Pablo irasique ujeta chujé Jesuse anguretasórone:
Yipota jeta yingome yoque ome San Pablo anírone, úringai sijnaque nanique uje cáma changureta to Jesuse nanic. Irasique ujeta chujé Jesuse anguretasórone. Irasique ujeta sue ore gai nanic. Mu que chiraja uje Dupade ajegaite jne ujetiga jno Jesus ujnomei údi aja erámi.
Adi jé u yu. Que yiraja uje Dupade ajegaite yu uje qué sijnaque yu nanique. Mu chise diri nanique uje San Pablo changureta Jesuse enga chacate ore uje changureta Dupade to. Ujeta ayorérique chacate yu ome Dupade Uruode to nanique, mu chacate yu bisideque, uje bijna ore acajnaquéode uñengo ome yu gu.
Cojñone yungore Pablo maringa, quigade enga chacate ore ome Jesuse:
San Pablo chacate cojñone ore rĩ ome Jesus, mu chatata dáringai jõcaratáguiji aniri, uje cáma changureta to Dupade nanic. Chatatame ore to uje changureta Dupade to. Ajéode u ujetiga disi ejode uyoque yĩracója urusarane gai enga yatatágo quitígo to. Uje jiei gu versículode iji Dupade Uruode uje San Pablo urusãracho ome yoc ujetiga yirajágo. Chojninga: “Que yacajnaquéo go. Dupade Uruode u. Dupade acajnaquéode u yurusãrane.”
Jé basa ga qué chacate yogome udore, San Pablo. Uje yajico urusãrane enga Pablo qué cho yoquiquique enga que gusu yoque, mu, chacate cojñone ore iji erámone jnese to. Chatata dojñane ga chojninga: “Yiji ga yicáji anire, ga yigarabu Jesuse anguretasórone, ga yiquejna aja erámi uje yucué ore.” Chi chigaru ore aja jnumi nanique, enga chujé uñane, jé basa ga suru uñane ore gáyode.
Pablo chudute darade ga chojningame: “Jé uhúa, ¿gosi te?”
Chi chirore aníri, ore idai, ga jĩrique cho pũru iji jnumicho aja jorane ore. Jorane ore aníri, chajúgapo ore agutedie rĩ. Uje ore chudute darade, mu que ore chimo cucháriguiji gaté. Mu darai chojninga: “¡Saulo á! ¡Saulo á!” Mu que chingo cuchárique iji darai udore gotique iji gaté rĩ. (Saulo u San Pablo i nanique uje cáma changureta Jesus.)
Pablo cho pobre iji jnumi tome darade. Chojninga: “Jé uhúa, ¿gosi te?”
Mu chojninga: “Cachi Jesuse tu yu, bamojoi tu yu,” chojninga. “Uje bo bamojo yu,” chi chojninga.
Chi chojninga: “¿Jé yipesutígome ua,” chojninga, “yangaráni a?” chojninga.
Mu Jesuse chojninga: “Bo, acáji aníri, ore idai. Acáji, ga a ore chingo bapesutique cucha ome ua,” chojninga.
Mu yingome uyoque uje yocajnei jé u to uje jiei jnanione, chequedíe uyoque, mu que yocuñeque changureta Dupade iji dáringárique disape to. Yocajnui u Pablo uje unere isijnaringuéone ome. Unere dajocaningane uje cho damojo ome Jesuse anguresórone. Mu que chiraja uje Dupade ajegaite. Uje a Dupade, a ore chiroque jne jeta jno Jesus ujnomei údi aja erámi.
Mu adi jé u iji deréjnane unojo. Uje josipíerãque yoque, sijnaque yoque, mu Dupade u uje pota yoc ujetiga yiyágo yocúringane sijnac. Pota jeta chiroque yoc. Ajegaite yoc.
Ananías cho Pablo quique enga Pablo tangári.
Chi ore di iji guidai ga jnani uñai déji. Ananías gotique. Chi chijnája daguíjnai. Chojninga: “Jesuse u yojningai uje chiqueta ore gajnerĩ. Uje chejna bajirigode. Mu pota ujetiga chiroque ua aja ore, purása quedéjnane iji erámi,” chojninga. Ananías cho Pablo quique ome udore enga Pablo tangári.
Yudúco uje chĩ́care purása quedéjnane. Que yimo jeta ayoréode uyoc u, mu a u uyóguiji erámi jnese uje que judío uyoque. Mu San Pablo u uje Dupade chirógaja ore, uje e changureta Jesus nanique gu, enga cha dasijnaringuéone. Que chiróguirási gotique uje cho damojo ore, uje chejna ore iji damojoi, mu jé u uje chiroque Pablo uje changureta Jesuse. Pota gu jeta erámi jnese chudute dajnacari Jesucrísto ujnomei, uje toi ome ore iji curesei gai.
Ejo ayoréode yogome Dupade Uruode iji deréjnane unojo. Mu e yanguretágo Dupade. Mu que yicoi Dupade áyipiedie quitique gotique. Que yimo ujeta jé ũré yu uje que yicoi Dupade áyipiedie quitígo to.
San Pablo jno enga doi Dupade iroquéode, enga chacate ore:
San Pablo u uje chacate cojñone ore. Chatatame udore ore uje chi Jesuse chiqueta raja enga chirógaja daroquéode. Uje chojninga: “A yiroque ua aja purása quedéjnane iji erámi,” chi chojninga Jesus.
Jesuse u uje chiqueta raja Pablo. Que yiraja ujeta icha jeoga ore enomícho. Mu a Dupade Ujopie chiqueta raja nanique.
Chiese yanguretágo Jesuse to, mu que yijnángo Dupade áyipiedie to:
Enga que yijnángo Dupade áyipiedie to. Yajire Dupade Uruode iji ta. Yajire Dupade Uruode uje suse yiro. Unere uje Dupade Uruode dé ti. Enga jé chopise. Uje yipéco Dupade guetégode cucha. Yajire uje chi chiqueta jnani ejnaretac uje Jesuse ore chiqueta ejnaretade ore nanic. Mu Jesuse ujopie cuse ome udore, mu yajico Dupade Uruode bisideque, ga que yijnángo unojo ore to gotique. Uje chi jnani bajade ore adi tu. Ore chiqueta ejnaretade ore to. Mu que yirajágo.
Mu deréjnane u uje Jesuse pota jetiga yójigo iyoi uje chingo yoque. Que yipéco to gotique Dupade uru quitígo. Mu San Pablo u to uje chatatame yoque to ujetiga yójigo Jesuse iyode cucha uje yujnusinángo. Chamáñaje Jesuse urúo nanique ujetiga yipéco. Mu bamo uje que yijnángo áyipiedie iji de jnumi. Mu jé ca yiyágo iji de jnumi ujetiga yijnángo. Chamáñaje bajé áyipiedie udire nanique ujetiga yipéco.
Mu yacaranguipise uje San Pablo chatata anírone, úringai sijnac uje aníri, que chise Jesuse anguretasórone unétique nanique. Mu ejo u, uje Dupade Abi chiqueta raja, uje doi Dupade iroquéode iji erámone.
San Pablo u uje jno Jesus ujnomei údi aja purása quedéjnane uyoque:
Di údi iji purása quedéjnane, mu Jesus anguresõre judíode u uje ore chãraque ome nanique ujetiga chacate purása quedéjnane iji ore iguíjnane nanique.
Que ore chiraja Jesuse uruode ome Pablo, ga Pablo chojninga: “Ca otigase yu. Jesuse u uje chiróque yu aja purása quedéjnane uje chijnóra ore to.” Mu judíode ore chotigase purása quedéjnane ujeta ũré ore ome danguretaretigade ome Dupade, uje chi ca ore pésu Moises urusárane Dupade urúo gu. Mu Pablo ojningane ome ore u uje e íjnoque cucha puyade ome purása quedéjnane ore uje que judío ore gu. Jé basa ga, que ore doi judiode adode maringa, pujuregate ome ore jeta piquetaque ore to ome Jesus to.
Mu judíode udore ore chajo raja enga ore chojninga: “Jec ũré uje judíode yocajnécho Moises urusãrane Dupade urúo, mu ujetiga purása quedéjnane pota changureta Dupade enga, a Dupade pota jeta ore doi iroquéode to jõ.”
Mu San Pablo cho ore quique enga chojningame judíode ore: “Dupade chingome judíode uyoque to cucha puyade. Mu que judío purása quedéjnane go jeta yisígome ore. Mu Dupade ipotigádi u unojo ome purása quedéjnane ore uje ore changureta Jesus: pota jeta ca ore pésu Dupade guetégode cucha. Dupade chingome ore aníri, ujetiga ca ore tagu cucha pibosode uje ore tẽrame dangurenone ayoré gajnuo. Ujetiga ca ore tagu ayoré gajnúone gajnetique cucha pibose uje gajnáreque gu. Que Dupade gajneque gu. Ayoré gajnúone gajnécho. Chingome ore ujetiga ca ore tagu cucha pimocherane uje iyoi põ, anirone ore.”
San Pablo qué jno dacajnaquéode ome judíode enga chojninga: “Dupade guetégode uñai qué déji uje Dupade charángome judíode uyoque to, enga charángapo ome purása quedéjnane ore to rĩ, enga u udojo: ‘Jé ca uñeque tungarápoja chequé quedéjnaraque rĩ. Gapudie ore rĩ, gusu abai ome, ujeta gusu ore ome ñane.’”
Enga udore ore u San Pablo urusarane unojo ome Dupade anguretasórone iji erámi.
Bamo uje Dupade pota jeta yujnusínango uje Dupade etégode cuse ujeta ca yipéco jeta yanguretágo. Cojñone uñane ore tẽra dabosode ome ayoré gajnúone uje ore cho Dupa iji ore. Dupade chetaque jeta yajo pibosode udore uje ayoré gajnúone ore gajnécho.
Daniél, jorane ore que ore tagu eduguéjna cuchábi posode nanique:
Ore eduguéjna cuchábi tagu ayoré gajnúone gajnéone cucha to nanique. A uacadúcho uje ore eduguéjnai uté chisa Daniel, jorane ore nanique, enga jno ore údi aja daniri jeta ore doi iroqueode. Eduguéjna cuchábi chisíome dabose unérone ome Daniél, jorane udore, mu que ore tagu gotique nanic. Aníri, Daniel que tagu uje chetaque gu uje eduguéjnai chacãre dangurenone ayoré gajnuo gai ome dabosode gu. Daniel ore chetaque eduguéjnai posode, mu eduguéjnai que chiraja gotique gu uje ore chetaque. Uje uté que changureta Dupade gu.
Mu ayoréode uyoque uje yugúcoji erámi tudé, mu yipéco Dupade guetégode cucha iji ujade to. Yiyógo Dupade ojningane cucha gai. Yajo gai. Mu yingome yoque ujeta yujnusínango Dupade to uje chãraque cuchade ome yoc. Udore anírone. Cucha gajnaréngone ujetiga ca yipéco ome uñeque. Gusu ujetiga yujnusínango ojningane cucha. Dupade pota cucha omone ome danguresórone mu chãraque cucha gajnaréngone ome yoque.
Darujna aode déji uje anire, purusarane chusaque:
Darujna aode déji udojo uje anire, purusarane chusaque. Ga que yimóngo go. Mu yajico udore enga ca yangácoi Dupade ojningane cucha. Cho jetiga darujna aode déji purusarane quigode jeta purusãraque ichade u uje aníri, chijna Dupade guetégode iji yocajei. Ga chimesa cucha uñane iji yocajei jeta ca yicoi Dupade guetégode cucha unétique. Jé basa ga gusu ujetiga yinínango Dupade imeserane cucha ujeta yipéco. (Romanos 12:2)
Uje San Pablo chacate judíode ore, ga qui tu ore iji Dupade iguíjna cuchábi iji uraque uniri casodica. Chajuque judíode unojo ore agutedie uje chi Pablo umajo Jesus anguretasórone nanique, mu chi e chijnóra ore. Ore chiraja uje chacate ore ome Jesus adode to. Mu chi ore pésu dajéode ome Pablo jeta ore chujé. Ore chacho acajnaquéode ome Jesus ujnomei gu. Mu Pablo chayome ore.
Yoco judíode iji Dupade iguíjnai nanique enga yetájo pacajnaquéode ome Dupade Abi Jesuse:
Yoquisocai jec upo judíode isocade iji Dupade iguíjnai enga yetájo pacajnaquéode ome Dupade Abi Jesus. Enga que yanguretágo to. Josipierãque yoc iji taningai. Ga yocumajo ñane rĩ. Yocúringáringo jõcaratac. Que yipótago Dupade urúrigo to nanique uje que yirajágo cuchárique.
Yajo Dupade guetégode cucha aja, ga jé adi u San Pablo to. Que chiraja cuchárique iji taningai. Cho jetiga pipoguiete cucháringome. Yirajágo uje chi ca Dupade chiraja yocoritique, ga yirajágo uje chiraja, mu yoríago. A jé yoco San Pablo jõ. Cho jetiga pipoguiete cuchade ome yoque to.
Jesus chiqueta raja San Pablo nanique, enga e chiqueta raja ayoréode uyoque to:
Mu Jesuse chiqueta raja San Pablo nanique uje ajegaite gu ujetiga jno Uruode údi aja purása quedéjnane jne. Ajegaite yoque to ome daroquéode. Dupade ajéode u ujetiga yijnángo ijnoraquei aja erámi. Uje yanguretágo Jesuse ga yocúringai ayoré icha u. Adi u San Pablo to nanique. Icha to. (2 Corintios 5:17)
Yujnusina uje Jesuse toi ome yoquisijnaringuéone. Uñane chojninga: “Que yangureta Jesuse mu paraque yu.” Dupade ijnoraquei ome yoque u uje chiroque dajnacari aja erámi ujetiga toi ome yoquisijnaringuéone. Dupade pota yoque gu. ¿Ja ca omi tu ome yoc ujetiga yipótago Dupade to a?
Dupade u uje que chetaque yoque go. Cojñone, ayoréode iji erámi yetájo ñane. Mu Dupade pota jeta yijnórango pijnoraquei tome ñane uje yanguretágo.
Yijnángo Satanase áyipiedie ome yoque uje áyipie yuque yoc uje yujégo ñane. Dupade áyipiedie u uje yijnángo yocate parágode.
Yingome Pablo atuatigade ome yoque. Atuatigade jiei iji úringai sijnac. Atuatigade uje cho damajo Jesuse anguresórone. Mu chise diri uje Pablo chojningame Jesuse: “¡Yangaráni á! ¿Bapotigátique a ujetiga yipésu jne?”
Cucha omi tu ome yoque to jetiga jé yocuruode u San Pablo uru casodicaite enga yojnijorásome Jesuse to: “¡Yangaráni á! ¿Bapotigátique a ujetiga yipésu jne?”
Pedrodé – Tobité, Bolivia – 1970
Marina de Morarie churúsãre Pedrodé acajnaquéode
