Yacorenie Oidi Ayoré:
Chi disijate yacorenie oidi ayoré. Chi qué parátagape ga chijna dacode ipipébi ome yacorenie. Chi yacorenie guejnangóri enga yacorenie jno údi jne.
Chi chojninga: “Codé á, yijína ore to jne aja yacorenie, ga yajo yitique ape to jne.” Ga ore ababode qué parátasi ore uje ore chujési, yacorenie ababode. Ga dacode tagúsu yugábode ababío.
Chi e arec, ga chujé yãcoré ape arégode. Chi dacode chi ore urásade chisi ome dutuedie ome, ga ore chojningame: “Arãjure udiji ome bájnami. Tagu jeta di.” Ga e ore tagu yugode yãcoré abío. Ga e arécho, ga ore chosõre to.
Ejoi ga chujé yãcoré icáguejnanie. Jé u uje e jnacare ga chejna yacorenie jochade. Ga jé u uje yãcoré guejnangõre. Ga jé u uje chejna jochai te mu yacorenie chacho disi ome raque ome dáringanie chuque gajiné. Mu yacorenie niji iji quigade ga jé u uje jno údi uje yãcoré niji iji quigade ga jno údi.
Chiese yãcorenie chiraja ayoréode uyoque ga u oidi jnani bajaque ayoré ga chi chojninga: “Boyo iji ayoréode uyoque uje jocãratade udore gu. Ga boyo.”
Ga jé u uje yãcorenie chayo. Yãcorenie chayo uje chiraja ayoréode ore uyoc. Jé u uje chi yãcorenie oite ayoré chi chingo ayoréode yocadode aja yãcorenie, ga jé u uje yãcorenie chiraja yoque to iji de, ga chayome ore.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
