Ore chatata da-testimonio iji yoquiquei:
Yirasé yujodie chequei ore uje ore chatata da-testimonio iji yoquiquei. Uje que yimo ujetiga yujodie Dupade anguretatoi uaque, uacarasé ore to. Uje yirasé uje ore chatata dadode. Yirasé yoque uje yõco yógaja Dupade uruode.
Dajuñangue abai cáma changureta Dupade:
Enga arajáyo gotique, yujodie chequei uaque, uje yirasé yu, mu que yirasepise yu go. Arajayope gotique, yujodie chequei, uje yirasé yu mu que yirasepise yu go. Ujeta jec ũré ga arajáyo Dupade uruode. Yirasé yu gu anire, yirasé yu mu que yirasepise yu gotique; a jé ca déji uaque to. Uje yirasé yu mu uje yangureta Dupade ome yajéode. Mu aníre, u yabai uje cáma changureta Dupade to, ga u uje a que yirasepise yu go. Uerate jetiga yejnángo yógaja Dupade Uruode – yabai, yabode uyoque.
Jecucha yojninga ica: ‘Yachopise Pujnúcabi uje tṍra yoquiplátadie ome *sigásodie. A yingome yujodie Dupade anguretatoi ga yimátagope uñane ujetiga yatecãcoi Dupade ome uté, ga cha dorijnane jne,’ yojninga.
A jé ca yujóraque chequé oyo yu gotique, uje yetaguipise sigásodie uje ore chijna. Yitodopísa borácho yugode rĩ. Que yipota jetiga uñeque idógosi iji yu.
Jé ca ajéchome ujeta atatáyo uaca-testimónio:
Uerate uje uacatatáyo uaca-testimónio iji de. Mu uerate ujetiga anire, ca ajéchome. Uacamóño uje Satanas u uje pésu ga ajéchome cuchade. Pésu ga yocáyipiedie cho quiyíguiyí. Chãraque Dupade uruode yui ome yoque gu.
E yatata diríca iji ucacasé semána bajei casé uje udute uacajnomei diríca iji de guidai uje chi uacatatayo uaca-testimónio, ga yirasique uacaruode.
Ugúcoi erámone diríca ga unere conferencia yui ome yu iji ujade. Yujnusina jetiga ugúsi to mu que ugúsi go, mu idája yu, mu Dupade u uje déji yajei.
Dupade gajnúone u yocugúcha ichade:
A jé ca cho uaque to uje Dupade gajnúone u yocugúcha ichade jeta yicoi yocugúcharique ga yoquirasique yocugúcha ichai.
E gusu yuruode mu yipota jetiga yicatecã́ri Dupade ome uaque. Amóño iji gaté ga yicatecã́ri Dupade ome yoque jne iji conferencia. E gusu yuruode, Elena, mu yicatecã́ri Dupade jne.
Dajuñangue catecã́ri Dupade:
Yoque Dupade, yicatecãcoi ua iji de viérnes uje yugúcoji conferencia ajei. Uje yacaranguipísome ua jeta dínique gajneri ga unere baruode yui tome yoque gajneri, yoque Dupade. Yoque Dupade, yocacaranguipis ome ua gajneri jeta átaja yoque gajneri, ga jé ca yajéjome baruode iji banguretasórone ore iquei jeta jé ũrepise yocanguretigai iji de, yoque Dupade. Jé ca yajéjome udore gajneri uje ore cana yoquibáyode, yoque Dupade.
Yoque Dupade, yacaranguipis ome ua uje barote yóguiji erámone diríca iji yocajesúode erámio. Yugúcopóji de rĩ jnese, jnanione ore uyoque. Yoque Dupade, jeta goto déji siñeque, jetiga cáma unere baruode yui tome to gajneri, ga asíome gajneri baruode, ga unere yui ome to gajneri, yoque Dupade. Gusu ua uje baruode cho cucha uneréjnane ome yoque, Dupade.
Yoque Dupade, yacaranguipis ome ua gajneri jetiga átaja yoque gajneri jeta baruode quẽra iji yocáyipiedie gajneri. Ga ca yicadíjoi yocacadisórone acaditigade ome yoque gajneri, yoque Dupade. Yoque Dupade bojninga: “Ujetiga uaté goto chajéngome yu, ute gosi chajéngome yu, ga yajégome to jetiga yise jnumi.” Chi bojninga nanique iji taningane, yoque Dupade.
Dupade, átaja yujodie chequei, uyoque to gajneri, ga uneripise baruode yui ome yoque gajneri, yoque Dupade. Yirajágo uje jiei yoque nanique uje yoco cucha bisideque iji baruode, mu que yirajágo gotique gu, mu e yirajágo uje que cucha bisideque ua gotique, yoque Dupade. Yiraja uje baqueta togode nanique iji taningane, yoque Dupade. Que uñeque cuse gotique jeta chiqueta totique. Gusu ua uje baqueta togode nanique, yoque Dupade.
Yoque Dupade, yacaranguipis ome ua uje e baqueta Teresa, yoque Dupade. Bamo uje ejnareté dirica, mu baqueta, yoque Dupade. Que uñeque cuse ujetiga chiqueta ejnaretátique; gusu ua uje baqueta yoque. Yacaranguipis ome ua uje udúco baruode iji dirode jnese, jnanione uyoque.
Dupade, yicatecã́ri ua ome bajnacari Jesucristo i. Amen.
*sigásodie – cigarillos
Dajuñangue – Tobité, Bolivia – agosto de 1975
Marina de Morarie churúsãre Dajuñangue uruode nanique
