Dupade anguresórone etoc ore ome cuchade:
Jé uacamóño uje que yiraja cojñotique urúrique to. E ueradé yocuñane. Mu etoguipise Dupade. Etoque Dupade. Mu Dupade anguresóningo, anguretórigui – chequedíe, gapudíe ore – agúsoi Dupade to. Adotáyo uágaja. Dupade anguresórone etoc ore ome cuchade. Etoc ore gu uje que ore pota cucha quedéjnarique gotique.
Que Dupade anguresoripísode ore pota cuchárigo mu ore ipotigádode u Dupade:
Uacamóño uje ipótago cuchade jnese. Etoguipise Dupade Uruode. Jé uacamóño to uje jiei yoc uje que yoco etóque iji Dupade gotique. Etoque Dupade, mu Dupade anguresórone ore adi uyoque uje yipótago gapua. Jé adi u uje Dupade anguresórone adi u uje que ore pota cuchárigo mu ore ipotigádode u Dupade.
Adi u uyu. Ujetiga yipota gapúraque ga yedo que chamurase iji ti. Dupade anguresore ore adi u udé. Que ore pota cuchárigo mu ore ipotigádipísi u Dupade. Mu uyoque ga yiyágo iji gai. Etoguipise gu.
Que etoque cucháringome Dupade gotique:
Mu yacaranguipísome don Pablo, don Len, Ipeyai ore uje ore di iji yoque. Jé etoque ore uje ore di iji yoque. Arajáyo Dupade uje que etoque cucháringome gotique gu. (Mateo 22:37)
Cojñoque bajade ore chotigase:
Mu qué adi jé u cojñoque bajade uje cojñone chi ore chotigase. Adi u uje yotigágo Meráminé, Juan ore. Uje yojníjo: “Arapataque Meráminé ore.”
Cojñoque ore iji yocujade chi ore chojninga: “Que yanguretágo Dupade. Arapataque ore gu, acadisórone, Pedro ore. A guérique tagu yoque mu yeru poridie,” ore chojninga. “Yẽco cucaranone. Amo cucarani uje de ti uje umare. Ga yocajéo. A yoquisatígo chise jeta yotique chise de pajei.”
Yacaranguipísome don Len ore uje ore chise yoque:
Ayoréode yocadi udé. Yocadi u cojñoque bajade adode gu. Mu yacaranguipísome don Len ore uje ore chise yoque, ga ore chingo Dupade uruode aja yoc uje que etoque gotique. Socase ti ga ore chajni yoque to ome dacajnaquéode. Etoc ore, uyoque. Que yotigáco yocacadisórone ore uruode. Yacaranguipis uje e jiei cojñone ore uje ore chingo Dupade Uruode aja yoque, ayoréode uyoque iji de Rincón.
Adotáyopíse uáguiji Dupade gai gajnerĩ ujetiga yanguretágo to:
Etoguipise Dupade. Etoque gu uje jiei yoquipotiguéodecucha unejángone. Uacamóño uje adi uyu uje yipotapísa Dupade. Yipota Dupade jeta yangureta, mu yicha yiroquéode aja ujade. Jé Dupade uruode que chaca yajei gotique.
Dupade chi di jne, enga chicha yógaja dajmana ajã́ro. Jé uacamóño to uje yoquijmana ajãro ajãpe. Ajãpe ga a yicha yujórique ayoré disírique aja ga chapédugu. Dupade chi di jne, enga chicháji ua iji dajmana ajã́ro jne jé aja cojñone, jé aja cuchisode ore uyoque. Jé cho yoque júruru.
Jé uacamóño uje ajãpe yoquijmanai ga ayoré chojmarai chapédugu. Dupade cho dajuñame yoque uje chi chicha yógaja dajmana ajã́ro jne. Chamáta cuchisode ore uyoque. E uacamóño uje e jiei cuchisode, cojñone ore uyoque. Itoróngaja. Chi itoróngaja jmana ajã́ro.
A di jne enga chujé ibiotígo tese rĩ. Tagu cuchade enga chejna cuchade udore jnese. E tagu yoque júruru. Etóguipise Dupade Uruode. (Hebreos 12:29)
Rincóngosi – Rincón de Tigre, Bolivia – 1970
Marina de Morarie churúsãre Rincóngotique uté uruode.
