Pejnócode chedo dajnusiétigade ome dacoté:
Yijñecarósi ji de.
Yedobu yujnusiétigade. Yiji cucarani iji Tobité garané ome yujnusiétigade.
Dire gajnerĩ ga yajni. Yiji yesade. Yujnusipísi ore gu, yesade. Yugúsi Santa Cruz, mu yáyipie déji yesade. Dire gajnerĩ yaca máquina to gajnerĩ. Ugoi yu ome yujnusiétigade.
Yiji estación jeta dire ga yirote máquina. Yijñecare iji de mu jé yacadique yu. Cho jeta ayoréric yacadique mu yacadique yu. Cho jeta ayoréric gajnecho yijñecade, mu jé yajnecho jeta jé yiradique yu. Yujnusi mu yiya yujnusiétigade uje jnacare boquere yu. Cachi jé yujnusi mu que yujnusi. Boquere ga yacho. Yijiape to. Yĩriapo jne rĩ jeta amanique cusapo rĩ, Dapuré.
Yĩri diríca ga que yiguísãre. A jose ca yujnusíric. Yujnusi mu ayoré boquere yu ga yijñecáraja yajesúode ga cachi que yujnusi. Gapudíe doi yu mu que yijína uñárac. Cachi a yujnusi uñárac, cojñone gachidé. Cachi ore pesapo yujnusiétigade rĩ. Yiya gapu pijõranie, mu yijína uñárac jeta iyajmaque. Yigana iji cojñone ujade udojo. Yáyipie déji jnupepisai mu yujnusina uje que yacotéraque cus ga cachi yáyipie. A yipesapo yicháco to jne jeta yijínapo uñáraque jne rĩ. Jeta yijínapo cojñone gachidé uñáraque to jne rĩ.
Joyce Davis Buchegger churúsãre Pejnocode iradedie udaji nanique iji Tobité, Bolivia iji 1960.
