Yapade chojninga: A jĩrique Oroné toi jne:
Uacadúcho to yate bajade iji taningai ujeta ga jĩrique yangureta Dupade. Jĩraque yipota yúringai Dupade angurete to. Que yajirape yapade ore áyipie quitígome, ore isocade to, ore isadodéringane gajnéone, ore tódode gajnecho.
Mu yapade chojninga: “A uté jĩrique toi jne ujetiga ca doi yocadode to.”
Que yi cojñone adode uñane to:
Mu que yangari gotique, que yangári yapade gotique. Jé yajo yu aja Dupade. Yacaranguipise ome Dupade uje yṍraji monte ga jĩraque yṍra yu ome eduguejnane ga que qué yi cojñone adode uñane to. Mu ayoréode uñane jé ore chirate cojñone aja ore jódedie, jé ore chóji yote pioi. Yacaranguipise uje que yimo udojo gotique iji yoquidai, mu yudute puru ũréone ome misionéro udore uje ore chojninga: “Jesus di jne. Dupade chiroque dabi aja jnumone jne uje ore chujé nanique. Ga chi diapo jne rĩ,” ore chojninga nanique, “ga jno yocúdi aja gaté.”
Ore chojningame yu: Dupade a chiqueta ua jne:
Chi uté diapo rĩ ome ore ga udojo u uje jĩrique yangureta Dupade to ome ore ojñane, mu cho jetiga cojñoque yu ga que yiraja ore acajnaquéode quigode. Mu yipota jóroga Dupade úringai pangurené. Jĩraque yicatecã́ri Dupade ome yu. Jé u uje eduguéjnane ore catecã́ri yu ome Dupade gatuaque enga ore chojninga, ‘A chiqueta ua jne.’
Gajnáreque yatique ome yu, mu jé yipésu; yipésu cucha gajnaréngone. Que yiya gotique. Yipésu cucha gajnaréngone. Yipésu iji taningai. Yagu yipesudode cucha gajnaréngone; yeteque yu ome Dupade.
Mu iji udojo ga sequeredie a déji nueve, mu quene yujúsipise yio. Quene yujusipise yio ome cuchade gu, quene yangaripísi misionérone uje e ore di. Uje yipésu cucha gajnaréngone mu e yiraja.
Chise diri uje yucué Dupade adode to:
Yacaranguipísome Dupade uje e yiraja cojñone uruode garósirique to, enga quene yirajapise ore acaditigade. Ore chojninga: “A gosi chimesa dapesudode cucha gajnaréngaja dacatecãraitigade ome dangurené Dupade, ga Dupade que chátaja uté gosi go.”
Enga jé u uje yipésu yajéode – yipésu yajéode mu quene yibasapísaja Dupade úringa pangurené to iji sequeredie uje a déji nueve iji yiquigade. Enga quene yucué Dupade adode. Yanguretapise Dupade, yacate cojñone ore to. Mu yucuépo yisocáringome ga yojninga: “Dupade pésu yu ga pésu yibijnani. Enga pésu yibijnani ujeta yacate Dupade uruode ome yujode ayoré ore.” Gusu yu iji yiyaridode, yajesúode erámio. Mu jé yucué yáyipie ome Dupade. Mu yacaranguipis ome Dupade uje íjnoque yujórique ayoré jeta chirajapise cuchade iji yidai, ga cojñone ore que gosi cho yiquique mu. Qué yucué, que yiraja yisocáringome Dupade gotóraque. Cáma yujusipise yio ga yicatecã́ri Dupade. Yicatecã́ri Dupade icaite, ga idógosi jeta que idájapise gotique.
Que iyajmanguipise gotique uje yicatecã́ri Dupade ica iji yejnai:
Gusu yu iji yejnai tiji erámi, mu ujnusiétaque yu aja yejnai. Yo yágugu yurásade ore uje íjnoque ayoré jeta chiraja cuchade jeta chatata Dupade adode ome ore uyoque, mu yáyipie déji Dupade enga yicatecã́ri Dupade iji yejnai.
Yojninga: “Dupade á, acué yacadisóño, acué yacadisónique; chãje gosi chacate yu ome Dupade adode ujetiga chacate yu ga yiraja cuchárigo to ga yatatapo adode to ome yurásade ore gaté.”
Quigade ga ore urusarane di ome yu:
Quigade mu, enga jé garósi, garósi dirode iji yicatecãraitigade mu ore urusarane e di. Tṍraji Tumi Chucua. Ore urusarane diji yocurasade eduguéjna ga chojninga: “Euguéjnane déji ta Béni ga ore acadigode ayoré quedéjnane. Ujetiga apótayo ga arocho Oroné aja de to.” Enga ore chingo yu ga e yáyipie déji yicatecãraitigade. Yáyipie déji yicatecãraitigade casé ga jé upúsu.
Mu yicatecarápoi Dupade rĩ ga yojninga: “Yicatecãraitigade a u uje a yajneque baroquéode. A déji jnupe eruénique marínga, isega jé yi. Jeoga escuela déji jnup eruei, mu jé yipota jeta yiraja badode garósirique to jeta yiraja cuchade, jeta yiraja darujna aode.”
Timotéo chatata Dupade uruode iji de:
Yajei upúsu. Idája diríca, mu yacaranguipise uje Dupade qué chiroque yu aja uté ga jé yiji. Jé yacaranguipise ome uaque, yijorane uaque uje uacadotáyo Dupade Uruode iji de. Yacaranguipise uje Timotéo chatata Dupade uruode iji de ga jé yiraja ujade to ome yurásade. Chãje Dupade a ajeo u ica gu ome yu iji taningane. Yacaranguipise ome cuchade uje Dupade chátaja yu ga tangáripísi yicatecãraitigade.
Uacuñengo, ayoréode uáguiji uaquedai, uacuñéngo chucué dasoca to ome Dupade. Uacamóño uje Dupade u uje chátaja yoque. Cuchade uñane qué déji mu garósi deréjnane enga e yiya. E gusu.
Oroné – Puesto Paz, Bolivia – 1976
Pablo Wyma churúsãre Oroné uruode nanique
