Ore chujé caratade ga ore chica jnumi ga ore tãre gai:
- Ga ore doi gatoi bajaque.
- Ore chuchie jnumi tac-tac-tac.
- Ore dopoi ti rĩ guidedie.
- Quigade ore doi gatoi.
- Ore cha ga ore cho ‘jí-a-que’ (jíraque).
- Uje uacajnai tu ore ga guidai gajnesṍri bajai tu jeta tãre gai.
- A chajni ome ga uté jé doi to.
- Chome pijñecade. Jé u perane u. Je chirate perane.
- Que ore chuseque.
- Ujetiga ore tṍra rome ga chiborátaja dequejnaréngone.
Diyoi Ditaite:
Ore chujé cucha urõsoi ga jé ditac ore ga ore chise gapudíe, ga chisi ñane cucha pibosode, cutepéode, ga quigade u uje ore chimate ditai ga ore chacája ñane.
E ore doi dabayode ejode.
Ditacho ditai, corãchade:
Uje ore chujé cucha urõsórique ome ga ditac. Jeoga ore chichagu cucha urõsórique ome asõre ga dité, jeoga docoji jeta ore chicho cojñoi ome docoji ga dité. Ore chujé cucha urõsórique ga jé ore oite dorãchai. Ore noñome gu uje tãre gai. Qué ore tṍra doráchade ga ore chosaja jnumi ga ore noñome iji te. Ore chécãre dorãchade. Ditaque orãchade ga que poicho ga ore pésu uñai.
Cajoidé – Campo Loro, Paraguay – 1985.
Marina de Morarie churúsãre Cajoidé atatagode udojo.
