Icatecãcoi Dupade uje pésu erámi tuné:
Dupade, bagúsi guéode uéchai. Dupade, bamo yoque jnese, yoque Dupade. Uje ua u, uje bapesute erámi tuné, Dupade, bapesute ayoréode ore, enga baraja ayoréode ore yocajéode, Dupade.
Icatecãcoi Dupade uje chécãre ayoréode yocadode:
Yoque Dupade, yicatecã́ri ua ujetiga átabája uyoque iji deréjnai tuné. Iji deréjnai unojo ujetiga yichago yoquenominone aja ua, Dupade. Yoque Dupade yirajágo uje pujopié déji ua ujetiga écãre ayoréode yocadode, Dupade, ujetiga yimóngo cucha ũréone iji baruode to.
Icatecãcoi Dupade uje sué cuchade gai jnese:
Yirajágo, Dupade, uje yocumajosṍri déji uje Satanas u, enga Satanas u dicore, Dupade. Satanas chetaque baruode. Que pota gotique, Dupade, ujetiga ayoréode yirajágo baruode, mu yirajágo uje Satanase sue yoquibai uje ujopié cuse uje sue yoquetotiguei gai, Dupade. Sue yocáyipie ayoré gai, mu yocacaranguipise, Dupade, uje yocangureni tu babi Jesuse, Dupade. Yocangureni tu babi Cristo, Dupade, enga babi Cristo chingome yoque uje uté déji yocari, Dupade. Enga uté pota ujetiga chátaja yoque, Dupade, ujetiga chisi ome pirajtigai tome yoque jeta yirajágo baruode. Jé upo rĩ, Dupade, uje chirote yoque, ujetiga aniri, uté chãraque yogome Satanase.
Icatecãcoi Dupade uje chisiome daruode ome yoque:
Yoque Dupade, yocacaranguipise uje ayoréode uñane changureta ua, Dupade – direquedéjnagosode, cochacoigosode ore – uje ore changureta babi Jesuse to. Yoque Dupade yirajágo uje sijnaque yoque icaite, Dupade. Que yirajágo baruode gotique icaite, Dupade.
Que yirajágo baruode gotique icaite, Dupade, que yirajágo baruode uje chise direquedéjnaigosode, cochacoigosode ore, uyoque. Enga yacaranguipise, Dupade, iji dirode unojo uje ayoréode uñane déji, Dupade, iji direquedéjnagosode, cochacoigosode ore, uje baruode e chise ore, Dupade. Bapésu baruode iji banguretasórone ore, Dupade. Enga, Dupade, iraja to, Dupade, uje adi tu uje sijnaque yoque icaite, Dupade, iji erámone. Que yirajágo baruode gotique icaite, Dupade. Enga adi tu uje bécãre yocadode uje yanguretágo ua, Dupade.
Yicatecãcoi Duupade uje chudute yoquicatecãraitigade ome yocujode ayoréo:
Angureta ua to, Dupade, jeta bojnigaite udire déji yoquiquei ujetiga guidaigosode ore uñéngo, yoquijorane guidaigosode uje yoquipotigádi tu ujetiga ore changureta ua to Dupade. Diga uñéngo ore chisi ome rágome ua to, Dupade, ujetiga amate baruode iji ore to, Dupade.
Dupade, adute yoquicatecãraitigade unojo, Dupade. Jecucha icatecãcoi ua, Dupade, ome guidaigosode ore, Dupade, uje yocujo ayoré ore gu. Aqueta ore to, Dupade, iji pisijnaringuéone, Dupade. Jec adi u ujetiga ajna uñéngo to ome baruode, Dupade, ujetiga uñéngo changureta babi Jesuse to, Dupade.
Asi ome pirajatigai tome yoque jnese, Dupade. Asi ome pirajatigai tome yoquijorane guidaigoso ore urasade misionéro ore, Dupade, banguresórone ore, Dupade, ujetiga ore chiraja bajegaidode cucha, Dupade, ome ore jetiga ore chacate yoquijorane guidaigose ore ome baruode to, Dupade. Bei baruode ome yoquijorane guidaigoso uje yoquipotigádi u ujetiga baruode chise erámi jnese ujetiga babi Jesuse chimate daruode iji yoque enga uté diapo rĩ ujetiga jno danguretasóningo ore údi, Dupade.
Ijíñongome yoquicatecãraitigade unojo jnese iji deréjnai tuné iji bajmainie, Dupade. Ome babi Jesuse i. Amen
Comai – Zapoco, Bolivia – 1960
Marina de Morarie churúsãre Comai icatecãraitigade udojo nanique
