Ga gare nanique uje Jesus chisi ome arurégode ome cojñonguemúone:
Yijorane uaque á, uacamóño uje jec ũré Dupade Uruode, mu dicoré Satanás choréi yógaja quedéjnane enga que yicopoi Dupade Uruode jnese gotique rĩ. Enga uneroque Dupade Uruode ome yoque uje que yico yocúringárique arégome Dupade gu. Cucha gajnaréngone déji yocari enga deroco Dupade Uruode ome yoque. Mu yoquigosi uje aregue áyipie tenga Dupade unéningai quérã ome. Jecute iji ne a yingo Dupade Uruode ome uaque iji San Marcos 8.
Cojñone chi cuatro mil ore uje ore tangáre Jesus acajnaquéode nanique:
Enga yijorane uaque á, uacarajáyo Dupade Uruode iji uné. Ibirácho ome, piraguipise ome yoque, iji uné Dupade Uruode jogadi. Enga uacarajáyo uje Dupade Abi Jesucristo chi chijna cojñonguemui aja yotequedéjnai cuchátique pijnanai nanique uje cojñone chi cuatro mil ore.
Enga uacarajáyo uje Dupade Abi Jesucristo uté acadigode ujno cojñoc ore díningo chi gadioc ore ome ore uje ore déji te uje ore tangári Jesus acajnaquéode. Enga chi que ore tagu dabotique gotique. Que ore tagu dabotique uje ore chejna raja dacadisṍri acajnaquéode.
Jesus chosõripise cojñonguemui:
Enga quigade enga, iji ujno enga, chi Jesus chojnirame dacadigode ore: “Yosõripise cojñonguemui uje e ore guejnane dire gadioque iji yocari. Enga a e íjnonguipíse ore potígo. Enga que togome yu ujetiga yiroque ore aja ore iguíjnane. Chamãñaje yiraja uje que ore tagu dabotique gu enga uñéngo a ore chorase sere ome dayaguhéode iji dajei.”
Chi idajapise uñane ore iguíjnane. Jecute que Jesus chiroque ore aja doi uje socaseti enga chaguhei uásejna iji dajere tome uté gosi enga topiéjna ajirigode iji siñeque, anínique daguíjnarique yui guesi.
Jesus chiraja cuchade jnese. Chiraja uje Dai chátarásaja gajnerĩ. Enga jec u uje chojnirame, chojnirame dacadigode ore: “¿A ca arurétique déji uacuñeque a?”
Déji San Juan uje chi 5.000 ore, cojñonguemúrique uñeque nanique:
Enga uacarajáyo uje disírique déji uté uje qué parátaque uné, a cho Jorge uné, a cho Rubén uñeque. Disi ta chejna raja Dupade Abi Jesucrísto acajnaquéode to, enga que qué jnusina dajuránone anícho gotique yui arurécho. Que jnusina yui. Que jnusina gotique ujetiga tagu uje chejna raja dacadisṍri acajnaquéode. Enga jec u uje arurégode jé qué déji enga a chejna yijmanai arurégode. Enga jec u uje ore chingo dacadisṍri. Ore chingo dacadisṍri tenga ore chojnira: “Disi posode arurécho déji enga chejna yijmanai. Que chimo ujeta oyídode gare.”
Jesus chibéro disi arurégode aja jnumi ome cojñonguemui uté:
Enga jec u uje chi ore chisiome arurégode ome Jesus uje chejna yijmanai. Enga Jesus chi chibéro aja jnumi tome ore. Enga chi chacãre Dai gai. Tenga, jé u uje Jesus chojnirame dacadigode ore: “Aquíraño cojñone ore enga ore chácari ji jnumi.”
Enga chi ore chaquĩ́ra cojñone ujetiga ore chácariji jnumi jnese, cojñonguemui. Enga jec u uje chi Jesus chacãre Dai gai tome arurégode enga Dupade chátaja dajnacari. Enga quigade enga arurégode quérã jnese. Enga ore tagu.
Ipésu yajéode enga yipecorásu arurétique iji Zapocó enga a ca tiógararása iji ujeta yajo arureque cíncorigo. Ta qué uneréjnarase yui tome yoque. Unéningane que jnorase ome yoque. Cinco arurégode mu, cinco mil cojñone, enga ore chiretáguiji dacadie jnese.
Jesus acadigode ore chamáta ore iquebéode iji arurégode nanique:
Enga yijorane uaque á, ome cuchade ujnojo iji San Marcos 8 enga chi Jesus acadigode ore chamáta ore iquebéode iji arurégode. ¿Arurégode piedie cho rique? ¿Cho rique, yijorane uaque á? ¿Cho rique piedie arurégode?
Gare iji yirídai. Jec u. Yijorane uaque á, ome arurégode piedie ujnaji chacate yongome Dupade Abi acadigode uje, uje acadigode gare ore iji yirídai to. Enga arurégode que chona acadigode ore uje 12 ore, uje a ore cho dajnéngu piedie enga jé piedie jé chopise ore to uje 12 u.
Que ore chicadígui Jesus ipesudi ome ore enga ore chucué Jesus quigode jnese:
Yijorane uaque á, uje Jesus e chimate anirone ujno arurégode uje Dai chõre arurégode ome ore, enga jé u uje a Jesus acadigode ore tagu to. Enga quigade enga Jesus qué catecã́ri Dupade iji siñeque enga cojñone ore jno to. Enga acadigode chi ore chiramísaraja yotequedéjnai tuté enga cojñonguemui que chicadígui Jesus ipesudi ome ore gotique. Ore chucué Jesus quigode jnese. Chi ore chicáji sona ujeta Jesus déji, déji yotequedéjna cuchábi uéchai uñai.
Enga chi quigade enga Jesus chise yotequedéjna cuchábi uéchai uñai to. Mu cojñone ore chudute Jesus ujnomei uje déji ta, enga ore chisapo Jesus rĩ. Jesus chojnira: “Iraja uaque,” chi chojnira. “Uacacueyoi yu gu uje icatecã́ri Yai diríca enga chátaja yu enga chõre, chõre arurégode ome uaque enga uacacho,” chi chojnira ome ore.
Arureque uecai u Jesuse:
Jesus chojningame ore: “Arureque uecai u yu. Arurei uté uje chisi ome pucuecaringué eyúgojmai ome ore jé u uyu. Ujetiga gosi tibágui yu ome arurei uté enga a ca chaguhénique chejnápo uté gosi rĩ. Ujetiga gosi changureta yu ga a ca gosi cajnorapóji jne rĩ.”
E mu cojñonguemui chi ore chojnirame Jesus: “Pacadisṍri á, be arurei tuté gotique enga yajo.”
Jec u uje Jesus chingopísa ome ore enga chojnira: “Arurei tu yu,” chojnira. “Dupade chiroque yu ujeta anguretáyo yu,” chi chojnira.
Jec u uje iji deréjnai uje cojñone ore chetaque Jesus uruode iji enga chi ore jno.
Chi cutejma gáguedaté íjnongaja erámone. Enga chi íjnoque ore iji Jesus gari, aníri, cojñonguemui, uje ore chetaque Jesus uruode gu uje cho arureque eca iji re nanique.
Cojñone ore chetaque Jesus urode uje cho arureque uecai iji re ujetiga ore tagu to:
Yijorane uaque á, iji deréjnai tuné ¿gotique gu a uje cojñone ore chetaque Jesus uruode ome arurei? ¿Gotique gu a uje cojñone ore chetaque Jesus urode uje chojnira ‘Dupade chiroque arurei taja uaque ujetiga acho.’
Mu ore chetaque uruode. ¿Gotique gu a? ¿Gotique gu a uje cojñone ore chetaque Jesus uruode ome arurei?
Yijorane uaque á, cojñone ore chetaque Jesus uruode ome arurei te gu uje ore ajegaidi tupúsu arurei tiji deréjnai tuné. Ipésu yajéode to enga yocajegaidipise arurei ome yoque iji deréjnai tuné, yocajegaidi tupúsu arurei iji deréjnai tome yoquibai. Yocajegaidi tupúsu. Mu ome yajéode, enga que yipótago arureque uecai gotique.
Yoquica potapísa arurei tenga yicoi yoquica áyipiedie:
Yijorane uaque á, yijoranie uaque á, yoquigaidode u yoquica áyipiedie. Que yicoi arureque uecai ome yocáyipiedie gotique. Yoquica potapísa arurei tenga qué yicoi yoquica áyipiedie. Mu yirajágo uje cucha bisideque yoquica ajegaidi cucha. Mu cucha arei tome yocáyipie, aníri ajegaidi cucha u uje Jesus déji yocáyipie te gu.
Jecute yijorane uaque á, ome cuchade ujno, e yirajágo uje Jesus acadigode uje cutejma gaguedaté jnese, ore chetaque uruode ome arurei uje Jesus chingopísa, uje chojnira: “Arurei tu yu ujetiga acho. Dupade chiroque yu aja jnumi ujeta anguretáyo yu,” chi chojnira.
Mu cojñone jnese ore jno. E ore jno jnese. Ore jno.
Cojñone ore jno jnese, mu acadigode ore chácari Jesus gari jnese:
Enga yijorane uaque á, ome cuchade ujno, jnacarode ucode uje gare ore iji yirídai te que, enga ore déji Jesus gari jnese. Enga Jesus catecã́ri ore enga chojnira: “¿Jé oyo rique jne a ujetiga apótayo doi to a?”
Mu uñai chajnai enga chojnira: “Yocangaráni á, que togome yoque ujetiga yico to. Uje que pacadisṍri uñeque déji ujetiga uruode cho baruode. Ua u gu uje baruode chisi ome pucuecaringué eyúgojmai ome yoque,” chojnirame Jesus. “Bacadigode uyoque e yanguretágo baruode enga yirajágo uje yoquijnáti Crísto u ua. Enga Dupa uecai Abi upo ua rĩ.”
Júdas chetaque arureque uecai to:
Enga Jesus, Jesus chajnai ore enga chojnira: “Yajegaidode jec u jnaníringo jeta gare iji yirídai. E mu uñai déji uacari uje dicoré cáma chĩra to.”
¿Gosi te, yijoranie uaque a? Júdas u ojnongai enga uacarajáyo Júdas déji to iji ne. Jesus acadique to. Mu, yijorane uaque á, ome cuchade ujno, que yipota jeta yoco Júdas. Jesus e chingo cuchade ome iji deréjnai tuné. Mu Júdas áyipie uajadé ome. Mu Júdas e jno. Chacate cojñone ome Jesus adode to, Dupade Uruode to, mu que cha dajé gajnarétigai gotique, Júdas. Que cha gotique.
Quigade enga uje cucha gajnaréngone suepise Júdas gai, chisiome Jesus ome sijnángone ore jnese. Júdas ipotigádi u arurégode ome daca, enga cho cucha bisidéguiji Jesus guerani pucuecaringué eyúgojma.
Yoquica pota arurégode iji dirode jnese, jecuté yicoi yoquica áyipiedie udire:
Jecute, yijorane uaque á, ome cuchade ujno, e uacarajáyopise jnese. Imóngo uje Jesus acadigode ore, cojñonguemui, anire, ore ajegaidi upúsu arurégode ome daca. Que ore ajegaite arureque uecai gotique ome dáyipie.
Enga, yijorane uaque á, yijoranie uaque á, ¿jec uacajegaitígo cucha ujno to a? Ujeta arureque, aníri tu, arureque tome yoquica, ¿uacajegaitígo a iji deréjnai tuné?
Yijorane uaque á, ome cuchade ujno, a yicopísi yoquica ajegaidode cucha enga a que yicoi Jesus to jẽ. Enga jé yicoi, yicoi yoquica áyipiedie te gu. Yoquica pota arurégode iji dirode jnese enga chojnira: “Asíome yu. Ipota arurétique.” Enga icoi, icoi. Que yicoi yocáyipiedie ajegaidode cucha gotique.
Yocáyipiedie enga ajegaidipíso Jesus adode ujetiga yipéco te gu arureque uecai áyipiedie, ujeta yanguretágo Jesus. Uje Jesus jé déji yocáyipiedie.
Que yipota jeta yoco Júdas. Uje Júdas e chiraja dasijnaringuéone uje ũré Dupade Uruode. Yijorane uaque á, ¿jec uacajéningo cho rique?
Jorgedé chãcara dacajnaquéode aja daguidedie uje pacatai:
Ujeta ibaque enga yijocharása ajaramétique gai enga yiguidedie pacatárase. Yiguidedie pacatárase enga icháji yiguidedie ji ti enga que yingo Jórgedaté gotique. Que yojnira: “Jórgedaté á, yiguidedie déji ujnaji. Pacatája. Jabón déji ne enga aru jẽ.”
¿Uacajéningo cho rique jeta Jórgedaté, ja chijocasirase? ¿Ja chijocasirase? Úngare.
Yijorane uaque á, yijoranie uaque á. Jórgedaté que chijocase yiguidedie gotique, jé quigade enga dijidája iji ti. Quigade enga dire uñai enga jec ũré e yõra yiguidedie uje, uje e dijite jnese.
Júdas chiraja cucha gajnaréngone ome dáyipie te mu, que chingome Dupade:
Enga, yijorane uaque á, ome cuchade ujno, e imóngo ome Júdas uté, uje Jesus chingome uje chojnira: “Uñai déji uaque uje cáma dicoré cama chĩra.”
Enga Júdas chiraja cucha gajnaréngone ome dáyipie te mu, que chingome Dupade. Enga Dupade que churu gotique. Jé cho yu enga que yingorása yiguidé ome Jórgedaté. Que yojnira: “Yiguidedie déji ujnaji enga aru jẽ.” Enga que churu gotique. Mu ujeta yingo jabóninguiji ajirigode enga ojnirarása: “Jórgedaté á, yiguidé déji ne enga aru jẽ.” Jórgedaté churu enga ichai.
Uacarajáyopise arureque uecai to:
Enga cho ome, jé ocopise ome Júdas ome cuchade ujno. Jecute yijorane uaque á, ome cuchade ujno, uacarajáyopise arureque uecai to. Que beyoi uacaca, aníri, uacaca ajegaidode cucha arurei tome. Ujeta iquérango iji yoquica ajegaidode cucha enga a que yicoi Jesus gotique to jẽ. Que yicoi gotique to jẽ. Chãje Dupade chingome yoque gu uje arureque uecai tu Jesus. Jesus chojninga: “Arurei tu yu,” chi chojnira. “Pucuecaringuei tupo yu rĩ. Dajei tu yu,” chojnira Jesus.
Jecute, yijorane uaque á, ome cuchade ujno, e uacarajáyo cuchade ujno. Uje que cho jeta, qué gajné jeta Dupade anguresórone ore chacate ore ome Dupade Uruode. Enga uacarajáyo. Que yipota jeta yoco Jesus acadigode ore uje porójna ore, cojñonguemui ore, mu ore ajegaidi tupúsu daca ajegaidode cucha.
Uñane u uje, uje chojmára ore iji yirídai, ore potapísa arureque uecai. Enga chirẽta ore. Enga Jesus, aníri, Jesus acadique ũréone u ore. Enga ore chopise ujopierane ome aníri, Jesus, uje ujopie déji ore gu.
Jecute e uacarajáyo ujno ore, aníri, Jesus acadigode ore jnese. Júdas ta chiraja cucha gajnarétigo iji dáyipie mu que chingome Dupade gotique. Enga Dupade que pésu cuchárique ome gotique.
A é gome ome uaque uje yãcara yacajnaquéode aja ajaramétique:
E gome gajnui tome uaque ome ujeta yijocharase ajaramétique enga yiguidedie pacatárase. Enga que yingome Jórgedaté gotique ujeta yojnira: “Yiguidedie déji ne. Aru jẽ.” Enga que yingome enga Jórgedaté que pésu cuchárique ome gotique, enga quigade enga uje dijite enga jec u úringanie ducaranei. Jec u. Enga ujeta yiraja cuchárique, ujeta Jórgedaté pésu cuchárique enga ojnira: “Aru jẽ,” ojnira. Enga churu enga ichapo rĩ.
Irajágo cucha gajnaréngone iji yocáyipie jnese:
Enga cho ome yoque, yijorane uaque á, yijoranie uaque á, iji deréjnai tuné. Irajágo cucha gajnaréngone iji yocáyipie jnese. Irajágo cucha gajnaréngone iji yocáyipiedie ujeta yingóngo cuchade ome Dupade enga Dupade churu yoque enga ichapo yoque rĩ.
Yijorane uaque á, yijoranie uaque á, ome cuchade ujno, que toque ujetiga yico yocúringárique areque gotique ome Dupade. Que toguipise gotique. Cucha gajnaréngone basaja yocáyipiedie jnese iji, iji deréjnane jnese. Mu yijorane uaque á, ome cuchade ujno, acatecã́choi Dupade ome uáguiji dirode jnese ujeta Dupade churu uaque jẽ iji Ujnacari iyoi. Chajẽ Dupade Ujnacari Jesus chojne ome dayoi ujetiga bisidi cuse ome yocate gajnaréngone, yocáyipie gajnarénguenie ore. (1 Juan 1:7 aja 9)
Ujnusina Tetáguedé:
Ujnusina, ujnusina Tetáguedé ucasode uje, uje ojnirame Tetáguedé: “Tetáguedé á, angureta Dupade to,” ojnira.
Mu Tetáguedé jĩraque chajnai yuruode enga chojnira: “Yiraba yá,” chojnira, “jec areque uje que yangureta Dupade to enga o parágui usodi,” chojnira. “Uje Dupade anguresórone ore, ore pojna dojode ayoréo aja quedéjnane,” chi chojnira. “E gusu yuruode.”
Chãje aguhétago cuchade aja Dupade anguresórone ore gai. Que yajico yocáyipie gotique tome cucha gajnaréngone gu. Aguhétago cucha gajnaréngone, anírone, Dupade anguresórone ore gai te gu. (San Juan 13:34 aja 35)
Jecute imóngo iji uné uje, iji deréjnai tuné, uje cojñone ore chetaguipise Jesus uruode ome re, uje chojnira: “Arurei tu yu. Dupade chiroque arurei tome uaque ujetiga acho. Mu uaquetácho.” Jecute ore jnopise.
Pumajo yoc ome dicoré, uje pota gu ujetiga yiyágo Dupade:
Jecute, yijorane uaque á, ome cuchade ujno, e uacarajáyo. Acueyopísi arureque uecai to. Uásejna yóguiji erámone uje ipótago yocucuecaringueque arei. Mu que yucuegoi cucha gajnaréngone iji yocáyipie gotique ujetiga yatatago ome Dupade, enga que toguípise yocúringárique areque gotique jẽ, uje cucha gajnaréngone jogate yocáyipie.
Dajere chiberopise yoque nanique:
Jé cho uqué case uje ijoi jnumi diríca uje icagóji Zapoco yui diríca enga dajere chiberopise yoque. Cho ome, cho ome yocanguretigai iji deréjnai tuné, uje gajnareque yocanguretigai tiji, iji deréjnai tuné. Jmátaque yoque ome cuchade. Jmátaque yoque ome yoquiplátadie. Jmátaque yoque ome yoquiguidedie. Pumajo yoc ome dicoré, uje pota gu ujetiga yiyágo Dupade.
Jec ũrepise Pablo uruode ome cuchade ujno uje chatata dajnéone pujuyaquéo. Mu que gusu Pablo, mu Jesuse chejnáreque re to. Jesus dóji jnumone diríca enga íjnoque, ome anírone, dariguitigade ome cojñone uyoque ujetiga chacate yogome Dai, anírone, iroquéode ujetiga yipéco. Enga íjnoque, a ca iguíjnarique cusapo rĩ. A chaguhéode chejnapo rĩ.
Enga jé cho ome Dupade anguresórone uáguiji deréjnai tuné, ejnángo cuchade aja yoque. Cojñone ugucharãque, mu que iyieque uguchade. Mu que ore chiraja Dupade enga Dupade guerãte ugúchade ome ore. Que ore chosõre dojórique ayoré ome anírone daguchade. Ore nína raque. Jeque Dupade anguresórone jmatac ore. Dupade anguresórone ore íjnocapo ore rĩ. Que ore tirógaja anírone, cucha urõsoringuéone ome dabai. (1 Pedro 4:12 aja 13)
Jecute, yijorane uaque á, ome cuchade ujno, e uacarajáyo jnese ome cuchade ujno uje que cho jeta qué gajné ujeta Dupade anguresórone ore chacate yóngome Dupade Uruode gu. Mu ujetiga apota ararãcho aja Jesus ipesudode gai uje chisi ome arurégode ome cojnonguemúone, arureque uecai ore, enga obiréjna jogadi iji Dupade Uruode uje déji San Marcos 8, aja 9, aja 10 ujno, jé iji San Juan 6 to rĩ.
Jorgedé – Zapoco, Bolivia – 13 de octubre de 1974
Janet Briggs churúsãre Jorgedé acajnaquéode udojo nanique
