Dupade gãrengué pore chojmára nanique:
Dupade chojnirame ore: “Adã, Eba, acho cuchade jnese tiji yejnai tuné. Enga arocho cuchade jnese iji.”
Dupade Uruode chatata uje iji taningai icaite erámi taningane ga cuchisode parácho jnese icaite. Cuchisode uñane chicai dasocade icaite iji isocade iji dirode unojo. Dupade Uruode chatata uje Dupade chi pésu cuchiso ponáyone jnese. Chi parácho cuchisode jnese icaite enga cuchisode chi ca asécho gotique icaite iji erámone taningane uje qué Dupade déji Adã, Eba ore gari iji dejnai. Ugade chi parácho icaite. Caratade chi parácho. Cuchisode chi ca asécho. Chi parácho jnese.
Dupade pota chiraja jetiga angoneguite guesaque ore ome:
Dupade chi chojnirame Adã, Eba ore: “Acho yejnai jnese jne, cuchade iji poridie jnese. Gusu yãrengué pore chojmára. A ca acho poria uaté adie gotique jne. Aníri, diri ujetiga acho tuté pore áraque, a atoyoi jne.”
Dupade chi pota gu ujetiga chiraja Adã, Eba ore ujetiga ũré ujetiga angoneguite guesaque ore ome, ujetiga ore chiraja úringai pujopierãque enga ore doi uruode enga jé ca ore chijocase tuaté ádie.
Cáma pisijnaringuérique déji erámi iji taningai nanique:
Imóngo iji Dupade Uruode uje cáma pisijnaringuérique déji Adã, Eba ore iji taningane. Dupade chi garéngone u pisijnaringuéone ome ore. Ujetiga jé ca ore pésu pisijnaringuérique ujetiga jé ca ore ajéngome Dupade.
Dupade chi potigádi tu jetiga Adã, Eba ore doi uruode icaite ujetiga ore tangári. Ujetiga anire, ore changureta uté. Enga Dupade chi urúo unojo ome Adã, Eba ore gu jetiga chiraja ujetiga angoninguite guesac ore ome Dupade ujetiga ore doi Dupade Uruode.
Jecute Dupade chi chojningame Adã, Eba ore: “Ca acho poria tuaté adie. Dire ujetiga acho poria tuaté adie enga a atoyoi jne.”
Cáma pitoringárique déji erámi iji taningai nanique:
A cáma pitoringárique déji Adã, Eba gotique iji dirode udore. Jecute Dupade chojnirame Adã, dapesute jnani bajade ore: “Ca acho poria tuaté adie uje yãrangué. A atoyoi jne jeta acho poria tuaté adie.”
Yocaté chequé bajé, chi doi dicoré Satanás uruode nanique:
Quigade ga iji Dupade Uruode unojo, ga Dupade Uruode chatata uje Dupade chi ca chimoque icaite uje chise jnacare bajade yocayode Adã, Eba ore iji dirode jnese. Dupade chi déji ore gari enga ore chimo Dupade ome dedodie.
Mu Adã acoté Eba chajire poria tuaté údi, uburúdi iji dirode uñeque. Enga anire. Eba qué chajire poria tuaté uburúdi ga chajire gãrengué casé pore uburúdi ga chi chijire adie. Eti chi Eba chi chudute darade enga chi chijire darade mu uga. Enga chi ugai chi narare. Enga chi chojnirame Eba, ayoré bajé: “¿Gotique uje que agu poria tuaté adie á?”
Mu chi Eba chi chojnira: “Que yagu gotique.”
Enga ugai chi chojnira: “¿Gotique gu a? uje que agu a.”
Enga chi chequé chojnira: “Que yagu gu uje Dupade jé urúo. Dupade chatata diríca uje chi yajo poria tuaté adie enga Dupade ãrengué enga chi itogoi jne. Chi pitoringai chacája yoque jne.”
Enga ugai tuté chojnira: “Taque Dupade. Taque Dupade uje chiese atoyoi jne. A acho poria tunaque adie maringa, a ca atoyoi jne.”
Dicoré chi pi aníri ugai tuté uje chetingare cheque bajé Eba:
Mu Dupade Uruode chatata uje dicore tu aníri, dicore chi pi aníri ugai tuté. Enga dicoré Satanas chi chacája ugai pijnani. Chacája ugai ujetiga chãra chequé tuaté. Enga ugai chi chojnira: “Dupade que pota. Taque Dupade uje chiese atoyoi jne. Que toc ujetiga atoyoi gotique iji,” chojnira dicoré. “Dupade chãraque poria adie ujetiga acho gu uje Dupade chiraja uje a achorásu poria adie enga a oyorásu Dupade, ujetiga arajáyo cucha arégode, cucha gajnaréngone ore enga anire a oyorásu Dupade. Jecute ujetiga uacacho enga a arajáyo cuchade jnese. Jecute Dupade charatáiyime pirajatigai tome uaque, ga anire, Dupade chãraque poria adie.”
“Taque Dupade,” chi ugai chi chojnira. Dicoré chi chojnira, chi chãra Eba. Enga jec u uje Eba, yocaté chequé bajé chi doi dicoré uruode. Enga chi dicoré chojnira uje chi chãra: “Agu. Jé quétingáre. Enga a amo cucha arégode to iji.”
Eba tagu poria áraque nanique enga abai tagu to:
Eba chi doi aníri dicoré uruode ga chi chisa poria áraque enga jec u uje chi tagu. Enga Eba chi chisiapome dabai to rĩ. Enga Adã chi tagu to. Enga jec u uje chi ore jnusina uje e ore chimánaja dajei uje chi Dupade chetaque poria to ome ore ujetiga ore tagu. Chi ore jnusina uje Dupade chi anire, gãrengué diríca, enga chi jec u uje que ore chiraja daru quitígo ome Dupade gotique. Uje ore tagu gãrengué casé pore adie.
Uje Dupade chi chojnirame ore diríca: “Ca acho jne. Acho cuchade jnese iji yejnai tuné, mu ca acho poria tuaté adie jne.”
Mu Eba chi tagu poria adie. Enga chisi ome dabai enga ore tagu jnese, enga jec u uje chi ore ajéngome Dupade yui. Chi ore todo Dupade yui uje que ore doi Dupade Uruode gotique. Angoneguite parique ore. Diri tuté u uje ore ajéngome Dupade yui, uje e que ore pésu Dupade Uruode gotique. Que angoneguite guesac ore ome Dupade gotique, enga chi ore chajéngome Dupade yui.
Máraque ore ga ore chajéngome Dupade yui:
Que ore chiraja daru quitígome Dupade yui uje ore tagu Dupade gãrengué casé pore adie. Enga jec u uje Dupade Uruode chatata uje deréjnai chi uté uje dicore chãra Eba ore. Enga deréjnai chi uté u uje pajegátigade chacája ore. Pisijnaringuéone chacája erámone unojo. Pisijnaringuéone garanone u yocai jnani bajai udore ore uje yocãrapíode ore.
Enga pisijnaringuéone qué déji erámone iji dirode unojo to, enga chiborátaja cuchade unojo ome ayoréode uyoque: pajegátigade, pajé jũruachúringane, paringaquéode ore. Enga cuchade udore u uje pésu re to nanique iji diri tuté uje yocai jnani bajade ore tagu Dupade gãrangué pore ádie nanique. Enga jec u uje chi que ore chiraja dasocárique nanique ome Dupade yui uje chi Dupade tibágui ore iji dirode jnese.
Ore chacose raque uje chi choquíbi ore gu:
Chi ore pota jeta ore chacose raque. Dupade Uruode chatatápo rĩ uje chi choquíbi ayoréode ore icaite iji taningane. Chi choquíbie chequé, chi choquíbipo jnani te rĩ, mu chi ca ore ajéngome cuchárique gotique. Uje que ore chiraja cuchárique uje cáma pisijnaringuérique, pajegátigárique, aníri, paringaquéode chacája erámone. Mu ore tagu Dupade gãrengué poria adie enga jec u uje ore chiraja dáringane choquíbio. Enga ore chiraja pajegátigade. Ore chiraja pisijnaringuéone enga ore chajéngome raque. Ore ajéngome Dupade yui uje que ore doi uruode enga ore ajéngopóme dáringane choquíbio enga chi ore chigaru pore acarã́quedatédie aja ñane enga jec u uje chi ore pésu doidode iji. Enga jec u uje aniri chi ore chucuepo dasocai rĩ ujetiga ore chacose rome Dupade ujetiga ore pógu raque.
Dupade chise ore. Dupade chajmita ore iji guedéjnoringai uté, mu chi ore pógu raque iji quedéjnarique.
Dupade Uruode chatata uje Dupade chiraja ore jogadi tuté, mu Dupade chi jé ibidite ore. Chi tibidi ore, uje chi chise dejnai uje chi que chimo ore iji daquei uje chi ore pógu raque.
Mu chi ca ore chajnai Dupade Uruode gotique. Chi ca ore tibágui Dupade. Dupade chi chajmita, chajmita ore gu iji dirode jnese. Mu ore ajéngome Dupade yui tenga chi ca ore chajnai Dupade. Chi ca ore chingongára raja Dupade, mu chi diga jnacari chingo re ome Dupade.
Enga chi Dupade chi chojnirame jnacare bajai: “¿Agúsi rique que uje que achajnai yu que a?”
Mu jnacari chi jnacare bajai chi chojnirame Dupade: “Ugúsi ti que.”
Adã, Eba ore chaguhéta ñane gáyode nanique:
Mu chi Dupade chojnira: “¿Gotique gu a uje bajéngome yu? Ise ga acho yãrengué pore adie uje ojningame uaque diríca, ‘ca acho jne.’
Ga jnacari chi chojniga: “Berané casé chequé ome yu, aniri, tagu barengué pore adie diríca que, enga chisi ome yu to que, ga agu to que, mu yiba tu anira, berané, bapesudé ica, chequé.”
Enga jec u uje ore chichaga ñane, jnacari chi chichaga chequé uje chi tagu gu, chequé. Mu Dupade chi chojningame chequé to: “¿Gotique gu a? uje agu diríca. Agu que poria adie uje badute yuruode diríca uje ojningame ua diríca, ‘ca acho poria adie jne uje a atoyoi jne ujetiga acho poria tuaté adie.’”
Mu chi chequé chi chojnirame Dupade: “Dicoré u que uje chãra yu enga jé agu to poria adie. Dicoré chãra yúdode enga jé agu poria adie que.”
Chi ore ichaga ñane. Chi ca ore chiraja cuchárique uné diríca iji taningane mu Satanas chãra ore enga jé u uje ore chiraja paringaquéode, ore chuságaja cuchade uje ore chaguhéta ñane gáyode ome cuchade.
Dupade cho dajuñame ore nanique:
Enga jec u uje Dupade chi Dupade cho dajuñame ore. Enga jec u uje Dupade ujuyaquéode udore u uje yoquibade u, yocai jnani bajade, Dupade ipesudode ore, jé u jec aja dirode unojo gajnerĩ. Dupade chi chojnirame Adã, anire: “Que be yuruode gotique diríca. Uje que be yuruode uje bagu poria tuaté adie, yãrengué pore adie, a jnumi tuné cucha gajnaréngone suéji jne. A ca agupo babosode bisideque jne rĩ. A agu cuchade to jne gu betotiguei ujetiga qué ejna baguesi bajaque. A agu cuchade to jne, mu a qué gajnetui déji bacuruté bajaque, benochai. Jec ujeta aque to,” chojnirame jnacari. Dupade chi chojninga: “A apésu bejnatígo iji erámi tuné, mu a bajuya ua ome bejnatígo ujetiga apésu. Jé bajneque erámi isatígo jne.” Dupade chi chojninga: “A ojnatígo suéji erámi te jne.”
Comai – Zapoco, Bolivia – 1960
Marina de Morarie churúsãre Comai uruode unojo
