Ecarai catecã́ri Dupade:
Yicatecã́ri ua, Dupade, ome yoque ujetiga yangácoi baruode jne. Jé basa yocai ayoré, jnani bajade, ore todo ua, uje ore chiraja uje ujopierãque ua, Yoque Dupade, mu icatecã́ri ua iji gajnerĩ. Yacaranguipise uje disi ejode ore chiraja uje bapota uyoque. Jecute icatecã́ri ua gajnerĩ ujetiga átaja yoque gajnerĩ iji direjnime ujetiga yangácoi baruode, Yoque Dupade. Yacaranguipis ome ua uje yocurasade uje ore déji don Jaime gari, ore tangáripísi Jaime acajnaquéode gajnerĩ, Yoque Dupade. Enga ore chiraja ua uje posõrasṍri ua, Yoque Dupade. Jecute icatecã́ri ua ujetiga átapísaja ore gajnerĩ; arodipise ore enga asíome betotiguei tome ore. Asíome bajopié tome ore ga ijõre ore iji dirode jnese, Yoque Dupade. Adi uyu gajnerĩ, Yoque Dupade, jeta yajníja yoquidai, jeta arodipise yoque, Yoque Dupade. Yoque Dupade, icatecã́ri ua ome cuchade jnese uje bamanique cuchade nanique uje yajo cucha pibosode ujeta yipéco baroquéode, bojningane cucha, Dupade. Icatecã́ri ua ome cuchade jnese ome bajnacari Jesute i. Amẽ.
Juan Bautista chojninga: “Écãcho uacajéode.” (Mateo 3:2)
Ingo Juan Bautista ojningane uruode aja erámi unirisórone uyoque nanique uje chojninga: “Écãcho uacajéode.” Aníri, Dupade Uruode atatasṍri uñai uruode u uje Juan chatata nanique, uje purusãracho nanique uje Jesute, Dupade Ujnacari, cama base nanique iji ne jnumi.
Jaime chicha uagaja cojñone gari gu ujetiga angáchoi Dupade Uruode: A jé arajáyo don Jaime acajnaquérigo uje Dupade ujnacari i tu Jesuse, enga chi chojningame darasade ore: “Jé go uje que ajire uacate bajade,” chojninga. “Jé ajire uacate bajade ga angáchoi Dupade Uruode enga jé etácho uacatígo ome uacate bajade,” chojninga.
Enga jé adode u, jé adi u uje Dupade Uruode gajnesṍri uje ugúcoi iji dirode unojo uje don Jaime chicha uagaja cojñone gari gu ujetiga angáchoi Dupade Uruode enga ayáyo uacate bajade. Adi u yoque uje jecucha yingo ayoréode iji Tobité uje yacate ore ome Dupade Uruode uje yojninga: “Gajnui tu uje cojñoque eduguéjnane ore chijna yogome cojñone ore gari nanique uje yocaode qué choquíbi yoque nanique.” Mu quigade ga yacágo boraidie enga adode urásu jeta yécãco yocadode ome Dupade adode enga yicoi Dupade ojningane cucha. Yicoi Dupade iroquéode enga yijnángo Dupade ojningane aja guesi ujetiga a yocujórique ayoré, cuchárique cho na, ga yosṍco. Ga unojo u uje Dupade ojningane u uné, u uje chi chojningame darasade: “Ayáyo uacate bajade,” chojninga. “Beyoi Dupade ojningane cucha. Chamáñaje Dupade di jne enga cho dajuñame erámi tuné,” chi chojninga.
Dupade ujnacari di gu ujetiga chingome Dayé Dupade uruode ome yoguiji erámi tudé:
Mu que uruode upúsu Dupade ujuyaquéode uje jnani bajai Isaías chojninga: “Chi Dupade ujnacari di jne. Ujnacanique cus,” chi chojninga. Mu chise gójni unojo uje chi Jesute e di iji jnumone enga, uje e uacadúcho to uje a don Jaime chingo uaque uje chi, Dupade aníri, ujopié chĩreta gapúraque nanique, ga Dupade ujnacari déji ajei. Abi déji ajei, gapua. Jé base gójni enga jec u uje chingo dayé ojningane cucha aja ayoréode ore iji erámi. Jecute yingome uaque ujetiga anóningachó uje apótayo yocadode enga yicoi Dupade ojningai pijnoraquei jeta yijnángo ome ñane, ga yijnórango ñane iji erámi. Enga ca yimóngo pajei dotáningárique. Yiraja uje ayoréode uyóguiji erámi casodicaite yijnángo pijnoraquei ome ñane, mu Dupade ijnoraquei cáma u gotique. Dupade ijnoraquei ujetiga ayorérique doi Dupade ojningane cucha; chacãre Dupade gai ome ipesudode cucha. Enga unojo u uje ipota jeta ingome uaque uje don Jaime chijna uagaja cojñone gari gu ujetiga angáchoi acajnaquéode. Enga chacate uagome darujna aone pirajade enga adi jec u ujetiga gosi chiraja darujna aone, jé gosi chiraja ojningane, uruode iji darujna aone enga jec u uje gosi chingo darasade.
Yiraja uje ayorérique que déji siñeque jeta chiraja cuchárique bisideque. Jé sárode, ¿jeta ayorérique chiraja sánique bisideque? Úngare. Jnanione, sare irajasórone, ga chacate ore enga ore chiraja enga adi jec u ujetiga don Jaime chacate uagome Dupade Uruode enga uaque gosi tangári enga gosi chiraja Dupade uruode quigode gu dacadisṍri.
Dupade chojninga: “Angáchoi yujnacari ga jé ca yujuseque uáguiji jnumi.”
Enga adi jec u uje uaque gosi que chiraja anínique gotique. Que chiraja sánique go. Mu acadisónique chingo sárode aja ga e chiraja. Chiraja ga chetingare ujetiga jé chiraja. Ga adi jec u. A uaque gosi a chetingãre Dupade Uruode enga gosi irasicho Dupade Uruode uje Dupade chátaja gosi enga chisíome dayuquetotiguei tome gosi. Enga que qué cho chique ojninga ome cuchade. Jé uacamóño uje Dupade chojninga iji daruode ome jnanione, yocayode jnani bajade: “Angáchoi,” chojninga. “Angáchoi yujnacari. Angáchoi yirógode,” chojninga, ome udore irógode jnani bajade urusarane. “Angáchoi yirógode udore ore ga jé ca yujuseque uáguiji jnumi,” chojningame jnani bajade.
Querénga ore doi Dupade Uruode nanique, enga Dupade cho dajuñame ore.
A e uacadúchoi iji don Jaime pijnatique. Querénga ore doi Dupade Uruode nanique, enga Dupade cho dajuñame ore. Cho dajuñame ore enga chejna ore ome yote dequejnagṍri uje e adúcho to uje gusúsu Dupade anguresṍri ore uje chiqueta susodi uje gadióguiji ti iji yijmanuñai. Ga unojo u uje Dupade chojninga, Juan Bautista u uje ojningai u. Chojninga: “Écãcho uacatígo,” chojninga, “ga Dupade chátaja uaque,” chi chojninga.
Mu jec ũré uje Dupade chetaque jnani bajade ore adode. Chetaque ore isijnaringuéone. Chetaque uje ore chujé ñane. Chetaque uje ore chóji yote pioi jote, enga cho dajuñame ore. Enga chojningame yocayode jnani bajade uñai uje i tu Noé, cucoi ipesungóri: “Apésu cucoi enga babode, bajnacarode, uacajneque. Jé acáyo aja jne,” chi chojninga. “Uje a ca cojñone, barasade tangári ua enga a yo yujuñame ore,” chojninga.
Mu e adúcho uje Noé pésu cucoi te gu uje changureta Dupade, enga que chotigase urúrique enga jecute pésu cucoi. Todo Dupade ojninga pujuyaquei yúi gu. Ujetiga ca Noé pésu cucoi te ga, a Noé chorásu dabaya ore to Dupade guetesórone ore uje ore chetaque Dupade Uruode. Mu chamáñaje changureta Dupade enga pésu cucoi. Chise gójni guei dequejnangóri diringai te, enga chiroque Noé, acoté, ujnacarode, ujnacarode ore acotedie ore aja cucoi ajei enga ore chacája enga ore ecáji Dupade ujuyaquei jne. Jecute adi u ujetiga ayoréode ca ore tangári Dupade Uruode iji yoquibijnanone enga a Dupade jno yocúdi enga gajnui jec u uje chiqueta Noé ore nanique iji dajuyaquei uje cho dajuñame urasade ore uje chacho ore angoneparitigade.
Mu chi Dupade cho dajuñame erámi to jne ujetiga chacho ayoréode, cojñone yoquisijnaringuéone uje que yicoi Dupade uru quitic uje que yangãcoi Dupade ojningane cucha.
Jecute omi tu ujetiga yuchẽco yocangoninguinone gáyode ome Dupade Uruode, enga yanguretágo Dupade ujetiga yuduco uruode. Chi Dupade cho dajuñame ore, jnani bajade ore, enga chamurase guei iji ore gai. Chuságaja sibíjnane iji yocúdi enga yodi tṍrapóji údi ome ore rĩ. Ore doso jóronga enga ore tibidi jóronguiji Noé ujetiga Noé chuchẽre da-cucoi gai tome ore ga ore chacája to. Mu Noé a chojninga: “A yijmarirase uagaja mu que togome yu. Chamáñaje Dupade suru yoquibai. Que toc jeta yuchẽre gai.”
Ore chisa jóroque dabade iji yote dequejnagóri jmainie. Enga a jé adi tu ujetiga Dupade di iji jnumi te ga. A yocuñéngo, yocurasade uñéngo, cojñone a chisa jóroque dabáyode iji Dupade ujuyaquei jmainie ujetiga cho dajuñame jnumi.
Noé urasade unojo, chi ore chuñieta nanique ome ipesudi cuco. Chi ore chojninga: “¡Chimo jóroque gotique! uje Noé pésu cucoi. ¿Ja guei icasirase? Cachi ipesute cucoi.”
Mu que ore chajire gaté uje Dupade chiroque iroi Noé aja cucoi ujetiga pésu. Noé chingo darasade ujetiga ore cha date gajnaréngone enga Dupade ca pésu cucha gajnarétique ome ore. Dupade ca cho dajuñame ore jetiga chimesẽre ore atígo. Mu jno gaté gojni Noé uje chi chingo Dupade Uruode aja ore enga chi chojninga: “Ayáyo uacate gajnaréngone,” chi chojninga. “Chi Dupade cho dajuñame yoque jeta ca yiyágo yocate gajnaréngone.”
Gajnui jec u iji diri tuné uje cojñone, ayoréode ore chujñieta Dupade Uruode to.
Mu doi datéringane uje ore chujñieta gaté. Mu gajnui jec u diri tuné gajnerĩ uje cojñone iji erámone, ayoréode iji erámone, uje ore chujñieta Dupade Uruode. Ore chojningame Dupade Uruode: “Cachi Dupade Uruode atatasórone ore ojña.” Mu que cachi yocojña gotique. Jec ũré yoque jecute jnani bajade unojo ore chimo jóronga dínique uje Dupade cho dajuñame ore enga quene ore chucué Dupade ujetiga changureta. Mu e que qué dínique dépoi gotique ujetiga Dupade qué chuchẽrape cucoi gai enga ore chacapója rĩ.
Enga adi jec u uje ayoréode, cojñone a ore pota jóronga ore nóna yoque to enga a ore chojninga: “¡Jesute a, ayape ga yijína uaque to jne!”
Mu Dupade Uruode que qui u go. Dupade Uruode qui u uje chojninga: “Qué yijna yirógode ore pijnani uje cama yi ore údi iji jnumi.” Enga jec ũré ujetiga ayorérique chucué yocacajnaquéode iji Dupade adode enga doi ga changureta Dupade uje cama Dupade cho dajuñame jnumi. (2 Pedro 2:5)
Yijóchago uacajéode údi ujetiga ajnusínaño Juan Bautista uru quigode uje chojninga nanique: “Écãcho uacajéode.” Juan Bautista uté chimo Jesus uje chose ore yui nanique enga chojningame darijogosórone: “Cajicho to jnacari uté. Uté u jne ujetiga toi ome erámone jogosórone yoquisijnaringuéone. Enga gajnua u áyasa perané ome Dupade. Enga Dupade jé guerani u dajnacari uté ome yoque.”
Jecute cuchayi tupúsu Dupade uruode uje chojningame yoque: “Angáchoi yujnacari, ga jé ca yujuseque uáguiji jnumi.” E gusu.
Ecarai – Rincón de Tigre, Bolivia – 1960
Ecarai chajnerame don Jaime Dunn uruode nanique
Marina de Morarie churúsãre Ecarai uruode udojo
