Ore pógu oyídode nanique:
Dibe chi chuchẽ́re oyídode gai. Chuchẽ́re gai uje ore pógu nanique. Jec ũré uásejna oyídode iji erámi uje chuchẽ́re gai. Yodi déji cucarani ajei. A cuchárique suru gai mu dibé chuchẽ́re gai ga e déji erámone jnése oyídode. Que pijoque jurugaisṍri. Cucha pijogarabia dibedie ome jnani bajade.
Ujode cuchiso ore chujérase dibé mu chayome ore. Ore chucuésosi iji cucoi choqui ójo. Ore tṍrasi aja erámi. Ore tṍrasi aja da te. Ore cho dajuyame gu mu ore chiquetásiapo rĩ.
Uñeque chutĩ́raja jnumi ga utirane cho enuéone. ¡Cho quẽ́eeeera! ga ecásiapo rĩ iji jnumi, dibé. Que yiraja jeta poji nanique. A poji. Chiqueta dibé ome dajñone. Ore chãrángome ñane ajñoi jeta uñeque gajneque isocai to.
Jiei jnani bajade ore atuatigade, ore josipiedie. Cucha irajagónic atuatigade.
Manuélné – Tobité, Bolivia – 1960.
Joyce Davis Buchegger churúsãre Manuélné atatagode udojo nanique.
