Chuque Cornelio Isaac nanique
Jonoine chujé eduguéjnai nanique:
Ga jno boradie údi aja Tudujnaté. Chi Menonitane ore eduguéjnai tu nanique ga jno boradie údi aja Tudujnaté ga yicóji Madrejón iquei.
Enga chi yicoi ga uñane chojninga: “Yicoi ga yicatecãcoi cojñone.” Uñane uje ajéqueséo, jé uñane ájningarac ore. Ga yutúãjóa gachidé tãi iji Madrejón iquei.
Ga uñane chojninga: “¡Acatecãchoi ore jne é! ¡Acatecãchoi ore jne é!”
Mu uñane que chamurase doráchade to, ajningarane. Que uñane base yungórone gajiné.
Ga eduguéjnai chisi boradie ome ore. Chijnime boradie ga chisi ome ore. Bajade u uje ore eduguéjnai chisi ore, jõrai dopoi guesi to iji tãia rĩ. Jõrai doi guesi ga Echogai chisa jmanegatadé.
Ore eduguéjnai qué chisi ore iji boradie. Chisi ore iji boradie, mu Jonoine chachẽre iji úringai jnéca gai uje qué tẽríji borade. (Uje jnani bajade chojninga nanique: jnéca.)
Qué chisírase ore iji boradie mu Jonoine chichagu iji gai. Jonoiné tõria chichagu uje qué chisi ore iji boradie.
Cojñoi cho ¡eee! ome Jonoiné asõre. Enga cojñoi ejominóri chisárase poca. Jĩraque chãraque yóguiji darosadode.
Ga yocurásade chojninga: “¡Boyo, boyo, boyo! ¡Ore chichagu ore! ¡Ore chichagu ore! ¡Ore chichagu ore!”
Yayógome ore ga yibaco iji ore ejode iji datí.
Mu que yirajágo urúrique – cho ¡ié, ié, ié¡
Ga jõrai chichorase yoque ome poca, mu jõrai chãraque yoque, mu chãraque yoque. Uje chi chojninga nanique: “Ca acho ore jne, ga ore chujé yu, ga jé ore chujé yu jne.”
Chãraque yoque; chojninga, ore yuque uté eduguéjna. Chãraque yoque enga chijna poca iji dajõrai gari, ga que ore chinguíra aja yoque.
Carodidái casicaite que ore jno to, enga jé ore dépoji ejoi te rĩ, enga ore chãrapoi potayedie iji to rĩ.
Ga e ore chacája tãia ga e ore jno. Ore jno ga ore chayója idai iji Madrejón.
Jno ga ayoréode jé ore chayo aja ñane to ga ore chojninga: “Boyo ga yajnángo ore ga yachẽco ore jne. A ore déji ore idai ga yico ga yucajningacome ore.”
“Yucajningacome ore mu ore idai cho te.”
Enga ore uñane, chaquĩ́ra ñane ga a ore chojninga: “Abaso ga yicatecãcoi ore jne. Jachi ajéquesé cojñone que, ga yicoi ore iji ore idai.”
“Ore ichajui uqué a déji ore idai.”
“Yajico ga chécãre asõrepie enga chicha dajmanecai.”
Yicatecãcoi ore mu chi chojninga: “Ca acho ayoréode jne.”
Chojninga: “Asi ore iji boradie jne,” chi chojninga.
Chi chojninga: “Ore chichagu yu que, mu a gusu ore yuque yu jne.”
Chãraque yoque, jecute ore doi deduguéjnai uruode ga ore chisi ome boradie ome yoque. Ore tẽrája yoque ga yocujuya ore ugúchade, boradie. Yocujuya camísadie, pónchodie ore. Sábanane ore.
Udojo u nanique uje yicatecãcoi ore iji.
Dire ga yicopo ore rĩ uje yimóngo ta uje qué yocajneque ore gu.
A jno diríca ore eduguéjnai, ore ichajui, ga gusu irógode iji de. Mu que toc jeta ore pojna yoque uje a jé ore eduguéjnai urúo gu.
(*Cornelio Isaac era el hombre al que llamaban el jefe de los Menonitas.)
Patataque nanique – Campo Loro, Paraguay – 1985.
Marina de Morarie churúsãre patatagode unojo nanique.
