Crísto chacãra danguresórone uyoque aja dabai: (Romanos 12:4-5)
Irajágo uje ayorérique chojmára marínga, uté adode uásejna. Jé cho Crísto anguresórone uyoque. Uásejna yoque mu jé yitojmárango iji yocanguretigai ome Crísto, enga yocajnui u ayoré chojmarai iji jnumi.
Cho jetiga ejnaretaque Jesus anguresórone uyoque jnese iji yocuáguedie: (1 Corintios 12:26)
Jecute uje Dupade anguretasórone yocuñeque pésu date gajnarétique, enga cho jetiga ejnaretaque Jesus anguresórone uyoque jnese iji yocuáguedie. Que ejnaretaque yocúdode gotique, mu ejnaretaque yocuágue. Ujetiga gosi údode atique uñeque doso enga uté údode jnese chejnáreque re to. Enga jé cho ujetiga ayoré chaquesu dajmané te ga, pésu cucha gajnarétique ga, jé ore chaquesu dague. Jeta chaquesu, pidi chichagu uñeque údode, enga que gusu pidi ijochapídi gotique uje ũroso. Ũroso údode jnese.”
Cucha gajnaréngone jĩrique chichagu raja erámi údode jnese:
Yiraja uje a Dupade anguresónique pésu cucha gajnarétique ga cucha gajnaréngone jĩrique chichagu raja erámi údode jnese. Mu jé ca ojninga, ‘Iya Dupade to jne. Jesus anguresórone pésu cucha gajnaréngone gu.’ Que u gotique.
Ango bojórique ayoré ipesudode cucha gajnarécho aja: (Galatas 6:1-2)
Ujetiga angureta Dupade enga jec ũré angureta Dupade, enga be Dupade ga acatecã́ri. Be bayé Dupade ga acatecã́ri enga ango ua aja, enga Dupade a pésu ua jnenga Dupade chingo daruode aja ua. Dupade a chojningame ua, ‘Be bojórique Dupade anguresṍri uté uje pésu cucha gajnarétique. Ango ipesudode cucha gajnarécho aja.’ Socaseti baqueta bajõrai uté enga dopoi Jesus adode rĩ. Dupade uruode jé uté.
Jé basa gosi a chojninga, ‘A yiya Dupade. Chamáñaje yocacadisõri uté, jeoga yocangaráni ome Dupade adode cha gu.’ Enga gosi que changuretapo Dupade gotique to rĩ. Ujetiga uruode u udore enga obiréjna uje gosi angureni tu uraque dacadisṍri, mu que angureni u Jesuse. Jé basa uté gosi uje jé ũré changureta Dupade, ga que chojninga gotique: “Yiya Dupade to. Yocacadisṍri cha gu.”
Moises urusarane chojninga: “Ajé gapua jeta moji jnacanique bisideque.”
Jetiga gapúraque moji jnacanique gari bisideque enga ajéyo gapua, jeoga jnacanique moji gapua gari bisideque ga ajéyo,” chojninga. “Ga íjnoque pisijnaringuéone iji uacajade,” chojninga. Mu purusãracho udore iji antiguo testamento, jnani bajade ore gajnecho Dupade urúo, uje cáma Jesuse di nanique enga toi ome yoquisijnaringuéone.
Yocajnei tu nuevo testamento:
Mu disi ejode uyoque ga ujetiga yanguretágo Dupade ga yocajnei tu nuevo testamento, enga a ca yicórase pacajnaqueque diyajmane unojo gotique. Mu yacáco yógaja eduguéjnai David uté. David a chimo jóronga uje urasade ore charásu ga sose Dupade yui. Ga Dupade chĩro isijnaringuéone enga chinguíra darádie aja isijnaringuéone jogadode enga íjnongapo rĩ.
Enga yimóngo ipesudode cucha omío ome yóguiji guidai. Jecute ingome yoque to David, jnani bajai, urusarane uje churúsãre ome uyóguiji erámi uje déji Salmo 51. Que gusu uyoque gotique jeta yocajnécho urusarane. Dupade anguresórone yocajnécho jnese jeta yingongome yoquisijnaringuéone aja ñane. Cucha yi tupúsu ujetiga yoco ñane quique enga uajate yóguiji yocanguretaretigai. Dupade a chátaja yoque to ga a ca chaguhénique chejnape yóguiji guidai gotique rĩ.
Beyoi Dupade uruode uje acatecachoi: (Mateo 6:6 aja 8)
Enga yingo yoque to ujetiga araja ua iji Dupade uruode enga acatecã́ri Dupade. Ango bayé Dupade ujetiga chátaja ua, enga acatecã́ri Dupade to iji dejade ujetiga jec ũré chátaja yoque iji guidai te ga etoque yoque. Mu yiji Dupade Uruode uje Dupade Uruode chojninga: “Acatecã́ri bayé Dupade enga ca ango ua aja erámi jeta be ajãro enga acatecã́ri Dupade iji.” Dupade uruode chojninga: “Acatecã́ri bayé Dupade uje chimo cucha pipoguiédode,” chojninga, “Enga ca ango ua aja erámi gotique,” chojninga. Jecute ingo yoc uje a yicatecã́ri Dupade iji ijnangununie enga Dupade jé chimo yu iji.
Ecarai – Tobité, Bolivia – 1970
Marina de Morarie churúsãre Ecarai o quigode udojo nanique
