Jómone chatata dasijnaringuéone:
Yo soy Jómone uje yacate ua iji aníri Tobité taningane.
Señora Marina, bajneque yuruode, uje yipota ujetiga araja yipesudode cucha gajnarécho iji aníri, yuniri udé. Iyajmánguipíse uje ujnusina anírone, yipesudode cucha gajnárecho. Ga yipota ujetiga yibo, mu ujnusina cuchade uje gajnárecho iji yuniri, ga yipota ujetiga yibo. Mu Dupade Uruode u ujetiga yibópise uje yacate ore ome Dupade uruode nanique enga yátaja ua to uje bajnerame udore ome yocuruode.
Mu que yiraja cuchárique gu, uje yipota jetiga yujé cojñotique. Jeoga yo yiba iji yacotéraque, mu gusu Dupade aníri, pajei sereringai, uje déji enga uté u uje acadique ayoréode uyóguiji erámone jnese ujetiga yujnusínango ipesudode cucha ueracho ome yoque. Uje irajágo gu uje uté u uje imanique ayoréode ore uyógaja pajei sereringai. (San Juan 14:27)
Ga yipota ujetiga angári yuruode unojo, Señóra Marina. Uje deréjnai u uje yicoi arrepentido ome aníri, yocáyipiedie. Enga yajnángo Jesucrísto uje gusu uté u gu ujeta chĩro yoquisijnaringuéone, uje chi doi resucitado ome danguresórone ore ujetiga chisi ome pucuecaringué ichárique ome danguresórone. Gaidi u gu ujetiga ore chachai iji garãtique ujeta diapo rĩ iji jnumi ome yoque.
Mu gusu udore uje que ore changureta ga ore todo yui, uje ore todo yui ujetiga pujuya ore ome pioi, jeoga pujuyaquéo uña. Mu Dupade ujuyaquei tu uje tṍraji gaté jne. Que yirajágo ujetiga yodi upo rĩ, ujeta pioque. Mu yirajágopo rĩ uje pioque a u jne, ejórique, jeta cho dajuñame jnumi jogosórone uyoque.
Jómone – Tobité, Bolivia – 1970
Marina de Morarie churúsãre Jómone uruode
