Gajnoque Quedéjna
Yocayode ore guejnato u Gajnoque Quedéjna:
Chi disiode ore dayode baque. Ga ore abode chiposásu Gajnoque. Ga ore chipese datedie ajerabidie. Ga disiode ore chipese dayode gapudode iji. Ga chi Gajnoque Quedéjna chetaque ore ga chejna ore.
Chejnápise ore ga uecai chojmára. Chi chayo ga chi choru chúrumei. Ga chojninga: “Udaque que déji tiéraque.” Ga chi moji chúrumei ujade. Chi dire ga jno.
Ga chise jõrábejnane ore idaidatéode. Chamacoco u. Chi cṍraji ore ajárojna. Ga chi ore nóna aja jnumi.
Ore chojninga: “¿Cuchárique guejnaque báningo?”
Ga chojninga: “Gajnoque Quedéjna chejna yayode ore.”
Ore chojninga: “¿Bayode guejnato isocárigo cho rique?
Chi chojninga: “Yayode guejnato a di jne, ga bajé usereréjna aja iquei, úyujna cuchábe bajé aja iquei. Mu chi bajaque jnacode, chugúpẽre yote dequejnangórone aja iquei jne. A di jne.”
Ga chi ore pésu dajuyaquei iji poridie ga chaparu ore gai. Ga ore chijnoja iquei ome ore inamanie. Ga chejna yijmanai ore inamanie.
Ga ore chudute usererejna ga ore chojninga: “Ãcho inama.”
Chi qué sué gai iji taningai.
Chi chojninga: “Yayode guejnato Gajnoque Quedéjna uaté ga e di.”
Ga chi ore chachẽre ga ore chãru inamanie chojmarai. Ore chachẽrapo ga gare rĩ mu yodi qué sué gai ga que chajni. Ore chachẽrapo gadiogué ga que chajniapo rĩ. Ga gagánia ga yodi e chapu re iji jmainie. Udaque, cinco, ga chajnipise.
Tiedie íjnonguiji erámone ga inoningayato u Gajnoque chagúi adode.
Chiese ore apose gatéode ga ca guérique tagu ayorérique.
Ga que ore chatata.
Oidábiadé – Campo Loro, Paraguay – 1988.
Marina de Morarie churúsãre Oidábiadé atatagode udojo nanique.
