Yajirigode gadioque iji Dupade Uruode:
¡Mu cho jeta yirajapise Dupade Uruode to iji darujna aone! Mu a yacate uaque garósirique jne.
Yugúsi Tobité ga yirasique uje yicatecã́ri Dupade ome uaque iji ne Rincón. Yicatecã́ri ome ayoréode iji erámi jnese. Jé u Zapocógosóde ore.
Ore cho Dupade iji iyequedíe ore:
A jé arajáyo to ujetiga uacacadisóningo ore chacate uágome iji deréjnane. Jeoga uñeque chacate uágome iji deréjnane uñeque. Jé uacamóño to uje anire cojñoque jmatai cuse. Chi cojñoque jmatai isocai u ayoréode eduguéjnarique ujetiga chetaque ayoré noñátique. Ga jé isocai u Dupade uruode enga jé upúsu.
Jé uacamóño to uje don Len ore chicai uté que, Davidé ore, ga yicatecã́ri Dupade ome ore iji deréjnane jnese. Domíngo ujai chojmára iji ti uje yatecã́ri ome ore quigade. Mu don Len ore diapo rĩ ga Davidé chingo yu Dupade Uruode iji. Uje Pajei ore chi ore chetaque Dupade uruode, mu jé gajnui u. Mu quigade ga don Len chi ore chacate ore. Mu ore chojninga: “Que cuchárique cuse gotique.” Ore cho Dupade iji iyequedie ore. Ore gaidi u uje ore chijnóra iyequedie ore.
Mu quigade ga uté Ajei chi chacate darásade ore ome Dupade Uruode ujade. Que chirajapise Dupade Uruode mu chacate ore garósi, garósi, garósi. Ga jé isocai u.
Ore chojninga: “Gusu iyequedie uje yijnóra ore.”
A jé aducho to uje uacacadisóningo chacate uágome uje cojñoque jmatai uje chi Dupade chacate uté, mu cojñoque atai ugucharãi uje iparátadie jiei. Isoca jé u yu iji deréjnane. Je yugúcharique cuse gotique. Ga jé gajnui u.
Mu quigade ga udojo ucode Pajei ore, chi ore cho etinguerẽ ome uté Davidé. Chojninga: “Que cuchárique Dupade uruode gotique. Gusu iyequedie uje yijnóra ore.” Mu que ore chiraja Dupade uruode gotique gu.
Chi cojñoque jmatai chutai eduguejnai iji quedéjnai:
Chi jno uté, cojñoque jmatai. Tibágui eduguéjnai enga utaite iji quedéjnai. Chi ajéode u ujeta tagu potígo irérigui. Mu datéringa uje chetaque. Que áyipierigui déji Dupade uruode gotique gu.
Cojñoque jmatai toi:
Chi toi mu chise jnani bajade uñai, queyayode uñai. I tu Abram nanique. Chi chise iji pijogadi uté uje Dupade anguretasórone jogadi u.
Jnani atai topói to nanique rĩ:
Mu uté jnani atai uqué chi Dupade jnusipise uté jõ. Chi chojninga, uqué a: “Yujnusipise uje je arec adode que múñi.” Chi ajéode u gu jeta chisi ore iji dagúchade, mu chãrángome jmatai tuté. Chi chojninga: “Que yipota yijico uté yúrique gotique.” Uté aníri, jnani atai.”
A jé arajáyo to uje uacacadisórone iji ne ore irajatígo, mu quigade ga chi jnusi. Chicai Abraham, mu chi jnopo rĩ ga chicáji gajño pioi.
Don Len chise cojñotique ica uje chetaque cuchade jnese:
Jé isocai upo rĩ uje chi don Len uje chise cojñotique ica iji dabié máquina ajei uje chi chetaque cuchade jnese. Chi ca don Len chiraja gotique gu. Chi chojninga: “Yaca jóroga aja udore Dupade anguresórone uacanírenie iglésiadie. Yacája udore arĩe. Yico ore anírenie mu que chajneráme yu dínique gotique go.”
Chi cojñoque atai tibágapo Abram rĩ mu Abram que doi ipotigádi go:
Ga gajnui jé u. Mu chi quigade ga uqué jno, jnani atai. Chi jnopo rĩ ga chicai uté.
Yiraja íode mu garósi jne yacajnaquéode ga que yatatapise gotique. Uje yiraja udojo. Jé gusu.
Ipeyai – Rincón de Tigre, Bolivia – 1960
Transcrito por Marina de Morarie.
