Dijaide catecã́ri Dupade:
Dupade, yocacaranguipis ome ua iji deréjnai tudé uje yujnusínangopo ua rĩ, yoque Dupade. Bamo yoque jnese, yoque Dupade, iji jnumi tudé. Que bamojmárique cucha cus ujetiga ca chimo yoque. Mu icatecã́ri ua gajnerĩ ome yoc ujetiga yirajágo baruode quitígo to gajnerĩ, yoque Dupade. Que yirajágo baruode quitígo, mu garósosi uje yajneque, mu baruode que qui tu ujetiga batṍri yoc ujetiga yoquirajatigade jiei, yoque Dupade, iji baruode. A garósi yoquirajatigade iji baruode marínga, mu qué batṍri yoc ujetiga yicoi baroquéode.
Yicatecã́ri ua iji deréjnane jnese ome yoque, yoque Dupade. Bamo uje uásejna poguiédode. Que ayorérique déji siñeque ujetiga uerate atígome ua jnese, yoque Dupade. Jé cho yu, uje que uerate yatígome ua jnese, mu yigaidi tu baroquéode, yoque Dupade. Jecute yicatecã́ri ua ujetiga átaja yu gajnerĩ, yoque Dupade, enga yiraja yuru quitígo iji yujode ayoréo iquei ome baruode quitígo yoque Dupade.
Yacaranguipis uje yise baruode, yoque Dupade. Yise uje yicatecã́ri ua jetiga yiraja baruode quicho. Mu yicatecã́ri ua iji dirode jnese ga diga bangome yu, yoque Dupade, ome cuchade quigode jnese ujetiga yajnésãco baruode quigode, yoque Dupade.
Enga yirajatigai ome baruode quérã iji deréjnane jnese, yoque Dupade. Átaja yu gajnerĩ jeta yiraja yuru quitígo ome ayoréode ore, yurasade ore. Uje que yiraja baruode quitique, mu yacaranguipise uje batatame yu iji deréjnane to ujetiga yajire baruode enga que yicadígapo ua rĩ. Yoque Dupade, yacaranguipis ome ua uje bangome yu uje bojninga: “Yibájoi ayoréode.” Enga bachája yiquei baruode jnese omitigade ome ore, yoque Dupade.
Yacaranguipis ome ua uje bamo uje íjnoque Satanase poder iji yu. Enga ba-poder e déji yu, yoque Dupade. Uje Satanase poder u uje gajnáreque. Chetaguipise baruode, yoque Dupade, ga idája Satanas, irógode iji ua, yoque Dupade. Jé idógosi barógode iji ua, yoque Dupade.
Yacaranguipis ome ua gajnerĩ uje bangopísome yu barusarane uje bacháji yiquei, yoque Dupade. Átaja yu gajnerĩ, jeta yiraja yuru quitígo gajnerĩ iji baruode, yoque Dupade. Que yajéngome gotique múñi, Satanas u uje déji yajei ga yajéngome baruode diríca, yoque Dupade. Angopise baruode ome yu iji deréjnane jnese iji yiquigade, yoque Dupade, mu ujetiga bajéo jeta déji yajéode, yoque Dupade. Ca be yajéode iji gajnerĩ uje bajéngome yoque ujetiga jec ũré Satanas déji yajei.
Yiraja uje bangome yu, bacha baruode aja yiquei, yoque Dupade. Mu que cho jetiga gusu yoque, Dupade, uje bacha baruode aja yoquiquéode jnese, ayoréode uyoque, ujetiga yirajágopise baruode quitígo ome yoque.
Atapísaja yu ujetiga yiraja quitígo ome baruode ome banguretasórone iji yocurágue ajei.
Átaja Davídé to iji sañeque ujetiga diapo jne iji guidai rĩ.
Yacaranguipis ome ua ome cuchade jnese, yoque Dupade. Yicatecã́ri ua ome bajnacari Jesuse i. Amẽ.
Yucué ujetiga Dupade Uruode quicho ome yu, ome ayoréode yocate gajnaréngone:
Yacaranguipise ome Dupade iji deréjnai udé uje Dupade chingo daruode aja yu. Domíngo bajai diríca uje yajengopísome Dupade Uruode iji quigade. Mu chise diri uje yitodo yujode Dupade anícho, quicho, Dupade uruode quicho, ujetiga yajnai jnumi mu que yise go. Que yise gotique. Yajire mu jé ate. Jé ate uje que yise diríca. Que yise Dupade Uruode quitíque go.
Mu jecucha yajire. Yucué ujetiga Dupade Uruode quicho ome yu ome ayoréode yocate gajnaréngone. Yocate gajnarétic. Yucué, yucué, yucué, yucué Dupade uruode múñi, jé ate. Mu iji ejo uje que yise gu, uje Satanase chãraque Dupade Uruode ome yu. Chãraque ga que yise iji Dupade Uruode go. Que yise ga que yajire Dupade Uruode go. Jé ate.
Mu yicatecã́ri Dupade iji yajei. Que yiraja uje yajéngome yu, mu Satanase u uje chãraque Dupade Uruode ome yu, enga que yise cucha dacatique iji Dupade Uruode ome yu, enga que yise cucha dacatique iji Dupade Uruode go jetiga yiji Dupade Uruode. Mu chise dire uñai enga dire uñai diríca enga yajire Dupade Uruode.
Yajna jnumi. Yojninga: “¿Jé dési rique Dupade Uruode quigode, jetiga Dupade Uruode quigode?” Mu jé ate. Que yise go. Enga e achopise. Enga e achopise uje yicatecã́ri Dupade.
Jomoné catecã́ri yoque ome Dupade uruode nanique:
Mu aníri, ugúcoi campamento, ayoréode campamento iji Santa Cruz uéchai. Jomone catecã́ri yoque ome Dupade Uruode. Chojninga: “¿Davídé, arajáyo Dupade Uruode jnese to a?”
Mu Davídé chojninga: “Jomoné, que yiraja Dupade Uruode jnese go.” Mu ueradipise Davídé uruode ome yu uje chi ca chiraja Dupade Uruode jnese go.
Ga Jómone chojninga: “Davídé, yocate gajnaréngone garani tu Satanas iji ujade. Jé garani u yoc iji ujade to.”
Enga Davídé irasiguipise Jómone. Chojninga: “Jomoné, jé arec. Jé areque Dupade áyipiedie ga ate sijnaque yu.” Enga Jómone chacate yoque poquito ome Dupade Uruode. Chacate yoque.
Mu dire uñai yucuegopoi Dupade Uruode rĩ. Yajningopo aja anire rĩ. Yajningopo yoquiquigade ome Dupade Uruode. Uje yicatecã́ri Jómone. Yojninga: “Jomoné, ¿Dupade Uruode quitígo déji rique iji erámi jetiga Dupade chetaguipise yoque?”
Mu Jomoné que chiraja quitique go. Que yirajágo quitique gu, uje Satanase chetaque ujetiga yicoi Dupade Uruode. Que yiraja quitique go. Davídé que chirajápo rĩ. Que yirajágopo gotique rĩ. Jómone que chirajápo rĩ. Que yirajágo gotique uje yicadíjoi Dupade Uruode gu. Bijna iji yocatoidie.
Mu yajníngoja ga yicagoi eduguéjnane uje ore chiraja Dupade Uruode quitígo jeta ore chátaja yoque. (Mu chise diríca ga jé yico. Yucuegopoi rĩ.)
Mu don Len u uje chiraja. Chiraja Dupade gueteguipísode. Chojninga: “Jé obiréjna cuchade jnese ome Dupade,” chojninga don Len.
Mu yojninga: “Davídé yucuegoi diríca udore mu que yijnicórique cuse. Uje Satanase áyipiedie déji yoque gu.”
Jé basa don Len chiraja. Chojninga: “Jé jiei cucha dacadode jnese,” mu chatata uje chi ome Dupade ujetiga gosi chujé dojórique ayoré, jeta chiraja Dupade, mu jé chujé dojórique ayoré uje chi cucha detéguipise u udore. Mu chi gajnui jec upo ujetiga uacuñeque pésu cucha gajnáretique ga gajnui jec u. Dupade chi chãraque. Ujetiga gajnui jec u ujetiga uacuñeque chujé dojórique ayoré. Mu adi jé u.
Cáma yisóco Dupade Uruode iji yoquiquigade. Cáma chacája yajei go. Que yise Dupade Uruode unétique go. Que chacája yajei. Que yiraja. Mu dirode udojo u uje que yajire Dupade Uruode uje Satanas qué chãraque Dupade Uruode ome yu. Charángome yu ga que yise Dupade uru quitique go.
Yise udojo yajegaidi casodé Dupade áyipiedie:
Mu diga deréjna casodé e yise diríca. Yise. Ga yacaranguipis ome Dupade to. Chingome yu udojo. Chingome yu. Yajire urusarane. Yise udojo yajegaidi casodé Dupade áyipiedie. Yise iji uruode uje chingome yu.
Chojninga: “Be udojo.” Ga yajire enga jé u. Uje Dupade chojninga iji daruode: “Uacuñeque a gajnáreque atígo maringa, gosi chajnésãru yu ga yisapo uaque gosi rĩ. Acatecãchoi yu iji deréjnane jnese.” Chojninga: “Ujetiga gosi pota,” Dupade chojninga, “enga a yátaja uaque jnese. Que yetetique déji uaque go. Mu jé uaqueteque yu,” chojninga uruode. “Ujetiga gosi cha yu enga gosi chajnésãrapo yu rĩ enga yajnésãrapo gosi te rĩ.”
Chojninga: “Ujetiga irajágode sue gai que, gosi catecã́ri yu ome dajegaitique cucha ga a yisi ome gosi. Enga que toc jeta qué bijnapome uté gosi rĩ.”
Uje yajire udojo enga yacaranguipis ome Dupade acajnaquéode ome yu iji deréjnane. Chojningapome yu rĩ: “Ujetiga uaque gosi pésu, ga uaque gosi chojninga: Yangureta Dupade, mu gosi que changureta, enga gosi jé ãra u re. Chãra re. Jé basa gosi uruode uerácho uje chojninga: Yangureta Dupade, ga jec ũré ga que chãra re go.”
Idájapise Dupade Uruode to diríca, mu yacaranguipise uje chisi ome Espíritu Santo ome yu rĩ. Chisi ome yu ga jé que jnoji yu gotique.
Pajegátigai u uje Satanase déji yu diríca, ga yajéngome aníri, Dupade Uruode. Yajéngopísome Dupade Uruode, mu Dupade chijocase Satanas iji yajei, enga e déji yu aníri, Dupade Uruode iji quigade.
Enga yacaranguipísome to udojo uje Dupade que etatique cuse uje cháta raja yoque. Que etatique cuse go. Ujetiga yipótago yipeco cuchárique, enga yicoi. Ujetiga ca yipótago, enga ca yicoi.
Uje Satanase déji yu enga, diríca enga, ipota ujeta yiya. Ga jé yiyapúsu Dupade Uruode. Enga que yanguretarása to ujetiga ga yãraque yu ome Dupade rĩ. Mu Dupade jé chajo raja yu to uje Espíritu Sánto chiraja. Yiraja iji yajei Espíritu Sánto, ga que yicadígui Dupade Uruode go. Yicadígui mu, que yicadígui. Dupade que chicadígui yu to go. Ga jé déji yu.
Chingo daruode garósi, garósi, garósi aja yu. Yacaranguipis ome Dupade uje que cucha uajátique cus ome go. Uje chi uajádome ayoréode uyoque ga que uajádome Dupade go. Que toc ujetiga yipójo yocatique ome Dupade go.
Dupade chimo yoque jnese, yoquipoguiédode cucha, cucha gajnaréngone. Dupade chojninga: “Idájapise uáguiji yu, mu jé yijnóra uac.” Adi u yocáyipie dépoi aníri diríca, Jonás rĩ.
Jonás u uje chi quejna ome Dupade. Chi quejna ga chi jno. Chi pota jóroque ujetiga pógu re ome Dupade. Mu chi Dupade chimo enga jé urásu uje Dupade cho dajuñame suqué. Mu pésu udore gu ujetiga Jonás catecãrápoi ome rĩ. Ga chajnésãrapome rĩ. Jnusinapo date gajnaré casodé ga catecã́ri Dupade iji aníri, oyite cuchábi ajei. Catecã́ri ga Dupade chudúdapo rĩ. Uje jé déji anire múñi, gajño pioi ajei múñi. Cáma gajño pioi, mu e Dupade chosi dajuñame, mu gaidi u ujetiga chijnimapome rĩ iji aníri, oyite cuchábi. Dupade pota chijnimapo Jonás iji ate gajnaréngone rĩ. Ga chi jé u uje que toque anírami, suté anírami, Jonás. Que toque jeta qué ayorérique yimóngoporase rĩ iji oyite cuchábi ajei.
Mu chi chajnésãrapo Dupade rĩ. Chajnésãru ome Dupade ga Dupade chichapoi aja diri rĩ. Ga jec u uje chi ca chapo rĩ iji ejoi. Chacate cojñone iji anire, iji udore idáidatéode. Ga que pesapo date gajnarétique rĩ, uje Dupade e chichapo iji dirie gu. Chimo re diríca iji Dupade ujuyaquei ajei, mu chi ca chajnésãrapo iji daquigade iji ejo rĩ.
Mu yocáyipie udojo u uje Dupade chisi ome yoque anírone, udore quigode ujetiga ca yiyágopo rĩ ujetiga yocajnui su aníre, Jonás, uje Dupade ujuyagarãque mu chichapoi diríe rĩ. Chichapoi diríe rĩ enga changuretapise Dupade iji ejoi. Enga jetapũré uyoc enga a ca yimóngo Dupade ujuyaquérique go, uje irasiguipise yoc. Irasiguipise yóguiji deréjnane, uje cho dabi iji yoque gu yocanguretaretigai iji Abi Jesuse.
Jetiga gosi pógu datique, ayorérique, mu jé u uje pógu iji dajei. Chingo raja erámi, gaidi u gu ujetiga ca ore chiraja. Mu Satanase jĩraque déji gosi. Mu ujetiga gosi pota jeta chajniapója Dupade gai rĩ, enga bisidode déji. Bisidi déji. Bisidi u ujetiga gosi chajnésãrapo rĩ.
Yacaránguipís ome Dupade uje yise Dupade Uruode to rĩ. Diríca u uje yipota erámi jogonórone cucha ga yijos eti ueracho. Mu Dupade chingome yu diríca, chingome yu iji daruode.
Cojñone iplátadie bijna. Ayoré, cojñone origuidedie bijna. Gosi ujeta ugucharãque, ugúchade bijna, jé aja ayoré gajnaréngone ore uguchade a bijna to jne. A cuchade bijna jnese iji erámi. Cojñone ipotiguéode bijna. Udore cojñone ore jódode uje cojñone ore irasique, yote pioi uje cojñone ore chóji enga ore chisi ome dajõrane a bijna to jne to rĩ. Udojo u uje Dupade chingome yu. Uje que yise Dupade Uruode quitique, enga yiraja uje udore bijna to ome yu, uje que yiraja cuchárique diríca, mu quigade enga bijna ome yu enga yicadigui.
Udore u uje chingome yu, Dupade:
Yuchẽre Dupade urusarane gai ga jé u uje yijnorapise udojo. Yijnorapíse Dupade uruode. Ga chatatame yu udojo. Cho ujetiga Dupade jé upúsu, mu jé u uje cho gojñame yu ome unojo. Cho quique uje ore chojninga: “Cuchade a bijna jnese jne.” Unojo yajiríringai. Que cucha onique chi ca déji jnumi go. Que cucha onique cuse go jeta yijnóra udore, cuchade iji jnumi tudé.
Mu chi cucha omi déji ayorei iji de ujetiga qué tiempo déji ome yocuñeque, enga gosi changuretape Dupade. Jetiga gosi ca pota Dupade ga, mu Dupade tibidi gosi. Tibidi iji deréjnane jnese. Dupade que chetaque yoque go ujetiga ayorérique catecã́ri. Que Dupade chetaque yoque go.
Mu guetei chojmára iji yoc. Guetei u yocate gajnarei. Chi ipéco cucha gajnarétique ga ayoréode uyoque. Ga Dupade e chajire quedéjnane ome yoque. Adi jé u ayoréode uje yajico quedéjnane ome cuchade, cucha gajnaréngone. Chi ujetiga ipéco cucha gajnarétique ga Dupade e chajire quedéjnane ome yoc.
Jé basa, Satanase a irasique yoque uje ipéco cucha gajnarei. Mu uje qué yipéco cucha gajnarétique, enga Dupade chingome yoquisocade ome yoque. Uje yipésu yate gajnarétique ga Dupade Uruode déji yajei enga yiraja yúringai máraque ome Dupade. Mu Dupade e chajire ta. Jé chajire quedéjnane. E cho dáyugu. E cho dáyugu.
Jé basa Satanas irasique re uje e chijócãre Dupade Uruode iji yocajei. Jé basa Dupade chetaque yoquisijnaringuéone, mu chijnóra yoque. Jé basa gosi ujetiga Satanas uruode déji ajei, ga Satanase chajire quedéjnane ome uje uté gosi cha adode. Mu Dupade jé basa, irasique gosi uje cha Satanas adode.
Mu Satanase chucuepoi dasocáringome uté gosi rĩ, chucué, chucué, chucué, mu Dupade surupúsu gosi gai. Suru gai. Enga Satanás que chise dasocárique ujetiga gosi uajádiji Dupade Uruode.
Jé basa gosi ajirítigade chi gare. Ca gusu Dupade Uruode uje gosi chajire, mu ajirique Dupade to. Changureta Dupade enga changuretapo uruode rĩ, enga chajo raja dajirítigade udore gatuaque.
Satanase chise ga jĩrique chacája. Chise dabi tiji ga jĩrique chijócãre Dupade achietigade iji ajei, Espíritu Santo. Mu que toc jeta qué cha. Mu qué Dupade chacapo ajei rĩ. Udore u uje Dupade chingome yu udore uje chi Satanas, Dupade ore chijócãre ñane iji uñane ajéode.
Satanase a déji yajei. Ga a e chijócãre Dupade omítigarique jõ. Dupade idája iji yu. Dupade que gajneque yu. Que edo chajire yu. Dupade uruode chi qui u udojo. Uje chingome yu iji arode. Enga yajirapo Dupade rĩ enga Dupade chajirapo yu rĩ. Chajire yu.
Yicatecã́ri Dupade. Jecute Satanase e serẽrája iji yajei. Adi u uje Dupade chajnésãra iji yajei te rĩ. Dupade Uruode quigode u udojo iji daruode. Yacaranguipis ome Dupade uje yise qui; Dupade u uje cho gojñame yu.
Explicó cómo podría estar limpio de nuevo. Porque Dupade también me dijo que cuando echa a Satanás, se va. No solo hace esto por mí. Dupade regresa para ayudarnos a todos. Y cuando regresa, se queda conmigo. El Espíritu Santo en mí es fuerte entonces. Y cuando el Espíritu Santo está en mí, él echa a Satanás fuera de mí y lo hace irse. Y Satanás siente lástima de sí mismo, porque volvemos a Dupade. Y eso es lo que sucede: hay una pelea en nuestros corazones entre Dupade y Satanás. (Gálatas 5:17)
Yipótago Dupade ga Dupade chijócãre Satanase tiji yocajei uje ipótago Dupade gu. Jé basa, ipótago Dupade que, mu ipótago Satanas enga chijócãre Dupade enga gusu Satanase iji yocajei.
Ga udojo u uje Dupade chingome yu cuchade udojo. Uje yicoi uruode, Dupade áyipiedie quitígo, enga Dupade chátaja yoque. Mu que yise diríca. Mu e yise iji deréjnane udojo. Cachi u uje yijnorapise acajnaquéode ome yu. Acajnaquéode que cho jeta gusu yu. Dupade Uruode chojninga: “Idájapise uáguiji Dupade jnese.”
Ajiri u uyu. Ajiri u ayorérique. Chajire ua iji quedéjnane. Chi ca déji siñeque jeta Dupade ca churúsãre yocate gajnaréngone. Churúsãre yocate omitigade. Jetiga yocatígo, mu e chicháji darusãrai. Jeta yatique gajnáreque ga e chicháji. Mu yicatecã́ri ome yodi ajei ga chĩro uqué case enga chicadígui. Chojninga: “E yĩro. Acadígui to. E acadíjoi.”
Dupade e chĩro gu. Cho jetiga gosi ca pésu cucha gajnaretique diríca. Chĩro. Tṍra darujna aoi. Chĩropise. Ga Dupade pésu ga yicadíjoi. Dupade Uruode déji jnese ome yoc jetiga gosi chajnésãra Dupade, ga Dupade chĩro gosi ate gajnaréngone. Enga tṍra darujna ao casé. Tṍra darusãra casé aja guesi. Bamo uje Dupade Uruode e chátaja yu. Espíritu Sánto e dépoi yu rĩ iji deréjnane unojo. Dupade chingome yu daruode. Chingome yu uje chi ca cucha onique déji jnumi. Que cucha onique cuse go. Chi gusu omi tu Dupade. Chimopise yoque uje icatecãcoi jnese. E gusu udojo ome yocate gajnaréngone uje udore u uje Dupade chátaja yu. Garósi yirajatigade, mu yacaranguipise ome Dupade uje chingome yu dajnéone unojo.
Uje Satanase déji yajei enga charanguipise Dupade Uruode ome yu. Yicadígui. Satanase chãraque Dupade Uruode ome yu, enga que yise quitique go. Que yise quitique, mu diga yise iji quigade. Uje querénga yise deréjnane to Dupade Uruode. Mu Dupade chingome yu udojo. Uje chicháji yiquei.
Ga u udojo cuchade. Ujeta apota ga bei udojo quigode to. Ujeta ca apota ga ca bei. Uje Satanas uru qui tu uje chingo yoc uje gajnáreque Dupade Uruode. Jé basa Dupade chetaque Satanase. Satanase chojninga: Cucha bisidécho Dupade Uruode.”
Mu Dupade chojninga: “Jé uyu u uje yujnué cuchade gáyode jnese. Gusu yu.”
Cachi Satanase urúo uje ore botãre ñane ome daruode. Uje chi ore chisipise dabáyode, mu jé ũré Dupade. Jé basa ga ãrapataquechoquí Satanase uté. Jé gusu udojo.
Puruode quigode:
Poder – Ujopié
Ba-poder – Tu poder
Poquito – Garósi
Tiempo – Guedé jogadi
Dijaide – Tobité, Bolivia – 1970
Marina de Morarie churúsãre Dijaide acajnaquéode udojo
