Cojñone chirajapise Dupade Uruode enga ore chingo yoque:
Dupade Uruode déji darujna aode jeta chacate cojñone, ga cojñone chirajapise Dupade Uruode iji darujna aode, ga ore chirajapise enga ore chingo yoque. Uacaducho to San Pablo acajnaqué casode ome yoque uje chojnira, chatata uje Jesus iroi Pedro chi chojninga, “Yique u yoquijõrai Pablo acajnaquei.” (2 Peter 3:15-17)
Ayoréode uyoc uñane yocáyipie chejna raja yoquipotiguéode cucha uñane.
Chi Ecarai chudute cojñoi uruode diríca uje chojninga: “Yiraja uje Dupade déji gaté. Enga ipesute cuchade jnese mu a yangureta to jeta choquíjna yu. Cáma choquíjna yu gu,” chi chojninga.
Mu jé adi u ayoréode uyoc uñane uje yirajágo uje Dupade déji gaté, mu yirajágo uje Dupade cuse, mu yocáyipie chejna raja cucha uñane. Yoquijnorétigaiomecucha uñane. Ga que yajico Dupade yúrique gotique.
Ga adi u cojñoi uñai uje chiraja to uje ijõre, ga chiraja uje Dupade déji gaté ga chimo yogome dajopié, mu uté chijnóra cucha uñane. Ga jé adi u ayoréode uyoc uñane gajnerĩ uje yocáyipie chejna raja yoquipotiguéodecucha uñane. Ga que yicoi Dupade ajegaidode cucha gotígo. Iroquéode quigode.
Dupade churúsãre daruode ome Moises nanique.
Jecucha ga yingo uaque uje Dupade churúsãre daruode ome Moises nanique. Churúsãre daruode ome Moises ga churúsãre jeta etégode cucha déji. Churúsãre ome Moises ujetiga yirajágo to Dupade Uruode quigode – ipotigadode cucha, etégode cucha. Dupade gaidi u ujetiga ca yopo Dupade iji cucha uñeque rĩ. Jeta ca yopo Dupade iji ayoré gajnúrique rĩ. Jeta ca yatecãcoi ayoré gajnúrique. Dupade chetaque cucha uñane. Jé Dupade chojninga: “Ca barúrigo gajnárecho ome yu. Ca adojnóngaja yu. Ca adojnóngaja yi,” chojninga.
“Anire, angaripísi baté, bayé ore,” chojninga Dupade ome darusarane ome Moises. Churúsarame cucarãte uejade.
Yudúco udojo mu que yicoi go. “Ca asa bejóriguiji diri gare iji ti,” Dupade chojninga uje churúsãre ome Moises. Chojninga: “Ca ajé bojórique ayoré, cojñotique uñeque.” Dupade etégode u udore. “Angaripísi bayé, baté ore.” Jé u uje a ca yangácoi yocayode, yocatedie ore, ga a jé ca yangácopoi Dupade to gotique rĩ, uje yocaiu Dupade gu. Ga a ca yangacorási Dupade adode.”
“Ca apota gapu unejángueraque, cheque unejángueraque.” Ga gosi pota jeta changureta Dupade, ga ca goto ajeigaite. Ca potapise dojóraque chequé, dojórique jnani, jnacare acotéraguiji dejórique. A gosi pota gapu unejángue ore mu e cucha gajnáreque ome ujórique ayoré. Gajnáreque cuchade.
“Ca arapatárique ua,” chojninga, “Ca apota bejominónique ayoré ugúcharigo, ca oria cucha unejángone.”
Dupade uruode quigode u unojo mu yoco cucha bisidéguiji Dupade Uruode uje que yanguretágo to go. Jé basája yocáyipiedie chejna raja cuchade uñane, Dupade etégode cucha. Yoquipotiguéodeunéño cuchade. Yocajéode gaidode u cucha udore, ga deroco Dupade uruode ome yoque.
Dupade Uruode jogadi udé gajnerĩ ujetiga yicoi Dupade iroquéode ga yatecãcoi Dupade iji deréjnane. ((Romanos 8:1-4)
Yimóngo ome Pablo urusãrane unojo uje que togome yoque ujetiga yipéco Moises urusarane Dupade áyipiei, mu Jesuscristo ujopié déji yoque uje yanguretágo uté, enga e que ibirachome yoque rĩ ujetiga yicoi Moises urusarane udore.
Oroné chacãra dacajnaquéode aja jnanírique uje ujnacarode gare:
Uje jnani uje ujnacarode gare ga ujnacare ungaroi chutai dayé ugúchade. Chutai dayé iplátadie. Chojningame dayé, udé cojñoi: “Yapai, jé go ca asi yu baplátadie uécharique ga yi ga yicai punire quedéjnarique uñeque to.”
Dayé chisi. Dayé chisi daplátadie ome ga jno. Jno ga chicai punire uñai mu chise dagaidi punire uñai mu iyajmaque ga chojninga: “Qué ujuya yoquibosode ica mu yijíñongome jnumone ica. Jé gotique a jé yi ga yajni yapade gai to. Yapade uqué, ucode ore gai to.” Jnacari udé adode u.
Cho yoque, cojñone udore ore uyoque, uje yanguretágo Dupade mu yiyágo. Cho jetiga cojñoi uté dopísi ga dopísi páyipiedie quigode ome Dupade. Uje a yangureta Dupade diríca mu yiya to. Yiji ome yáyipie ga que yajirapo yapa, usodé yúode rĩ. Yijíñome te. Ga e yiji. Ga íjnoque Dupade ueratigai iji yu. Ga adi uyoque que. A adi disiode jne. Yiyágo Dupade. Enga yijíñongome iji te.
Ga gajnui tu jnacari uté uje chijíñone dayé iji te. Ga chise. A gosi áyipieraque, áyipieraque ga chajniapója Dupade Uruode gai rĩ. Chajniapója Dupade uru casodica ga gajnui a u cojñoi uje cho dáyugu re iji erámone ga chajni dayé gai. Ga uyocuñéngo adi u iji gajnerĩ ujetiga yujnusínango Dupade uje ujopierãi, enga yajníngo gu uru casodica gai to iji Dupade. Iyágo yocate gajnaréngone. Iyágo yocate gajnaréngone ga yajníngo Dupade gai enga yanguretágopo to rĩ.
Cojñoi di iji dayé. Udé cojñoi di iji dayé. Dayé chimo iji uta ga quejnáji yui. Quejnáji dajnacari yui. Ga chisa uechai iji re, chisa jare ga tagu uredie. Tagu dajnacari uredie. Mu ujnacari chojninga: ‘Yapa, yadode gajnarécho jõ. Yadode gajnarécho. Sijnaque yu ome ua. Ome Dupade, uhuac. Ca opo bajnacari yu jne rĩ. Ga o baróguiji yu ga…’ Ga dayé irasique. Dayé irasique ga irasique.
Jé adi upúsu yoque que. A yiyárase Dupade Uruode ga yiya Dupade Uruode mu cho jeta cha Dupade, ga dayé chojninga: “Baya yu diríca jõ. Cánguretapo yu to jne rĩ.” Uñeque cha jne Dupade Uruode, mu uñeque jé changuretapo rĩ iji dire uñeque, jé changuretapo rĩ. Adi u ujnacari uje dayé que chetaque go.
Ga jé adi u Dupade uje a yiya Dupade Uruode ica, mu yajniapo Dupade uruode rĩ, ga irasigápo yu rĩ. Adi u uté cojñoi jnani uje irasique dajnacari. Chojningame darógode: ‘Beyoi, aquejnáño ome iguidé ueradérigui ga ajnáchoja. Ajnácho jmanepiéragaja jne rĩ. Ajnácho guidárigo aja rĩ,’ chojningame darógode. ‘Boyo ga acueyoi aquiirájna urojnáraque ga yujégo ga yajo jne. Ipéjo domíngo gajnetique ome yujnacari uje yujnacari iyajmaque uje jno nanique ga cho togode. Cho jetiga yujnacari toque mu, ecapo rĩ ga diapo iji yu rĩ.’
Cucha gose Dupade, mu chijnóra ayoré gajnaréngone uyoque, enga pota yoque.
Enga irasique dajnacare ungarómi, mu ujnacare urẽja casica chetaque dangaroi. Ga ujnacare urẽjai déji garai. Di, mu tangári dayé edai, mu jé ore doi dadode iji gajñaminone. Ore chujé deguedie, mu dayé iroi chachai, ga chojningame dayé iroi: “¿Jé gotique u cuchade udore iji guidai?”
Mu chojninga: “Cachi bajõrai casica diapo rĩ. Diapo rĩ, ga ore doi ga ore terame.”
Ga gajnui tu ome yoque gajnerĩ ga ore irasique. Mu chetaque dangaroi. Que chiraja cuchárique. Urásu uje jé chetaque uqué casica. Mu dayé que chetaque to go.
Adi jé u Dupade gajnerĩ uje que chetaque yoque go. Dupade potarása jetiga yanguretágo jnese – jnanione, chequedie, oruyoque. Jé uacamóño to don Pablo acajnaquei que, uje chojninga: “Ca arocho uacáringárique choquíjna. Jĩrique anguretáyo Dupade to iji ne.”
A gosi chojnírarasa: ‘A jĩrique yangureta Dupade jeta e jnani yu. Jeta e choquíjna yu, jeoga yangureta sequere ejo to. ¿Mu socase yitoji yui a? ¿Soca yitoji yui ga yitoi yisijnaringuéone údi ga yicai gajño pioi a?
Jé ueradi u iji de yucuecaringuei. Ga jeta uñeque changureta enga ucuecaringuei déji. Yocuñeque jnani chi changureta iji sequere ejo. Que pimo ejórique. Que pimo jeta yitogóji yui. Jé pimo jeta yico sequere ejórique to. Ajningacho Dupade Uruode to udojo quigode.
Cucha gose Dupade, mu chijnóra ayoré gajnaréngone uyoque. Pota yoque. Que yimo jeta je yiqueca to. Soca yitoi dirome ga, que yujórique ayoré chiraja Dupade uruode quigode to. A gosi basája jeta jĩrique chingo dojode ayoré to jeta piqueta ore to ome Dupade. Que pamo jeta yitogoi, que yirajágo dínique jeta yitogoi. Gusu Dupade uje chiraja cuchade, uje chirajapise cuchade.
Picatecãraitigade ome Dupade:
Dupade, átaja yoque jne. Orone ore chingo yoque baruode to. Yoquirasiguipise ñane. Yoque Dupade, don Len ore. Jeta don Len ore jno dirome ga, yoque Dupade, ga ca ore ate gajnarétique ome máquina aja jnumi dirome aja ore idai yui. Átaja Chagaide ore iji Rincón ujetiga ujnacari ore jnusina ua ome yoque to. Yoque Dupade, uje barodipise yóguiji erámi jnese, yoque Dupade. Átaja Iguijnamúiné ore. Uje jnanione jé adi u ujeta ore chetaque dacotedie oruñanie. Mu Dupade, acate ore ajéode, yoque Dupade. Átaja Davidé ore iji ga ore jnusina ua ome yoque to. Jeta Pajei ore chise dacotedie jeta ca pésu date gajnarétique ome ore, enga chequedíe ore jnusina ua ome dabayode to. Yoque Dupade, ome don Fernando to rĩ. Don Fernando ate gajnarétigo upome guidai jogosórone, Yoque Dupade. Átaja ore iji data ujeta ore cha date gajnaréngone ome ayoredie.
Yicatecã́ri ua ome chequedíe uñanie to uje ore chajéngopísome baruode ga arote ore ga ore cha dajegátigade enga ore catecã́ri ua ome yoque to. Yicatecã́ri ua ome Davidé ore. Eruidé ore ga ore jé ũrepise uje que ore chotigase barúrigo to. Yicatecã́ri ua ome Ipeyai ore urasade cojñoque ga jeta que uñeque chimo dequejnarétique gajnerĩ, yoque Dupade. Badute yoquicatecãraitigade ome ua to. Ca otigase yoque. Jé ũrepise yoque, yoque Dupade.
Oroné – Rincón de Tigre, Bolivia – 1970
Marina de Morarie churúsãre Oroné acajnaquéode udojo
