Chi guei ca tagu ore jutícabia:
Chi abai neróraque dajai yuque nero abai uje i tu Dachapiboraté. Ga Dachapiboraté acoté dajai chojninga: “A yiji jne, yibágui ina ore jne.”
Chi guei ca tagu uté ore jutícabia to. Ga jno ga tibágui nero, mu chi chise nero abai ujuya gajnei gase ga chi chojninga: “Ujuya yoc iji yoquidai. Uje guérique que tagu yoc!”
Ga chise nero ga Dachapiboraté chojninga: “Bajaté u é.” Ga jé u uje chojninga: “Be dutué ome bajaté.” Mu chi chojninga: “Ca be dutué. Be doridie uje yipese babosíningo.”
Ga yusṍri jno ga doi darásade ore, mu chi pógu re ga tṍraji daguíjnai uéchai. Ga chi abode chi chojninga: “Codé a, iapade u. Déji daguíjnai ajei.”
Mu ore codé chojningame disi: “¿Ama bayé ga pógu re ome yoque?”
Jé u uje chijnime dajocaningai. Chi chojninga: “A yujé daijnai jne uje tagu dajuticabia.”
Chi ore doi ga chi chojninga: “A yibore ore ijnai ome jne, ga yisa iji gai jne.”
Jé u uje chijna dorijnai, ga jé u uje chisa ga ore chujé iji jmainie. Chi ore jno mu chi ore dorási Dachapiboraté ipesudi erãpijóningai ajei. Ga ayoré áyipierãi chojninga: “Beyoi ãrei ga yimóngo jeta chejna yoque jne.”
Ga Dachapiboraté chajna ore ga usereréjna chajna ore. Mu chise ga chajníji ipesudi erãpijoningai eruei.
Oidabiadé – Campo Loro, Paraguay – 1988.
Marina de Morarie churúsãre Oidábiadé atatagode udojo.
