Adudui, Dajesui ore Adode:
Adudui chirote nujna. Jé aca gu. Chacho cuchade. Chujé cuchade mu que chejna gotique. Mu chi chojninga: “Yipota jeta yujé cuchade jnese ome yigaite guebec.”
Chirote iji dejade, chirote iji dirode uje chi chãraque adie ome cuchade. Ore poté gu. Mu moi chujé gu uje chujé cuchade jnese.
Adudui que chujé to moi, mu chucué Diti. Ucuegué iji erámi. “¿Jé potique jãaa? Que di to, Yajógue.”
Adudui catecã́ri Diti: “¿Jé Yajógue cho ringome jeta tagu cucha adie to?”
Chojninga: “Úngare. Que tagu cucha adie to. Posode u casecade iji jnumi.”
Adudui chojninga: “Jecute que chise yu to iji yirodé uje que tagu cucha adie.”
Chi Adudui chejna cuchade jnese. Chujé caratade, caratedie, jé u cuchade jnese. Chi chise dejai. Chujé ántadie, erámoronie ore. Chingo darásade: “Yejna cuchade iji yirodé.”
(Chi ayoréode tagu ore imeserane cucha nanique: Mu que ore tagu caratade, caratedie to. Ore poté u yacorenie, yocade, ajaraméone to. Jecute yico udé to. Jnani bajade ore tagu ore imeserane cuchade. Yico údi to disi ejo yoque ga yajo to yacorenie, yocade, ajaraméone to. Jnani bajade ore tagu jóchiode, tachégode, pojíode. Que ore tagu ajaraméone nanique. Ore posode u pojíode. Mu unere ome yoque ajaraméone. Que yajo pojíode to. A pojíode unere ome jnani bajade nanique.)
Adudui chujé Dajusui:
Adudui chujé Dajusui. Adudui chi chojningame darásade: “Beyoi uacatígo ome. Yetingare mu cachi deroco arione. Yagu mu quedéjna. Ai chójmare.”
Chaquesu daserani ome. Chojninga: “Yaquesu yaserani ga yuguhése jne. Yurásade ore tagu to jne.”
Dajusui jno Adudui údi:
Anta (español ome Dajusui) iyojna chiqueta raja Adudui gu. Adudui e chĩ́care. Chojninga: “Bo yúdi ga a ca yagu yibotíguiji erámi jne,” Adudui chojningame Dajusui.
Mu Anta chojninga: “Yisi ome ua jne babotígo.”
Chi jé chijnoque Anta arione mu jé chiqueta raja. Chijnónguiji damoi mu dire uje jno údi. Chi chojninga: “Yajniape to. Yijnóngape arágajñunie. Yurásade ore tagu to jne, Dajusui.”
Chi chijnoque mu Dajusui e chiqueta raja. Chi chojninga: “Bo, apúsaja erámi. Ajnoque yu.”
“A ca yagu yibotique jne,” chojninga, Adudui.
“Agu yibosode to jne,” Dajusui chojningame.
“A ca babotique cus,” Adudui chojningame Dajusui.
Carne (español ome arione) que iji gai, mu e chiqueta raja uje jno údi, ga e ayoré enga e catecã́ri. “Yibosode déji yajei.”
(Adi jé u uaque, Violeta, uje ajucho uacabosode tiji cajõ ajei. Jé suru dabosode iji dajei.)
Adudui chacho iberode uje dachajna. Chi pojna erámi. Chi e chaguhei chejna. Chojninga: “¡Chaguhei dejna aaaa!”
Dajusui chojninga: “¿Jé ó rique?”
Chojninga, Adudui: “Que yĩrarare.” Jé pogu daruode uje chaguhei chejna.
Mu jé chiraja, Dajusui. Chi chojninga: “Cachi bãrarare ga ojninga ‘chaguhei chejna yu jõ aaaa.’”
Dajusui chojninga: “Yisi ome babotígo ome ua jne.” Jé chaca. (Adi u uje yoquibosode tutúdiji yocajéode.) Cho ‘puuuu’ mu mimire cuchábi nóna acai aja guesi. “Be, agu dac.” Chajire mu e mimiré cuchape. Chi timate ajei. Iyojnai chusaque gu ajei. “Agu. ¡Unere!”
Adudui tagu mu jec ũré unere. (Bamo uje unere mimirenie.) Chi ica guejna. Cho guiyé ga chojninga: “Yica guejna jõ. Yiqueca jõ. Yijosa yiyaguhei jno jõ. Yijosa yibotique di jne,” chojninga. “Areque yu jõ. Subudé yu jõ. Yiqueca jõ,” chojningápo rĩ. E chacãre uté gai, Dajusui.
“Be yibai ga yijnoque ua,” chojninga. E jno údi. Jno údi ga jé adi dasocai que uje pojna erámi.
“Yacho erámi isagode jõ. Chaguhei chejna yu jõ.”
Mu jé isocai u dasocai.
Dajusui chojningame: “Yisi ua jne babotic. Bajné tu zapallo uje yijnime. I tu dutué ome ore.”
Jé adi isocai. Chojninga: “Que yĩrarare go.”
Mu chojninga: “Jé bãrarare. Bojninga, ‘chaguhei chejna yu.’ Yácare ga yisi babotígo ome ua.” Chácare. Chisi dutué ome. Chácare ga e taque. Adudui jnui Anta, ga Adudui pose dutué cucha. Anta que dique to.
(Posode garani tu Dajusui. Adudui jé urugúji erámi.)
Chi chojninga: “Be yibai ga yijnoque ua.”
Chi e chaguhei chejna iji tõo. E chijnime dabosode. Chojninga: “Chaguhei chejna yu jõ. Yijnime yibotique case jõ ga yagu jõ dutué case.”
Mu e Anta catecãrápoi rĩ. “¿O rique?”
Adudui chojninga: “Que yĩrarare.”
“Bãrarare. Bojninga, ‘Yijnime yibotique casé dutué jõ.’ Yijnime ujñáringome ua to jne ga agupo rĩ.”
Chi ijnimé jóco gajnerĩ ga chojninga: “¡Chi! Be, agu purúa. Dacódejna. Baca guejna iji.”
Adudui chojninga: “Yagu jne. Yica guejna ome jne. Cachi yajire yiboté casé mu e diapo rĩ. Toguéode pica guejnanie jõ.”
Chi cho guiyé.
“Be yibai ga yijnoque ua jne.” E jnopo údi rĩ. Jé isocai ga dasocai. Chojninga: “Yacho erámi ome yiriguitígadatéode jõ. Chaguhei chejna yu ome yiriguitígadatéode jõ.”
Anta chojninga: “¿O rique?”
“Que yĩrarare.”
“Bãrarare. Bojninga, ‘Chaguhei chejna yu ome yiriguitígadatéode.’ Mu Anta chijnime guéjnajñunie. Chijnimi bajo ga guéjnajñúnie irágu ajei. Nóna ajíode aja guesi. Chijároja. Chojninga: “Uneripise. Agu.”
Tagu ga chojninga: “Jec ũré, unere gotígo jõ.” Chi ica guejna ome. Chojninga: “Toguéode pica guejnanie jõ.” Chi guiyé.
“Be yibai ga yijnoque ua.” E doi gai ga e jnopo údi rĩ.
E dadi u dasocai. Chejnáreque ome chaguhei. Chojninga: “Yijnime yiboté casé jõ. Yagu jõ. Chaguhei urõso jõ.”
Anta chojninga: “¿O rique?”
“Que yĩrarare.”
“Bãrarare. Bojninga, ‘Chaguei urõso jõ.’ Mu agu babotígo jne.” Chisi ome frejol (Español ome cuguéode) ome. Chojninga: “Be, agu cuguei edo. Ajninguese gai urúi.
(Ore chojninga, asite gai urui. Ajñute gai urui. Urupis uje ore chijáro iji tacúdie.)
“A uneripis,” Dajusui chojninga. “Etingare jeta unere. Unere ga agu.”
Adudui tagu. E chajmára. Chojninga: “Unere jõ. Toguéode pica guejnanie jõ.”
(Deroco cuchade ga ore chojninga, ‘deroco, que yajmára gotique.’ Unere cuchade ga ore chajmára ga ore chojninga, ‘uneripise jõ.’ Chijnime yarecujadíe. Chequé bajedie ore urúo uje ore chajmára cuchade mu que déji disi ejode uyoque. Ore chojninga to nanique, ‘charore ti’ uje chusaque ore pusugúi.)
Chi jnopo údi rĩ. Adi jé u dasocai. Chojninga: “Chaguhei chejna yu jõ.”
“¿O rique?”
“Que yĩrarare.”
“Bãrarare. Bojninga, ‘Chaguhei chejna yu.’ Mu agu babotígo jne.” Chijnime tocode uje timate iji sequeredie to. Dajusui chojninga: “A yijnime porade ga agu.” Chijnime datuadie, tocode, jnarujnanie, abuidie (gati ajéode) enga irágu bajo.
(Que déji de to abuedie. Déji Guidaigosode ore achaminone. Ore posode u.)
Anta ijnimenie u. Chijna aja guesi sequeré adode. Cutéri adode rĩ. E dopo cutérone rĩ.
Anta chojninga: “Yécãre babotique jne.” Chécãre ga chisi cutérone ome. Mu chisi esode, dajujña, durujna ome to. Ijnimícho jé udore to. Sequeré adode jé u gu. “Yécãre babotíguiji ejoi tuné.”
Adudui chi chacho erámi. Adi jé u dasocai. Chojninga: “Chaguhei chejna yu jõ.”
Anta chojninga: “¿O rique?”
“Que yĩrarare.”
Mu Anta chojninga: “Bãrarare, bojninga, ‘chaguhei chejna yu.’ Mu yijnime cutérone ome ua.” Chi chaca ga chijnime cutérone. Chajni de agapi. Queru bajo. Chi chojninga: “Apese.”
E chipese ga ica guejna ome. Cho guiyé ga chojninga: “Toguéode pica guejnanie jõ.”
(E cutérone adode udojo u uje e sequeré adode e íjnoque. Cutepísode chugúja yoque, ijnimique bajai. Zapacógosode ore chojningame, ‘cute sijnángone.’ Unejac cute quedéjnai -cute parai ome Zapacógosode. Que chugúja yoque. Chugúja yoque uje chigase yoque. Ájningare gu.)
Chi jno mu chaguhei chejna iji tõ. “Chaguhei chejna yu jõ.”
“¿O rique?”
“Que yĩrarare.”
“Bãrarare. Bojninga, ‘Chaguhei chejna yu.” Anta chaca ¡puuuu! ga chijnime cute parai.
Adudui chipese. Chujé dorotabidode. Chojninga: “E yica guejna jõ.”
“ A ca yimécare ua jne.”
“A bamécare yu jne,” chi chojninga. “Babosode íjnoc.”
“ A badode ga chaguhei chejna ua iji toniñeque ga amurase yu ga aque jne. Atíraja bacajnogonie.”
(Chi chutíraja dacajnongónie ga ica guejna mu e doi údode.)
Chi chojninga: “Yachopise yaguhei jõ.”
“¿O rique?”
“Que yĩrarare.”
“Bãrarare. Bojninga, ‘Chaguhei chejna yu ga yachopise.”
Anta chaca mu e chijnime ajidape. Cojñone chojninga, ‘señorita.’
Adudui chipese ga ica guejna. Cho guiyé ga chojninga: “A ca yimécare ua jne uje yica guejna.”
Chojninga: “Arója bádode ga cha bádode.” Changuñera dádode ome dajmanai ga e chicai dádi.
Jnopo rĩ. Anta chijnime jutai (kind of honey).
(Que déji de go. Déji guesode. Cutéri ga chugúja yoque. Chopise abéjadie. A ajmárarase to, Violeta. A bojningarása uneripise jõ.)
Ejo chijnime caritique uje cojñone chojninga, ‘oro.’ Irágu bajo. Chojninga: “Be, apese caritique.” Chĩretapise daca uje posode chise ica eruei. Eruei chajni uchiéro. Chajniapo aguté tirógara rĩ.
(Zapacogosode uruode u ‘juriape’. Ore chojninga uje ore ica guejna.)
(Anta pésu íode uje ipesucho jnese cuchade, sequeré adode. “Yijnime ichatui, yijnime pirangórone, yijnime orojónie.” Orojo uje chaca jnumi. Chijnime cutepeque gajnaréngone jnese. Chijnimápo guiréjnai.)
Adudui chojninga: “Yachopise yujnui gotique jõ.”
Anta chojninga: “Amurase yu ga yiji. Yicai erámi.”
“¿Jé yibotique jne a? jeta yijíñome ua.”
“¿Jé babotique jne a? Apúsa babotígo jne. Etingare cuchade ga agu bameserane cuchade jne.”
“A yupúsa yibotígo to jne.” Ga tagu erãpe gatoi, erãpe pijóningai, jnacarade. “Unéño udojo. A yagu erãpe pijóninga jnacarade. Ajíñome yu.”
Adudui chojninga: “A yagu cutérone jne. Unéño.”
Anta chojninga: “¿E baguijnárique jne? Que babotique cus.”
“Yucué pore garainie ga yacája ga yagu.”
“Acué uje etócho uñane ga edo iji.”
E cuchiso. E jno ga noñáji erámi. E chucué daboso ga chaca garáinie ga tagu cutérone.
Anta tagu erámi gatoi, poridie acarane. Chetingare cuchade mu pogai iji cuchade mu chetingare poridie acarane ga que pogája. Doi yodi ga chetingare.
Chojninga: “Yajire jeta yipogai ome yodi. A ca yóji jeta yipogai ome.” Mu chóji yodi ga unéri ga chacãre yodi gai. Chojninga: “Yacaranguipis uje que yipogája to. A yóji jne.”
Mu ica guejnapise ome yodi. Yodi chajnerámi ica ga ica querújnapis. Tagúsu darujna ahábidie mu tutúdaja ajei. Tagu darujnanie aoi. Jecute ica queru, ántadie.
Samané – Tobité, Bolivia – 1960.
Joyce Davis Buchegger churúsãre Samané atatagode udojo nanique.
