E yingo Dupade Uruode aja uaque to:
Jecucha don Juan Krunklis chingo Dupade Uruode aja yoque iji dirode jnese. Chacate yoque enga e yiraja Dupade uruode to. Chi jeta angoninguite guesátique ore tenga, ore tangári to Dupade Uruode. Uje que araja yu mu e que yipésu yate gajnarétique gotique to. Uje yanguretapise Oroné, Yiguijnamúiné, Juan ore acajnaquéode ome yu, ga jé que yipésu yate gajnarétique to.
Jé tiógara jeta yicatecã́ri Dupade ome yabi suté:
Yacaranguipise uje Dupade pésu yabi ga iyoqui, ga jé tiógara jeta yicatecã́ri Dupade iji deréjnane udojo ome suté.
Enga yicatecã́ri Dupade ome uaque to, yurasade uaque á. Yutai Dupade ujetiga uaque uñeque changureta to enga angoninguesã́tigo déji uaque.
Que toc jeta ca yáyipie chejna raja Dupade:
Uje yicai monte diríca mu Dupade que jnoji yajénique gotique diríca, ga yatecã́ri iji dirode jnese. Yacaranguipise uje guéode beque ga chuta cucha pacade, ga a yajo ade jne. Jecucha ga Dupade urúo jetiga yatecã́ri iji dirode jnese.
Jecucha ga ejnaretaque yu mu yatecã́ri Dupade ome yu, yurásade ore uyoque jnese. E yirasiguipise Dupade Uruode.
Disidie uaque, disiode uaque, angáchopísi yuruode to. Uacamóño yu uje que yiraja cuchárique, mu e yangureta Dupade ga Dupade chiraja uje yangureta abi Jesus.
Yacaranguipise uje yangácoi don Juan acaditigade iji deréjnane jnese. E gusu yuruode.
Lídiadé – Rincón de Tigre, Bolivia – 1970
Juan Kruklis churúsãre Lídiadé uruode udojo ome Pujnoméone
