Potadie – Taboidie Ore
Ore chubúchu uje durasé enga ore chipotingára. Ore chujé cucha urõsode enga ore chigójna gai. Ore chipotingára (potadie) uje ore doi tabóidie. Cucha urõsode chimate date urõsode ga ayoréode u uñane, jé aja caratade, aquirájnane, cojñone ore to.
Ore doi taboidie uje ore jnusina iyode. Uje guedé e déji jnumi enga ore chipotingare. Ore cho jóno-jóno. Chojmára ayorei uje chipotingare.
Ore chujé degode ica mu ore jnusina ga ore doi tabóidie. Jnacarode, jnanione ore pésu taboidie jnese. Ga ore jno uje guedé jé paráta. Ga ore chipese cutepéode aja dajesúode uje que ore taque to. Jnanipísode uje ore cuta ga ore chácariji degúi. Mu uje uyatac ore enga ore doi jnese.
Gare ore catójadie uje ore chijnoque. Ore gajneque uñai, jé basa ga ore acotei gajneque uñai. Ore di cutepéode údi enga ore pésu taboidie iji degúi.
Ore tibidi dajorane enga ore chojninga: “Beyoi iyoi te jne a.”
Ga ore turua gueguerade, ore chiporigase dabai ome gueguerade. Ore baque ga ore doi cutepéode. Ore chijnime dagatója iji depei. Ore jno údi ome dacotei. Ore chisi ome ñane.
Jeoga yoca, ga ore chisi ome ñane to. Ore cãra ore gatójadie. Ore tẽra daborade ome dacotéode.
Picaneraque gosi ga Cutamúrajane u uté gosi acotéode. Étacõrone que toc jeta ore tagu daborárique uje uerate ore gu. Ga ore chisi ome ore jnese. Que Étacõrone tagu pocáidode uje uerate ore gu. Dutué utiedie ga Étacõrone uerate ga que ore tagu dutué utiedie.
Pocaidode:
Ore ininaquéo iji dire chojmãra.
Uje ore chisi ome dacotéode uje ore acade jiei ga ore pésu pocáidode ga ore chisi sequeredie gajnéone cucha ome dacotéode. Ore chojningame dacotei: “Yipésu yajóningarique ome yacotei.” Ore acotéode ore poso ore ipesudi pocai.
Ore chojninga: “Yicopoi dirome rĩ, que yajo yoquibotique iji bajai,” ga ore dopoi rĩ. Ore tujuapója rĩ.
Ga ore chécãre dagaidi cuchai iyoi, jeoga ayoré iyoi ga cojñoi iyoi ejoi, jeoga caratai tu.
Chequedie ore todo cucha urõsode iyode ga que ore tagu. Jé basa ga jeta ore tagu ga tagu ore ajéode.
Cajoidé – Campo Loro, Paraguay – 1985.
Marina de Morarie churúsãre Cajoidé atatagode udojo.
