Disi yu uje pacaque yedodie iji yodi nanique:
Iyamaque uje Rosadé chaca yedodie iji yodi to nanique. Jé disi yu nanique uje Rosadé chaca yedodie iji yodi, ga que yiraja cuchade go. Jéodeti ore chaca ore edodie bisideque iji ujade. Mu ejode ga yiraja. Yiraja uje chi Dupade u uje anire, uje ore chaca ore edodie iji yodi uje ore changureta Dupade ujnacari.
Yipota jetiga yajni Dupade uruode to rĩ:
Ga yipota to rĩ jetiga yajni to rĩ. Yipotapísa jeta yo ore uje ore pésu date gajnaréngone, mu ore doi ore iquei iji de ujetiga ore chatata dadode. Mu que yi ore iquei to go. ¡Yise mu que ore u yu jõ! Uje querénga yi Satanas iroquéode to. Jecute que yingo yu aja Dupade anguretatodie to jne.
Yipota jetiga yajni Dupade uruode to rĩ. Uje ité, Omé ore chetaguipise Dupade Uruode nanique, mu ore pota to rĩ iji ejode. Uje chi jé ũré Dupade gu ome ore. Ore pota to Dupade Uruode iji ejode, Omé, ité ore.
Uyu u uje ise ga catague yu to jõ aja Dupade, uje anire, yicota Dupade uje yojninga, ise mu cataque to Dupade uje chi ca jnoji yari. Jã́rape yijnime yu iji to go. (Hebreos 13:5)
Yiyárasu Dupade uruode nanique gu uje yabai cha yu.
Uje chequedíe ore chojningame yu: ‘Mu tague Sama; doi Satanas iroquéode.’ Jecute que yingo yu aja Dupade to jetiga yajniapo to rĩ uje chequedíe ore chotigase yu gu.
Yiyárasu Dupade Uruode nanique gu uje yabai cha yu.
Yabai cha yu nanique ga yiya to Dupade Uruode. Jé u uje yipotarása Satanas iroquéode to. Mu que yipotapísa go.
Chequedíe chaguhéta cuchade yibai:
Chequedíe ore chojninga: ‘Jnani acoté cuse mu jé Sama pota,’ mu que yipota go. Mu acoté chicáji Santa Cruz ga tṍra dabi. Ga iyamaque ga sequeré chojmára, ga jé u uje yipota to uje abi e toi.
Yabai bajai pota gapudíe jiedie:
Enga udojo u uje jé yingo yadode aja ore to. Uje jé gusu udojo yabayode uje gare. Que yiyarásu yabai bajai nanique go. A jé ore chiraja to, chequedíe ore, uje pota gapudíe jiedie nanique. Ga yiya to uje potapo uña rĩ. Pota gapudíe jiei. Ga yojninga: ‘A yiya uté to jne uje dopísi Satanás iroquéode gu. Jeta e potapo gapu uegue iji yejoi rĩ ga jé u uje yiya to.’
Yiya to ga anire, yijína Jnani. Ga e gusúapo rĩ. E gusu. Que toque ujetiga jé yijína jnacare uñeque iji ejode.
Chequedíe ore cho tague iji yu:
Chequedíe ore cho tague iji yu, mu ise mu ca tague yu jõ; ise mu jé ũré yu.
A Jesuse dirase ga chijna danguretatodie. Ga ise mu a jé yugúsirásiji Dupade idai to iji ore ujade jõ. Uje que tague yu to go, ome yu.
Uje jerénga (querénga) yiji Satanas iroquéode to go.
Uje yabai cha yu ga yijírasi:
Yijírasi to nanique uje anire yabai cha yu. Yojninga: “A yi to jne ga yicáji ti ga yóji borácho to jne.” Ga jé yicárasi Santa Cruz to. Yicai Santa Cruz ga yijína yijoranie ore. Uje anire, que yiraja i. Joré u, uje e toi nanique. Yijína ore ga jé yugúsiji Santa Cruz to. Mu anire, borácho yugué yu, chujerase yu. Ga yojninga: ‘A noñaque jõ borácho yugode.’
Yajni to ga yangureta Dupade to:
Yojninga: ‘Yajni to ga yangureta Dupade to jne.’ Yajni to ga anire, que yipotapo borácho to rĩ go.
E gusu. Gusu yadode anínique, jecute jé yingo yadode aja ore iji oriquei to.
Jé yajéo gu, uje ise mu ca tague yu go ome yadode udojo. E gusu udojo yadode uje yicárasiji Santa Cruz to nanique. Anire, ise mu ca tague yu go uje yabayode gare. Yiya nanique gu uje anire pota gapudíe jiedie. Yojninga: ‘Yiya to jne.’ Ga yijína Jnani ga e gusu. Que toque jeta yijína jnacare uñeque.
Mu chequedíe que cha chichaga yu aja cuchade:
Ore chichaga yu aja cuchade, mu ise mu ca tague ore jó. A Jesuse dirase ga chijna danguretatodie ga ise mu chijnarase yu to. Uje jé gusu udore gu yate gajnaréngone.
Yingo yu aja ore to gu yajéode u jeta yajniapo rĩ. Uje yangári ore ga ore doi Dupade anguretatodie iquei mu ore tangári ore. U mu que ore cha date gajnaréngone ome yu go.
Jecute que yo taque iji Dupade to ga yojninga: ‘Jé ũré ga chiraja uje ũré yu rĩ.’
¿Mu jé gotique gu a uje que yijiapo conferénciadie to rĩ? Mu yiraja. Yiraja gu uje yiya Dupade nanique gu uje yipésurásu cucha gajnaréngone. Mu ejode ga que toque jeta jé yipotapo yate gajnaréngone rĩ. Mu ise ga je ũré yu uje yabayode gare.
E gusu jne yuruode.
Sama – Tobité, Bolivia – agosto de 1975
Marina de Morarie churúsãre Sama uruode udore nanique
