Uroi catecã́ri Dupade:
Udúco baruode iji domingo tuné, yoque Dupade. Que yimo jeta barasique ua uje badute baruode iji yoquibijnani uje yacaco yocujode banguresóño ore, yoque Dupade. Mu ajusipise baruode guio iji dejai udé to, yoque Dupade, iji baruode jogadi udé. A yudúco baruode iji gajneri, yoque Dupade. Cáma yudúco que mu, a yudúco jne, yoque Dupade, enga ajusi yoquio gajneri uje uduco pacajnaquéode.
Davidé que déji guidai marínga, mu yamátago yoque ome baruode. Que yiyágo gotique, yoque Dupade, mu que toc jeta uñeque chacate yogome baruode, yoque Dupade, uje Davidé e jno, yoque Dupade, mu a yacate yocurasade jne. Mu aródiji sañeque, yoque Dupade, Davidé, Jómone ore ujetiga ca cuchárique gajnarénguiji ore, yoque Dupade. Enga jeta chacate yoque dirome iji domíngoi, Davidé. Bamo uje chiraja baruode. Chiraja baruode quigode uje chingo yoc iji domingone jnese, yoque Dupade.
Enga átaja yoque gajneri iji baguíjnai udé uje bangári baruode gajneri iji yibijnani, yoque Dupade á. Ujetiga jec areque gajneri baruode ome ua, yoque Dupade. Enga barasique yoque gajneri jeta adute baruode. Icatecã́ri ua ome babi Jesus i. Amẽ.
Uroi chatata Faraón urigode quigode:
Yajirigode u ore eduguéjna cuchábi Faraón urigode que iji durasé udé. O yáyugu uje yajire bisideque. Mu Don Len chise yu que, mu que yiraja yajiritique quitígo. Que yiraja yajéningo jeta yacate uagome. Uje yajire Faraón urigode. (Genesis 41:7-16)
Uje eduguéjna cuchábi Faraón chi mo nanique iji dejai. Mu urigode gajnárecho. Enga chi chĩ́cara ga aquirájna ueradedie doi. Mu quigade ga aquirájna godóguedíe chi doi dojodie aquirájna urojnai enga chi chujé. Enga chi tagu ga jogadi chona.
Enga eduguéjnai cho dáyugu re. Uje urigode gajnárecho ome re. Mu chi mopo rĩ enga doi damoque ichai. Chi mo mu urigode uñane chise. Maiz querúode chi doi Faraón urigode. Mu quigade ga maiz cosocodábidie doi Faraón urigode. Ga maiz cosocodábidie chujé maiz querúode. Enga tagu ga íjnoque jogadi. Mu eduguéjna cuchábi chi chojninga: “O yáyugu yu ome yurigode uje gajnárecho ome yu.”
Eduguéjnai tibidi daijna gajnaréngone:
Enga chojninga: “A yi daijna gajnaréngone ome yurigode jnenga ore chirajape jne. Uje gosi chiraja enga a yijnime yu iji yiyaridi tuné ga yicháji gosi taja.”
Enga chi doi daijna gajnaréngone iji erámi. Chatatame ore mu que ore chiraja urigode go.
Eduguéjnai tibidi José:
Mu quigade ga iroi uje chisi ome vínoi ome deduguéjnai narare enga chi chojninga: “U baroi uje bajuru gai uje i tu José. José u uje chiraja purigode to.”
Enga chi Faraón chojninga: “Be enga chajire yurigode to. O yáyugu yu yurigode uje gajnárecho ome yu. Daijna gajnaréngone que chajnerame yurírique gotique.
Chi ore doi José ga ore chijnája eduguéjnai iguíjnai yui uje ore suru gai tiji. Chi ore chojninga: “José á, uyoque u uje yibájoi ua. Jé ibájoi ua ujetiga araja eduguéjnai Faraón urigode. Uje daijna gajnaréngone que ore chiraja go.”
Enga chi ore chécãre José iguidedie. Chi ore doi oite ueradi ga ore chadíja. Tujúna dajúnone to. Chécãre dadode ga ore chijnímiji eduguéjna iguíjnai uje ore suru gai tiji. Enga chi jno ga chajnai Faraón yui.
Eduguéjna cuchábi Faraón chatata darigode ome José:
Enga chi chise Faraón enga chi chojninga: “Faraón á, ¿Jé gotique?”
Mu chi Faraón chojninga: “José á, qué icatecã́ri ua ujetiga arajape yurigode. Yurigode gajnárecho ome yu iji dejai seque. Ujetiga arajape yurigode,” chojninga Faraón ome José.
José chi chojninga: “Iraja.”
Faraón chojninga: “José á, yícãra enga cabayu urojnanie déji tié edúdi. Mu quigade ga cabayu godogábidie doi aquira urojnanie ga chujé. Enga tagu ga íjnoque jogadi. Ga siete godogábidie rĩ,” chi chojninga. “José á, ujnojo que, yurigode. Ga gajnárecho ome yu.”
Enga José chi chojninga: “Iraja.”
Mu Faraón chojninga: “Imopo que rĩ iji yimoque ichárique enga yimo que mu maiz querúode doi yu iji yurigode. Mu que yiraja gotique uje maiz cosocodábidie dopoi yu rĩ. Doi yu enga doi maiz querúode. Enga chujé enga tagu enga a chona.”
José catecã́ri Dupade ome Faraón urigode quitígo:
José e quejnáji Dupade yui jeta chátaja ome Faraón urigode quitígo.
José chojninga: “Faraón á, Dupade irajatíga uné. Faraón, barigode udore chi imóringui sequeré noñangue jne, siete sequeredie enga chi imóringo chaguhéo iji erámone jne,” chojninga José ome Faraón. “Mu que yirajatíga go. Dupade irajatíga uje chingo yu,” José chojningame.
Chi chojninga que, eduguéjna cuchábi: “Que yirasique yu ome yurigode go. Daijna gajnaréngone que ore chajnerame yurírique go ome yurigode jeta ore chiraja,” Faraón chi chojninga, “Mu a yejna daijna gajnaréngone ore iji erámone,” chi Faraón chojninga. “Uje que pirajaque yurigode go ome ore.”
Uje chojninga que: “José á, a yijnime yu iji yijogadi te jne, ugúsi ucase enga a ore cho deduguéjna iji ua jnese jne iji sequeré omenie, jé iji sequeré noñánguenie to.”
Chi cojñone uñéngo chingo darigode aja José to uje qué déji ore jurúgaipídi ajei:
Enga chi ore chatata darigode ome José jnese.
Chi uñeque chojninga to: “José á, arajape yurigode to,” chojninga. “Que yiraja gotique que uje yiji enga yiji durasede enga, José, yiji durasede iji yurigode enga yijnoque yibosode iji canásta iji yatoi durasede. Mu chugúpẽre chagúode iji gatajnoque tagu yibosode iji yatoi durase,” chojningame José.
Mu José e chojninga: “Iraja. Enga imóringo u uje ujetiga barósõri tuté irógode chujé ua jne enga ore tṍra ua aja ajãro enga chugúpẽre chagúode tagu ua iji guesi.”
Quigade ga uñai chojninga: “José á, yĩ́cara to iji dejai tuqué ga cojñotique chisi úvadie adie ome yu,” chojninga, “Cojñotique chisi ome úvadie adie ome yu iji yurigode,” chojninga.
José chojninga: “Iraja. Yiraja arĩa barigode. Udore imoi chi u ujetiga chiroque ua iji quigade. Bajne tu úva adie ujetiga apésu eduguéjna cuchábi jotai vínoi ome udire. Enga uacarigode quigode u unojo. Mu que yirajatíga go. Dupade irajatíga uje chingome uaque,” José chojninga.
Uroi chojninga: ‘Yajirápo aníri Juan, Pedro ore adode rĩ iji Hechos:
Juan a chojninga: “Pedro á, yico ga icoi Dupade iguíjnai jne uje guedé cho jñuque. Yicoi ga yicatecãcoi Dupade iji jne.”
Enga Juan, Pedro ore jno ga ore chicáji Dupade iguíjna cuchábi. Chi ore chajire Dupade iguíjnai piagoi mu ore chimo jnani iji uje noñaque. Noñai uté qué chirote cojñone ore iji Dupade iguíjnai piagoi. Noñai u uje chi noñángaja guesi tiji daté. Datéringa uje a chugutana dagutadedie aja Dupade iguíjnai piagoi. Ga chirote cojñone ore iji. Mu chi Juan, Pedro ore tṍraji to ome Dupade iguíjnai. Mu ore chajire daquei tiji ga e ore chimo noñai tiji. Enga qué chirote cojñone tiji Dupade iguíjnai piagoi.
Chi noñai iji chojninga: “¡Juã́! ¡Pedro á! ¡Uaque!” chi chojninga. “Yicatecã́ri uac ujetiga asíyope yu iji cucha ajóningárique,” chi chojninga peroi. “Uacamóño uje peroque yu ga que toque cucháringome yu.”
Juan, Pedro ore chisiome cucha ueradi ome peroi uje chutai cucha ajóningárique ome ore:
Enga Juan, Pedro ore chojninga: “Iraja.” Chi ore chojningame peroi: “Iraja baruode, mu íjnoque yoquiplátadie. Íjnoque oro iji yoque.”
Mu Pedro chi chojningame peroi: “Peroi chá, íjnoque yiparátadie, íjnoque cuchade iji yu, pijotade ujetiga yisi ome ua. Mu a yisi ome cucha ueradi ome ua,” chojninga Pedro. “A yisi ome cucha ueradi ome ua jne, ¡cucha ueradéjna!”
Mu peroi chi chojninga: “Juan, Pedro, uacamóño yu to nanique uje ibasíji ité nanique ga noñaque yu aja guesi nanique. Enga qué yugúsiji de iji dirode unojo. Ga asíyope yu iji uacabotique, jeoga uacapláta ajóningárique. Uacamóño to uje peroque yu nanique iji ité ajei ga jé qué u aja dirode udojo.”
Juan, Pedro chiqueta peroi nanique uje ore chĩ́care Jesuse i:
Mu Juan, Pedro ore chojninga: “Peroi chá, yiraja mu íjnoque cuchade iji yoc, mu a yisígo ome cucha ueradi aja ua enga cucha ueradi tuté u Jesuse i.”
Chi Juan, Pedro ore chĩ́care Jesus i enga ore chojninga: “Be guesáringai tuté ga ayágue. Mu ayágue gajnerí enga asa bagutadé uaté ome bãrachúa te enga ca apúsaja ome bajmainie, bajmanecade ore. A asa baqué tome bãrachua te enga jeta asa ome naque gajnerí, mu qué ayágue.”
Ga chi peroi doi guesáringai te ga chi cháji enga doi ore uruode. A Juan jmanecai chi jé jogadi tiji ome peroi. Mu Juan chojninga: “Ayague, Peroi chá, ayágue. Tatoguei á, ayague.”
Ga tatóguei doi uruode ga chi chague. Enga chisa dogué ome dãrachua. Enga chague jmame, enga uqué e dique. Enga cho omone. Cho jetiga etóguiji daté ajei nanique.
Mu Pedro, Juan chi ore chojninga: “Que yirajatiguei go. Dupade irajatíga, Dupade ujopié tu yoidé.”
Ore chiqueta peroi. Mu Juan, Pedro que ore iquetaque go. Dupade ujopié tu uje déji ore ajéode. Ga ore oidé tu Dupade Ujopié aja quedéjnane uje chiqueta peroi. Ga ore irasique re uje ore chiqueta peroi. Mu que ore iquetaque go. Dupade Ujopié u. Dupade chingo dajopié taja Juan, Pedro ore. Ga ore chijna Dupade ujopié aja quedéjnane. Ga Juan, Pedro ore chiqueta peroi, tatoi. Enga etoque iji dirode udojo. Cho jetiga etógaja guesi nanique iji daté ajei. Ga chi peroi irasique re uje Juan, Pedro ore chiqueta. Mu que ore iquetaque go. Mu ore iquetaque uje ore chijna Dupade ujopié aja quedéjnane.
Garósi to uje yajire Dupade Uruode to iji guedé jnoringai.
Uroi – Tobité, Bolivia – 1970
Marina Morarie churúsãre Uroi uruode nanique
