo.”
Ca o ore acadisõre cuchábi iji ua:
Jé basa a gosi irajatigai jiei, mu que cuchárique tṍraji uje que chacate yoque gu. Que changureta Dupade ga cachi cuse. Gosi ta irajataque mu que cuchárique tṍraji. Irajatáguíji diríe uné mu, Dupade chajire quedéjnane ome. Dupade chetaque iji dajei uje que changureta gu.
Dupade chojninga: “Ca o ore acadisõre cuchábi iji ua. Dupade cho puyáguiji enga puyac ujeta o oracadisõre cuchábiji ua. Jé ca o eduguéjnai iji ua.” Uacamóño uje eduguéjnane to uje que ore cho ore acadisõre cuchábi iji re. Ore chiraja uruode quigode gu. Que ore cho eduguéjna iji re go. Ore chiraja uruode quigode uje puyaque ga que ore doi ujnojo go. Enga jec arec jeta yicoi ujnojo to ujeta yanguretágo Dupade. Jé ca yoco oracadisõre cuchábiji yoque. Jé ca yicoi eduguéjna iji yoc.
Yocacaranguipis ome unojo Dupade Uru garósiode. Jé gusu yatatagode, Dupade Urúo, ome yoque iji guedé jnoringai. Mu que yiraja jeta uacuñeque déji duruñeque jeta gosi pota enga chope quique Dupade Uru garósirigo to ome yoque.
Dijaide – Tobité, Bolivia – 1970
Marina de Morarie churúsãre Dijaide uruode udore
