Comai uru bajade:
Yocacaranguipis iji dejai tudé ome yoquijõrai Dabidé (Ecarai) ojñane uje tṍraji yoquijorane Guidaigoso ore idai. Enga yacaranguipise uje irajágo uje e Guidaigosode uacagúsoji Dupade Uruode jogadode to. Jecucha icatecãcoi ome uac ujetiga aníri, adúcho Dupade Uruode to ujetiga angáchoi Dupade Uruode ujetiga anguretáyo Dupade to.
Dupade Uruode u uje ũré, ayorérique que urúo gotique, mu Dupade urúo:
Irajágo uje a ca ũré enga arajayopise uacarasade cojñoque ore acajnaquéode, uje ore irajatigade ome ayoréode uruode qué garósi. Mu ore ipotigádi jé u yoquipotigádi. Jec u jnese ujetiga yingongo Dupade Uruode ome uaque. Ipotágo ujetiga yingongo Dupade Uruode ome uac ujetiga arajáyo to. Yoquipotigádode u ujetiga arajáyo uje cho jetiga yocurúo gotique Dupade Uruode. Gusu uje ingongome uaque uje yirajágo uje gusu Dupade Uruode uje ũré. Ayorérique que urúo gotique. Mu Dupade urúo.
Icatecãcoi Dupade ome uac ujetiga beyoi Dupade Uruode to. Ipota jeta yimo uaque iji dire uñeque ujetiga yingo Dupade Uruode ome uaque to. Ujetiga yatata yadode jnese uje aníri, jé ũrepise Dupade Uruode. Mu Dupade ipotigádi jec u to jetiga aníri, ayoréode yiyágo yocadode jnese. Ujetiga yiyágo yoquisijnaringuéone. Ujetiga yajnángo Dupade ujetiga yanguretágo ujetiga yicoi uruode jnese.
Dupade chi pésu erámone unojo icaite ome dajopié:
Irajágo uje ayorérique que yirajágo erámone unojo isocárique gotique uje pésu re icaite. Mu yirajágo uje ayorérique que ipesute erámone gotique. Déji Dupade Uruode uje chi Dupade ipesute cuchade unojo icaite iji erámone jnese, erámone jogosórone cucha iji taningane. Dupade Uruode chatata uje, iji taningane ga uje chi cáma ayorérique, cuchisórique déji erámone icaite, ga Dupade chi pésu erámone unojo icaite ome dajopié.
Dupade chajuque ijnangununie enga díreca ijnangununie petique:
Dupade chi pésu erámone unojo iji taningai enga chi Dupade chimate erámone unojo iji díningo uje chi chojmára iji yijmanu uñai. Dupade Uruode chatata uje iji taningai enga Dupade chi chijire erámone enga chi gusu ijnangununie icaite iji erámone unojo. Mu Dupade chi pésu ijnangununie ga chi chajuque pajei ga chi Dupade pésu, chajo ijnangununie aja uñane. Chi díreca ijnangununie petique. Dupade chi pésu cuchade jnese jetiga ayoréode jé ca yotigáco. Dupade pésu diri ujetiga ayoréode ore yisago cuchade iji ujetiga yisoco ujetiga yipéco cuchade, ujetiga yipéco uruode. Jé basaja Dupade pésu dejai te gu jetiga ayoréode ore yoco yocujñare iji ujetiga yimóngo.
Quigade ga Dupade chi pésu dírecaringuéi iji taningai te ga pésu ijnangununie. Dejai ujetiga jé cãra re ome diri ujetiga yimóngo iji, enga yoco yocujñare iji. Mu Dupade Uruode chatata uje chi gusu yodode icaite iji jnumi iji taningai.
Dupade chi pésu yodode enga chajuguiji ñane iji:
Que yurúo gotique mu déji Dupade Uruode ujetiga yajico iji. Chi gusu yodode icaite iji erámone. Chi chaco jnumi gai, mu Dupade chi pésu yodode enga chajuguiji ñane iji. Jec u uje chajugunápo yodode iji erámi tenga, jec u uje Dupade chi chajuque yodode iji ñane enga yodode charidode chojmára. Anírone tiedie jogadode jé chojmára, gajñonie, tuijnane uje cáma tie jochade. Enga Dupade chi pésu jnupe cajnóri to. Enga Dupade chimate dapesudode unojo.
E que yotique dépoji erámi jnese rĩ mu Dupade chi pésu cuchade uné ore. Ujetiga ayoréode yimóngo ipesudode ga ca yotigáco jec aja dirode unojo.
Dupade chajo yodode aja ñane enga uéchai uñai je qué déji dajogadode uje tie u uje yodode dacagode ga Dupade jé ipesucho jogadode. Quigade enga jec u uje jnupe cajnóri, jnumipísi, chi pijoque to. Dupade chimate tiedie, erámi jnupe cajnóri ore. Yoquiyaripi jnupe gajnerĩ erámi tu ore.
Dupade pésu cuchade uje sue iji erámi tudé:
Ga Dupade chi aníri, chi chimo uje chi jé arec ujetiga pojníngui sue iji dapesudi jnupe cajnóri. Ga jec u uje Dupade, iji jnupe cajnóri tudé, Dupade chi pesapo poridie rĩ ujetiga sue iji jnumi. Pésu cuchade uje sue iji erámi tudé. Enga jec u uje iji jnupe cajnóri tuté enga uje erámi yoquiyaripi jnupe.
Dupade chi pésu cuchisode jnese iji erámi uje cuchisode diguiji:
Ga Dupade chi pesapo cuchisode iji rĩ; cuchisode jnese uje déji erámi tuné. Dupade chi pésu. Dupade chi pota jetiga cuchárigo déji ipesudi tuté jnupe. Enga pésu cuchisode. Anóningacho Dupade Uruode. Dupade chi pésu cuchisode jnese iji erámi uje cuchisode diguiji. Jec u ayoréode yoquimone cuchiso ponáyo iji erámi jnese. Dupade chi pésu poridie enga poridie chi adie cuse ujetiga cuchisode tagu. Enga jé jnumi tupo to rĩ uje Dupade ipesudápo rĩ ujetiga ayoréode ore quigade dirome enga ayoréode ore aníri, yichajo to, jeonga ayoréode ore yipéco yoquejnatígo iji ujetiga yajo.
Quigade enga jéc u uje Dupade pésu cuchisode jnese uje chimate erámi tuné. Chimo erámi tudé ga chimánapo cuchisode rĩ. Enga Dupade chi pota ujetiga ayorérigo déji to ujetiga ore nóna ipesudode cuchiso jnese iji erámi.
Dupade chi chimate ayoré bajai, ayoréode yocajnu jnacare:
Dupade chi chica jnumi urui. Enga chipocásu dachabei ga chi pésu ayoré tiji. Chi pésu ayoré tiji jnumi tuné ome datirai enga chimate ayoré adode jnese: jmanáyone, jmanecade, orotadode, edodie enga chi chisi ome ayoré pucuecaringuei tome. Mu quigade enga Dupade chubúchu dapesudi tuté ayoré ujunane ga Dupade chisi ome áyipie ueca tome. Enga jec u uje Dupade chi chimate ayoré bajai, ayoréode yocajnu jnacare.
Jnani. Jnani tuté chi i tu Adã. Dupade ipesute jnacare bajai tuné iji erámone iji imani erãpe, yoquiyaripi tuné. Ayoréode uyoque jnese yocãrani tu Dupade ipesudi tuté jnacare, uje i tu Adã. Dupade chi chubúchu ayoré tuté ujunane ga chisi ome áyipie tome, áyipie ueca. Enga ayoréode yocúringai ayoré e u. Yocúringai áyipierãc e u jec iji dirode udojo gajnerĩ. Enga jec u uje Adã chi nóna Dupade ipesudode cuchiso jnese.
Dupade pota jeta jnacari atajasónique dojo ayoré cuse:
Adã a pésu Dupade anírone imaningone cuchiso íode jnese. Enga íode jé u íode udore uje íode gajne iji dirode unojo. Enga quigade enga Dupade chi chijire dapesudode cuchiso jnese. Uje chi ore nóna ñane aja quedéjnane jorónga. Dupade imoi tu uje cuchisode, cuchiso choqui nóna cuchiso chequé. Enga chi ore nóna ñane aja quedéjnane. Enga chi ore cháta pininaquei taja ñane uje ore nóna ñane aja quedéjnane.
Enga Dupade chi chojninga: “Areque to jetiga jnacari anínique cuse to, atajasónique dojo ayoré ujetiga ore catecã́ri ñane. Ujetiga ore nóna ñane aja quedéjnane. Ujetiga ore cho uñeque.” Yingo jnese uje Dupade a pésu cuchisode enga pésu choqui, pésu chequé to ujetiga anire, cuchisode chõre rac ujetiga quérã ujetiga irágu erámi.
Dupade chimate chequé jeta nóna jnacare bajai:
Jecute Dupade chisi ome yoque gatei ome dapesudi jnacare, yocai jnani bajai uje i tu Adã. Enga chi Adã chi mo. Jnacare bajai, Dupade imanique bajai, ayoré chi mo. Enga jec u uje Dupade chi chijnime Adã orotabitique. Jnacare bajai orotabidi tenga Dupade chi pésu chequé tiji. Enga jec u uje Dupade chi chimate chequé jeta nóna jnacare bajai enga jec u uje Dupade chi pésu chequé tiji orotabidi. Enga Dupade a chimate chequé tiji, enga jec u uje anire, jnani cho cuyuque to, niji to, iji aniri, damochádi.
Enga chi chimo chequé tiji, chi chimo chequé tiji dejoi. Enga chi jnacare bajai chi irasé chequé enga Dupade chojningame jnani bajai: “A bátajató, ayoré tuaté jne,” Dupade chojninga.
“A jé átamája jne,” chojningame chequé, “uje yipésu ua iji jnani orotabidi tenga badode a jec u jnacari, jnani adode jnese jne. Ajnóraño ñane jne,” chojninga. “A jé ca adosóyo aja ñane jne, enga yipota to ujetiga õcho uaque to ujetiga aquéraño to iji erámi tuné ga uásejna uaque to jne.”
Dupade cãra dapesudode jogadode ujetiga ore unirone cucha uerate ome ore:
Jecute Dupade isocai tuné uje Dupade chimate erámone unojo. Mu yajníngomá yoquiquigade rĩ. Dupade chi pota ujetiga que chimate cuchade bisideque. Chi pota Dupade iji taningai ujetiga imaningo cucha ucode aníningo cuse, gajnesóningo cucha.
Jecute Dupade chi pésu cuchade jnese ujetiga unirisóningo cuse. Enga Dupade chi chijire yodi te mu yodi que unirisóningo cuse gotique enga Dupade chi jec u uje pésu oyídode uje uniri tu yodi. Cuchisode jnese uje cho daniri iji yodi chi Dupade pésu to. Jeque oyídode jnese uje jé cãra rome ñane: arócojnane, cucujna gajnúone, jé u cuchade jnese.
Dupade chi pésu cuchiso udore ujetiga cho daniri iji jnumi ujetiga imaníngo cucha unirisóningo cucha jnese.
Dupade chi quigade ga chi pésu gaté unirisórone cucha to ujetiga chóji gaté yui enga u chugúperone jnese. Jec u chugúperone to uje uásejna ga cãra rome ñane. Dupade pesapo cuchisode rĩ ujetiga cho daniri iji jnumi.
Enga Dupade imaningone cucha aníri, unirisórone cucha jnese:
Enga Dupade chi pesapo guedoside rĩ ujetiga guedoside uta chijñate ayoréode, cuchisode ore gai jnese, Dupade imani erãpe to iji dejai. Dupade pésu guedé ome diri ujetiga chijñate ayoréode gai iji diri, jeque Dupade pésu guedoside ujetiga chijñate erámi tuné, ayoréode ore gai iji dejai. Enga Dupade imaningone cucha aníri, unirisórone cucha jnese. Unirisórone cucha upúsu jnese. Jecute Dupade, jé yimóngo jec aja dirode unojo gajnerĩ.
Dupade imaningone unojo cucha iji uruode u uje que taque Dupade gotique. Ũrepise Dupade. Dupade imani tu tuté dire, jec u diri, dirode uje yimóngo iji dirode ujnojo uje Dupade pésu gu jetiga ayoréode yimóngo. Yujnusinángo ipesudode cucha ga yirajágo uje Dupade Uruode ũrepíso uje imóngo Dupade ipesudode cucha.
Ayoréode jnese, cuchisode jnese yoquipesusṍri chojmára enga Dupápisi u:
Que ayorérique yoquipesute erámi tuné gotique. Dupade ipesucho. Dupade ipesudode. Ipesudi dejaque, jé u dejade uje yimóngo gajnerĩ uje ayoréode yimóngo jnese. Dupade imani tuté diri. Jé u diri te gajnerĩ uje imóngo cuchade to. Dupade ipesudi jnupe. Jé u erãpe. Jec u yoquijogosórone erãpe. Dupade ipesudedie pori erãpe gatoi jec u yoquimoi. Erãpe gajne iji dirode unojo. Dupade ipesudode cuchiso u yoquimone cuchiso jnese. Dupade imani tuté jnacare bajaque u ayoréode uyoque uje quigade dirome ga ayoréode yocãrapiesṍri jec u jnani tuté, chequé to rĩ uje chequé anire, chequé ore chõre raque ga yocãranone u ore.
Ayoréode que yórango iji sañeque gotique. Que yórangoji cucha uñeque gotique. Yocãrani jec u jnacare bajai, Dupade ipesudi jnacare bajac uje chi i tu Adã icaite. Jeque ayoréode ore yocãrapié chequé chi i tu Eba icaite. Chequé bajé tu, Eba, uje Dupade pésu. Ayoréode uyoque yocaté tu. Jeque ayoréode ore yocai tu Adã, jnacare bajai. Ayoréode ore uyoque, cojñone ore jnese, ore yocãrapi tu Dupade ipesudode jnacare bajaque, ayoré bajaque ore.
Jnani bajai, acoté ore uniri bajaguipísi u Dupade jutícabia:
Enga quigade enga Dupade chi chijna ore aja dejnatique, yocai jnani bajade, Adã, Eba ore. Dupade chicha cuchade aja ore gai jnese ujetiga jé ca ore fuerza cuse ome dacuetique cucha. Dupade chi chicha ore aja dejnatique uje chi cuchade déji jnese. Dupade chi diji ore gari, dapesudode ayoré bajaque ore. Chi chicha ore aja dejnai te que. Chi chicha cuchádaja ore jnese, ore posode. Dupade imaningone cucha jnese ujetiga ore tagu ujetiga ore nína ránguiji ujetiga ca ore chicadígui Dupade uté. Enga ore doi uruode jnese iji taningai nanique. Ore doi uruode enga jé ca ore chimoc ujetiga ore doi urúrique mu ujetiga Dupade ipotigádi icha ome ore ujetiga angoninguite guesaque ore.
Clave:
Fuerza – Etotiguei
Comai – Zapoco, Bolivia – 1960
Marina de Morarie churúsãre Comai acajnaquéode unojo nanique
