Yatataba Guei Basui adode:
Chi yocai jnani bajátique chi baque. Chi chudute guei adode. Chi doi guei adode. Chi chudute adode mu chi todo ga chácãre darani tome. Jé todo guei basui adode gu.
Chi chimochẽre gatoi gai ga chi chorei damochecáya iji údi.
Chi chojninga: “Que bayé udac.” Chorei damochecáya iji údi.
Jé u uje chise Guei Basui. Chi déji dachẽra pore údi. Chiese nóna dachẽra aja jnumi. Ga chi nóna aja degúi.
Ga chi nóna aja dabatigade. Ga chi chijno cutérone ga ãré chejna. Chi chojninga: “¡Jiiiii! ¡Yuyátique di iji yu iiii!”
Chi Guei Basui jno ga chijnásia chicorámi ababi. Chijócha mu uyádi suési gai.
Mu chi jnani bajai chajire iji jnumi.
Chijose dacajñui aja bajo ga irágu mu jotábia déji gai.
Chi jnani bajai chojninga: “¡Yijína cuchábi!”
Chi di ji degúi, ga chojningame dacoté: “A yijína cuchátique.” Chiraja uje jotábia dési ijoyade gai te.
Mu chi jnani bajai cho paraque ga noñome Guei Basui iji degúi.
Chojningame darásade: “Yo paraque. Yijíñome iji degúi uje uacagachodi u jne.”
Mu chi Guei Basui pésu daguíjnai. Mu chi disiode chimitingare. Ga ore chojninga: “E ajnorate ji. Ga chiese ajnorápiedie tṍraji uráidie.”
Mu chi chimate daguíjnai ga chécãre dameserane aja ajei. Chécãre ore aja guiguíjnai ajei, ga jé u uje soca rome ore iji guesi. Tṍra dameserane aja guijnatajei; jé tṍra detégode, damitingarangórone aja guesi.
Ga noña ga jmi que’. Ga chiese jnanione u jmíngone, ga chequedíe u jongogonie; chiese disiode, disidíe u paparanie, parátagabidie su guiáminie.
Tṍra ore ga yote ujósóño u. Ga ore poji yodi. Jé u uje cho jnare ga Guei Basui jno ga nóna aja gaté. Chejna ore. Yirajapídode eruei jé u.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
