Dupade anguresórone ore cho dajorane quique nanique:
Nacore (Rósadé) uruode u udojo:
Uacarajáyo Dupade Uruode. Yojningane u Bai, ore. Jnacare uaque. Ca oyo cocho cochógome Dupade yui. Ga uerate Josuédé (Dijaide) acajnaquéode. Ca bei jnumi ome Dupade adode jne.
Yoco yocasuté iji jnacarode uñeque jne.
Dupade chãraque cuchade; pijoque guetégode cucha, garéngone cucha. Jé ũrepise yu. Mu uacarajáyo uje Dupade anguretasórone ajicho Dupade Uruode udojo iji darujna aone. Mu uacarajáyo uje chãraque uje pacoté gárerigui. Chãraque pabai gárerigo, chequedíe uaque. Gusu tojmára ome chequéraque. Gusu bacotéraque chojmára.
Garéngone udojo déji yu to nanique. Mu que yudute nanique Dupade urúrique iji móntedie nanique. Ipésu udojo nanique. Jé yugúcoji eduguéjnane, Dupade abode ore gari, ga yicoi áyipiedie.
Jé ũrepise. Ca yipéco Dupade ujuredie. Yáyipiedie udaji ome uaque: Ucaré, aja Jómone, Urúidaté, Gatemitódacóde basocade. Ga atatáyo uacate gajnaréngone. Ga íjnoque gajneri. Ayáyo ga asáyo ore jmanáyone. Dupade áyipiedie jé u. Gusu yuruode.
Dijaide uruode:
Ueradepise Rósadé áyipie. Payuquetotiguei u uje Dupade chisi ome yoque, páyuquetotiguei. Chiraja páyuquetotiguei.
Rósadaté uruode:
Dejaque gadiógode udojo uje yipesudi udé. Moque unerotiguéode udojo udé iji dejade udojo. Uje yo yáyugu yu uje Satanas chirote yoque diríca ome Dupade Uruode uje e udúco Dupade Uruode to múñi. Jé yaquĩ́ra to diríca iji ore viaje casode ga unere erámi ome yu. Uje yabidie e ore di jnese. Ga jéode ti jé areguipise ore jnese. Jé a ca ãraque ore go. Pate gajnaréngone iji erámi. Ga yirasique uje yabidie ore chise yu jnese rĩ. Ga que yugúsiji anírique, to go. Puágueraque jé a e Satanas chetingare re iji dati ome yiguíjnai. Yácariji yijogadi diríca. Ga que yudute cuchárique to go. Jé a é Satanase chise yoque.
Yácariji yijogadi. Mu yimo Eruidaté iji de yiguíjnai piagoi. Jeode ti taquiri. Ga jé tangári Dupade Uruode to gajneri iji de yiguíjnai ajei. Yangári, mu e uruode déji Ucaré.
Chojninga: “Ucaré, jé yibágui uaque,” chojninga. Chi, “Yacho uje uacapésu anire, Elena jurédie iji erámone.”
Ga Elena jé po. Que unere erámi ome yu que. Mu jeodeti uje yabidie ca ore ipesutique cucha gajnareque déji siñeque. Ga jé yirasé yu jne ome Dupade Uruode. Ujetiga ca Satanáserique déji yu gajneri. Jé a déji yu.
Eruidaté chujé Ucaré gatoi. Ga yachẽ́re Eruidaté. Ga yucuase te. Jé yucuase, yumuchase aja te. Mu e dépoji Ucaré rĩ. Ga yisa pidi. Yisa pidi. Ga yujérase Eruidaté. Mu yajire. Mu yoquihermáno casidé jõra.
Ga yojninga: “E jeodeti unejángue u ua,” yojninga. “Jé a jé yoquijõra casidé. Yijõra u ua. Uje yingongo que yuruode aja Dupade iji ti diríca iji iguíjnai ajei,” yojninga.
Chajẽ chague yibai gu Eruidaté. Chague yibai Satanase, ga chirodipise yu iji yiguíjnai ajei. Jé yáyipie déji. Jnani bajai a ore adode. ¡Jeta yudute cuchárique to! Ga anire, yudute mu chajẽ Satanase chague yibai. Ga chiringare re iji yajei, ga que yiji go yajéode.
Ga jĩraque yojningame Eruidaté: “Jeodeti unejángue ua que. Ga yujérase ua. Yujérase ua iji Ucaré gai.”
Que yimopo iji dejaque gadiógode udojo rĩ iji ore viaje yui casé to rĩ ome jne. Ujetiga Satanase chajẽ chirote yu gu.
Mu acatecãchoi Dupade ome yoque to jne iji udé. Yocate gajnarei udé. Mu Dupade soca jé chĩro jne yocadode udojo. Ga yoquirasépo ñane to jne rĩ. Jĩraque yachẽ́re diríca unojo.
Yojningame Erúidaté: “A yingóngo Dupade jne rĩ yocuruode iji domíngo gajneri.”
Ga Eruidaté chojninga: “¿A yicoi jnese jne rĩ a? Acatecãchoi to jne Dupade ome yu iji udé. Yocate gajnarei udé. E gusu yuruode jne.
Dijaide uruode:
Ueradipise uaque uje uacangóño Dupade. Uje uacangóño uaquehermánone uacate gajnaréngone. Ga Dupade chojninga: “Angoño uaquehermánone bajaque. Ga quigade ga Dupade e chĩro uacate gajnaréngone. Yocacaranguipise ome udójo, uje Satanáse jiei iji erámi. Mu Dupade uruode chojninga ‘Uacanírique, ca jnoji uacáyipie. Arijínaño uaquejode iji erámi,’ chojninga Dupade.
Yicoi gajneri. Ga ca yajéngome gajneri Dupade. Uje yoquihermánapise Eruidaté diríca uje déji de to diríca. Mu déji yoquiquei uje yoco yoquihermána iji to. Mu que déji Dupade pijnani uje chojninga: “Ca átayo cuchade aja ñane gajneri,” chojninga. “Ga átayoja Satanase iji uacajei. Ca átaja yu aja uacajei,’ chojninga. “Ca anguretáyo yu. Ga ácajoji guesi.” Que udore déji Dupade pijnani gotique.
Josuedé chacãrája dacajnaquéode aja jnani bajai Josué isocade:
Jnani bajai Josué chi cho darásade quique nanique. Chi chojningame darásade: “Beyoi uacajegaitique iji erámi jne. Jeta anguretáyo Satanas, jeta anguretáyo Yangureni to. Beyoi uacáyipiedie.” Mu cho ore quique, chojninga: “Angári Yocangureni uje jé u yocayode jnani bajade ore iDupade.”
Ga jé ore catája Dupade urasade. Chi ore angaráni u uje Josué chãraque cuchade ome ore uje chojninga: “Ca anguretáyo Dupade gajneri, ga ca anguretáyo gajneri. Ca ajocáso Dupade gajneri,” chojninga. “Puyaque Dupade. Anguretáyo Satanase, ga anguretáyo. Ca ẽ́care Dupade i bisideque gajneri,” chojninga.
Mu yicoi gajneri uje qué yugúcoji erámi tudé. Tiempo qué déji ome Dupade ujetiga yanguretáyo. Tiempo déji. Anguretáyo Dupade jne. Jé yoquihermáno ñane. Jé ca unejaque yógome ñane. E gusu.
Bai uruode:
Jé ueradipise yoquihermána Rosadaté acajnaquéode. Uje que chudute cuchárique diríca, Dupade’s Uruode jé u gu. Ga nína darodie yui uje ore diringai u. Irasique darodie yui. Ga a gajnui u Dupade dirome ujetiga di. Ga queyirasique Dupade yui jetiga di dirome. Que yimóngo jetiga di gajneri, jeoga dirome u. Gajnui u uje Dupade irasique dabidie yui. Ga di dirome ga ore irasique Dai Dupade diringai yui. Jé uacamóño uje Dupade ipesute yoque. Ipesute queyibijnani ujetiga yirarã́co. Ipesute queyangoninguinone jetiga yangácoi cuchade.
Mu que yimo uje yajire Dupade Uruode iji cojñone uruode que. Mu chamáñaje yajire poquito versículo iji anire, queyuruode jne. Quĩrique jé cho udore Rósadé ore ojningáiso. Ore chojninga ujetiga ajnórañopise ñane. Ga oyo parácho iji jnumi ome ñane. Enga angáchopísi ñane quitígo. Quitígo chojmára ome ñane rĩ. Ca angáchoi cucháringome uaque. Ca oyo cucha daté iji uaque rĩ. Gusu jetiga ajnórañopise ñane. Angáchopísi uacojode ayoré.
¿Socaseti irajataque gosi ome uaque jne a? Dupade ajéode u ujetiga queyáyipiedie chojmára iji jnumi iji de, iji jnumi jóroque.rep Jetiga yidotágo yógome cuchade. Mu chamáñaje chequedíe jé arajáyo anire to gu uje déji Santiago. Mu que yiraja versículo. Josuédé a chiraja. Mu que yiraja jogadi gu uje ga que yatatame uaque. Mu Dupade urúo. Chojninga: “Adotáyo uágaja ome cucha.” (Santiago 4:1-6) E gusu udojo yuru poquito.
Dijaide uruode:
Uerate Bai versículodie uje chajire Dupade Uruode qué. Yocuruode. Uje chojninga: “Ca oyo cuchadaté iji uaque.” (Romanos 12:3)
Dupade chetaque. Uje udúco Pablo uruode to uje chojninga: “Ca oyo cuchadaté iji yu,” chi chojninga Pablo. “Que yipota jetiga ayorérique chojninga, ‘Irajataque Pablo. Irajataque ga chiraja cuchade jnese’; que yipota,” chi chojninga Pablo, Apostol Pablo.
Enga yocadi jé u gajneri. Ca yoco cuchadaté iji yoque. Chamáñaje Dupade chetaque. Yicoi ga yajico uje que yirajágo cuchárique.
Carolínadaté uruode u, mu catecã́ri Dupade bajaque. Chojninga:
Yoque Dupade, yacaranguipis uje yugúcoi baguíjnai tudé, yoque Dupade. Josuédé chiroque baruode aja yoque. Yoque Dupade, yirajágo uje jé bamo yocate gajnaréngone. Mu que yimóngo, mu bamo uje daijna cuchábi u ua, yoque Dupade. Ãrope gajneri yoquipesudode cucha gajnaréngone, yoque Dupade.
Yirajágo uje Satanase ipesucho yoque Dupade. Mu bajnué gai gajneri ujetiga ãro gajneri uje dajna cuchábi ujopierãque ua, yoque Dupade. Yirajágo uje que yipijójoji cucha gajnaréngone udé, yoque Dupade. Chácariji yocúdode. Mu jetiga bamate aja quigode gajneri, yoque Dupade. Yacaranguipise gajneri ujetiga asi ome yu to gajneri, pirajatigai, báyipie omenie, gajneri, yoque Dupade. Yanguretapise to gajneri, yoque Dupade. Ga uchie jnumone ome badode iji yajei to, yoque Dupade. Yacaranguipise gajneri ujetiga átaja yu to gajneri, yoque Dupade. Yicatecã́ri ua ome bajnacari Jesucrísto i. Amẽ.
Margarita e di diríca. Ga chacate yoque. Margarita chojninga: “Carolínadaté, ¿apota ya ujetiga jé angári?”
Que yiraja to gu jnani bajade íode. “Ta jé apota jnani bajai uje jnacari jno nanique,” chojninga.
Yojninga: “Margarita, cachi yipota yá. Yipota jetiga yudute Dupade Uruode to,” yojninga. Jé gapu uyu. Ga que yiraja darujna aoi mu yáyipie u. Yáyipie u uje yiraja udojo cuchade.”
Margarita chacate yóguiji udé diríca. Jé a ore chijnája dati Satanase. Yĩro yõrájnui iji de. Mu que yũruáji yõrájnui. Uje yajire, ga Margarita chingome yu uje chi ujnacari uné nanique. Chingo yu. Chingo yu. Ga que yũruáji go. Mu e ore di. E ore di. Ga ore déji yoque paca paca paque. Mu jé ore chijnája jne dojñane rĩ.
Jé ũrési suaqué yihermánamia suaqué. Chojninga: “Que yijosa cuchárique déji siñeque.” Mu Eruidaté di. Ca chácariji te. Ga, mu, gatíjna.
Eruidaté chojninga: “Yajéode jé yingosía Jómone. Mu Ucaré chapite yúi ga,” chojninga Eruidaté.
Mu jĩraque yagu yui jõ. Mu je ore tangári yu, yujodie chequé. Yojninga: “Eruidaté yá, ueradi u sereringai ujetiga ango Jómone, ore gajnerí,” yojninga.
Mu yujodie chequé ore chojningame: “Jé bo. Ga bei Ucaré, gajnareque ore adode.”
Enga e jno Eruidaté. Chojninga: “Yiape.” E jno.
Mu e yiji to. Ga yijína. Mu Ironguené chojninga: “Ironguenaté á, ca ararãre iji ti to jne,” chojninga.
“Cachi yajire ore,” yojninga, “Dupade a jé ajéo gu jetiga yuchie jnumi. A yaquĩ́ra jne,” yojninga.
Yiji to diríca ga yijína ore to. Mu a jé chujé qué. Yajire udore, jé u uje yoquihermáno ñane. Yajire ore ga. Mu yaquĩ́ra Eruidaté. “Eruidaté yá, bei guesi. Ga ajni to.”
Mu yujodie chequei ore chojninga: “Jé go, jé chaquĩ́ra. Je dóji ga chujé,” ore chojninga.
Mu yojninga: “Úngare. Dupade que ajéo u go jetiga chujépise dojo ayoré,” yojninga. Carajnoque ore pojna yu uje yaquĩ́ra udire ájninganenie.
Mu yojninga: “Jé yajéo ga que yiya.” Jírape yangureta Dupade nanique. Mu jé yi. Ga yijína purupatáringai. Ujetiga yojningame yujo ayoré, “¡Chi uati chujé ua jne á!”
Yacaranguipise uje e chĩro ore ujetiga yiyapúsu udojo pate gajnaréngone. ¡Jeta yangári!
Carolínadaté chatata dadode:
Yugúsiji uta ica yidai Urucu. Mu chajẽ táguedie di. Ga ore chojninga: “Ebedérodaté yá, ¿adute to a? Ujetiga chi ajócãre Goránaté ore iji udé jne.”
Yo yáyugu yu. Mu yabai narare ome yu. Chojninga: “Jec ũré.”
Yojninga: “Ironguené á, ¿jé yo ringome dara pijnimingore udore jne a?”
Mu yabai chojningame yu: “Acatecã́ri Dupade ome ore, udire ore. Ca angári dara purupataringane,” chojninga. “Mu jé yacaranguipis anire, yangácoi yocacadingórone ore ga ca yangácoi purupatáringane.”
Yabai chojningame yu, ga yiya.
Dejaque ica ga yo yáyugu yu. Mu e yujé yu aja gai. Jiei yate gajnarénngone.
Yugúsiji Rincón ica, yidai Rincón. Ga yicatecã́ri Dupade. Yise udojo Tobité. Uje cáma yangári cucháringuiji to nanique. Yudute Oroné acaditigade. Oroné narare ome yu. Ga chojninga: “Ebedérodaté, Dupade chetingare ayorédie ore jã.”
Yabai toi ica iji yidai Rincón. Ebedéro chojninga: “Ité, aya bangári jne uaté gotóraque. E ore toi. Chequésãre Chequeca casé.”
Mu yojninga: “Ebedéro, úngare. Dupade chi etingarã yoque,” yojninga. “Yoquidai Tobité nanique ga Santiago (Jim Ostewig) abi toi,” yojninga, “Mu jé yangureta jne ga jé yangureta jne,” yojninga.
Que yurúo udore go jetiga yiya. Jecucha yudute uje yujodie chequei pésu yuruode. Mu que Dupade ajéo go. Que Dupade ajepíso go. Jetiga jé yangarapoi purupatáringane rĩ.
Yabai narare ome yu, ga chojninga: “Ironguedaté ya, ca angári purupataringane. Ca angári.”
Ise ga purupatáringane pota jetiga ore chijnime yu iji Dupade Uruode ya. Mu que yipota. Que Dupade ajéo go jetiga yájni gai. Jetiga yiya ica mu yájni gai rĩ. Dupade Uruode u uje que jé yapáji údode.
Que yipota jetiga yo yurupatáringa go. Ujetiga yujé yiguiotique yihermánorique rĩ.
Gapu gatódape yu nanique ga yósi jṍro to. Jeodeti ca páyipieraque déji siñeque nanique. Jé páyipie omenie déji unojo Dupade iguíjnai udé.
Yo jṍro to nanique. Mu yabayode toi. Ga yigana, yigana, yigana. Ga yabayode jiei. Yate gajnarécho. Ga que yibasíji yúode. Yigana nanique. Ga yoriarása yujo gapu abai. Mu a yipésu yáyipierigui ga yiya. Uje móntedie nanique ga que yiraja cuchade.
Jé ejode udojo ga que yipota ujetiga yipésu Dupade ujuréraque go. Chajẽ chacája yajei gu Dupade Uruode. Jé yóji Jesucristo iyoi to. Ga yacaranguipis uje a chĩro to jne yabai, yocate gajnaréngone.
Yabayode toji yari iji dé.
Yacaranguipis uje Dupade a chĩro jne yocate gajnaréngone Ejábiadacóde uyoc. Yiraja to uje chi Dupade anguretatodie uyoque, jé yoquihermáno ñane iji jnumi tudé. Ga yiraja. Yiraja. Ga que yangári yujórique ayoré yui go. Jetiga yipésu darai. Ga yipésu yujóraque ayoré ajedotáningai. Yacaranguipis uje anire, yingongo udojo aja Dupade. E gusu yuruode.
Dijaide uruode:
Jé ũrepise Ebedérodaté uruode uje pesapo ome yoque páyuquetotiguei tome yoque rĩ. Uje Dupade uruode qui jé u uje chojningame yoque.
Uje Jesute jé cho dacadigode quique enga chi chojninga: “A ore pésu uacajuredie jne. Satanase pésu uacajuredie jne. Ga Satanase a arane u uaque jne. A cojñone ore chojningame uaque jne, ‘Urũso.’ Gajnareque ore uruode ome uaque jne. Que ore changureta yu gu – mu anguretáyo yu gajneri,” chojninga.
Pacádaté uruode, mu catecã́ri Dupade bajaque ga chojninga:
Yoque Dupade, yocacaranguipis uje e ugúcopóji baquei udé rĩ, yoque Dupade. Mu que cucha uña gotique uje Satanas ipesudode cucha u uje chacája yoque, yoque Dupade. Yocacaranguipis ome ua jetiga ãrope gajneri udojo cuchade iji deréjnane udojo. Que cuchárique déji siñec ujetiga chĩro cucha gajnarétique. Gusu ua uje bãro. Arajapísaja yoque gajneri, Rosadé, Rosadaté, ore uyoque gajneri. Yiyáyo gajneri uje yoco yocáyugu cuchade, cucha gajnaréngone. Gusu baruode jetiga déji yocajei. Mu yuchéco yocangoninguinone gai ome ua. Jeta ba-Espíritu Santo chacapísaja yoque gajneri. Ga jé ca yangácopísi cuchade udojo gajneri, yoque Dupade. Yicatecãcoi ua ome babi Jesucrísto i, amẽ.
Yirasique uje e ugúcopóji udé rĩ baquei. Mu que cuchárique jnese go jetiga yatatágo. Gusu uje ore di iji poridie diríca. Ga ore chojninga máranie gaisórone ore déji te. Yoquirasique. Ga yoco jetiga e Dupade di iji de yocari iji udé jnumi. Ga yoquirasique ore yui uje e ore di. Jeodeti ca cucha gajnarétique gu. Que yirote ore yui to go. Jeodeti ca cuchárique déji gu.
Yojninga: “Yi jne. Yicai chaco jne. Yiji yoquibosode jne. Que yipotápo cuchárique rĩ. Ga ¡jetiga déji yajei pisijnaringuérique rĩ! Que yipota cucha uñeque. Yĩríngo mu e yipésu cuchade. Que yicatecã́ri Dupade go ome cuchade. Gusu uje yitoji yajirigode gai. Jé cuchárique a déji siñeque. Yacapísa yajei. Mu déji. Mu yacája. Mu cucha gajnarétique que déji yajei go. Guedé jno. Ore chatata cuchade. Mu que yipota cucha gajnarétique jetiga chacája yajei go. Que yipota pisijnaringuérique go. E yudute ore uruode ome yangoninguinone.
Ore chojninga: “Jómone chi Ucaré ore pota ñane.”
Mu que yipota jetiga cuchárique chacája yajei. Que yipota Satanas atique go.
Yojninga: “Jé areque, yicatecãcoi ome ñane gajneri,” yojninga.
Mu Eruidaté a ca áyipie déji Dupade atique. Ga jĩraque áyipie déji Satanase. Ga que yaquĩ́ra Eruidaté go. Jetiga yojninga, ‘Ayape. Ga yicobi Dupade adode bajaque.’
Ga ejo Jómone ore to jne jetiga ore di. Yudute ore uruode, mu que chacája yajei go. Que ipotapísa cuchárique. Que yipota Satanase atique go. Ga e yiji ga yicai ta. Ga yĩri ga Dapure chojninga: “¿Adute to a uje Eruidaté chujé Ucaré a?”
Yojninga: “Yiraja. Jé yudute to,” yojninga.
Yṍraji Elena. Yise yijogadi. Yicatecã́ri Dupade. Que yáyipie que déji Satanas atique go ome yujóraque ayoré jetiga yojninga, “Yibágabi. Ga yipojna jne.”
Gusu Dupade adode uje déji yajei. Que yipota jetiga yipésu cucha gajnarei iji Rósadé iguíjnai ajei. Uje yiraja gu uje a yiyáguego iji diríca uje e Jesucrísto chĩro yoque, yoquisijnaringuéone. Ga que yipota Satanas ome Rósadé jeta Satanase chajuque agute. Gusu Dupade jetiga Rósadé, Josuedé ore chacate yogome adode, yoquihermáno Jómone to rĩ.
Mu a jé yatecãcoi Dupade ome ore jne uje gajnáreque ore adode. Mu a jé yatecãcoi ome Dupade jne. ¿Socaseti chijnápo to rĩ a? Que yipotapísa jetiga yipésu paje dotãringárique.
Yirasique uje Jesucrísto e chĩropise yisijnaringuei. Ore pésu dáguedie mu que yibágapoi ore to rĩ go.
Yipota jetiga yiraja darujna aone. Ga yajíraja quigode. Jetiga yacate yujodie chequei to. Mu etoque ome yu jetiga yiraja. Que yiraja gotique uje que yiraja go.
Ipota jetiga Ucaré ore chatatarása dadode to, Jómone ore. Ca ore chajéngome. Que cuchárique déji go. Ore hermánopíseráse uyoque to jne rĩ iji de diri uje Josuedé, Bai ore chingo yoque. Ga e chĩro yoquisijnaringuéone.
Mu Eruidaté que chiraja to go. Ga qui jé uté uje chajnerame Satanase isijnaringuei. Yipota jeta Eruidaté cho yu to. Jetiga ca chudúdapo cuchárique rĩ. Yudute cuchade, mu yududipise ome udojo yangoninguinone. Jé ca chacája go. Que yipota jetiga yojninga: ‘Qué yajirape Elena ore iji te jne.’ Ga Satanase chise yu jne iji te. Mu que yipota go.
Ore chojninga: “Aquesuidé ore di.”
Ga yajéode yosõre Aquesuidé ome cuchárique. Cuchade uje jeodeti chirarese yu. Aquesuide di mu que chirarese yu go. Yáyipie déji Dupade. Uje yabai paráta. Yabai pero uje ejnaretac.
Ga yihermáno di iji yu. Yajai ga yirasique uje chise yu. Cho jetiga Dupade e di iji de. Uje yajai di. Mu yáyipie mu jĩraque chachẽrapo Dupade rĩ. Ga que yibógo.
Yáyipie déji yabai uje pero. Íjnoque jetiga yihermáno tagu yibosode. Que tagu go uje yabai pero. Que yiraja yipesutique pose. Mu posode urásu Dupade Uruode ta yisi ome. Jeta yacate yajai ome Dupade adode. Ga posode urásu.
Yacaranguipise uje yatatágopo iji de rĩ yocate gajnaréngone, Satanase aringaquéode. A yujóraque chequé chise yu iji yiguíjnai jne. Ga cháguejna ne ga chojninga: “Yigaidé u ua.”
Ga yojninga: “Ejẽ́. ¿Apota ga apojna yu? Mu Dupade a chĩro bájningai jne.” Yajéode jé u udojo.
Yudute uñane diríca darade iji dejai. Ga ore chojninga: “Atatayo ba bacaringanie agupierẽ iji te ore iquei.”
Úngare, que yipésu cucha gajnarétique go. Que yipésu yujóraque chequé ajedotáningárique rĩ.
Goto chise yu iji yiguíjnai ga goto pojna yu ga yojninga: “Yacaranguipis uje bapojna yu.”
Que yipota jetiga yo uaté Sára, chequé bajei. Chi ore chojninga nanique ome chequé bajei Sara: “Chi ore chise ome abi uje chi Dupade chisi ome uaté jne.” Ga cana ore gai. Chotigase ore. Ajosipise ati taque ore, mu a jé ũré Dupade.
Ore chisi ome abi ome, ga jé ũrepise ore. Enga Sára abi base nanique enga i u Isaac. Tṍra re uje e abi bisideque. Ca bisideque, mu jé ũré Dupade. Ca yotigáco ome udojo chequé bajé adode. Jé ũrepise.
Yadode jiei mu jé yatata, mu Dupade chiraja ga chĩro. Que ipota go jetiga ájningarẽpise yu ome Dupade. Gusu uje yatata cuchade. E gusu yuruode.
Dijaide uruode:
Dupade uruode chojninga jetiga Dupade uruode qui jec u jne. Uacamóño yocaté Eba uje Satanase chãra. Ga chojninga: “Agu, taque Dupade.”
Satanase tṍraji ipatiguéode ome yoque uje yanguretágo Dupade. Ga chapúsaja dabíode cucha ome yoque. Mu yujnusinángo jetiga Satanase chapúsaja dabíode ome yoque.
“Yangureta Dupade. Que ipota jetiga yipesute Satanas atígo,” oyósi te. Ajócãcho Satanase. E gusu.
Jómone uruode:
Jé ũré chequedíe ome dacajnaquéode ome Dupade adode.
Mu Dupade uruode déji to uje anire, que etoque ayoréode ore uyoque. Cojñone ore uyoque iji erámi jnese ga serẽrachuque yoque gosi ome yocanguretigai. ¿Jec ũré yu a? (1 Corintios 10:12)
Ga anire: Ucaré ore canare iji erámone. Mu que cho jetiga yiji. Jetiga yojninga, oré gaté yu. Mu a ore cho ore gaté iji yu. Uje ore chutai yu iji degúode. Mu gusu Dupade uje chiraja anírone, yocáyipiedie.
Dupade chiraja jnese iji ayoréode uyoque. Chiraja anire, yoqueruei. Ta jec ũré. Ga ayoréraque jetiga yipéjo cucha gajnarétic. Uje a yipéco ga yirajágo yoquipesutique gajnaréngone jogadi u. Chiraja aníone, cucha ibirade uje que piraque yui. Mu e chiraja. Que cucha ibirátique cuse ome Dupade gu. Uje chiraja cuchade jnese, anire, iji yocáyipiedie.
Mu a yingongo udojo yocate gajnaréngone. Jé uacamóño uje cucha anírone, puyaque to uje ayoréode uñane ore yiyágo. Uacamóño chugúpẽre casicaite to uje puyé nanique, mu uje jnanione ore cha.
Ga chãraque udojo anírone, cucha puyade udojo Dupade Uruode. Ga jé yijnángorásaja anírone, uruode udojo, jetiga yiyágo ojningane cucha to uje puyácho, jé basa yipéco cuchade uñéngo uje pota ome yoque. Jetiga ca yujnusinángo cucha gajnarétique rĩ.
Uje chi jec ũré ga anire, Dupade di jne. Ujetiga jec ũré ga yanguretágo ga yirajágo yoquiqui. Jé basa udore ore uje changureta Dupade, ga ore chiraja daqui. Ga cuchade udojo quigode déji ujetiga jec ũré yanguretágo. Ga yicoi ga chi yicoi udore. Mu jé ca yicopoi cucha gajnaréngone rĩ.
Ga yingongo yoquijõráringo uje Dupade anguretasórone u ore. Ga yiyáguego iji ore iquei. Mu ¡cho jetiga aníri, ujetiga íjnonguirase! Chajẽ qui jé uté cucha gajnaréngone ome anire, ujetiga gosi chijnóraja date gajnaréngone.
Jé basa ga gosi changureta, ga cha anírone, jnumi u gu, uje anire, pimoquereringai adode u gu. Uje chaquesu re jnaque. Ga chapúsu. Jé basa chi ca gosi cha, ga jé chijnóraja. Ga que toque jetiga anire, íjnoque ate gajnaréngone. Ga jé yadi u ome chequedíe.
Dijaide, Nacore, Rosadaté, Bai, Carolínadaté, Pacádaté, Jomone – Tobité, Bolivia – 27 de julio de 1975
Transcrito por: Marina de Morarie
